ചെവിക്കുള്ളിൽ ജെ.ബി.എൽ ഇയർബഡ് പൊട്ടിത്തെറിച്ചു: രാജസ്ഥാനിൽ വിദ്യാർത്ഥിനിക്ക് പരിക്ക്; അന്വേഷണം പ്രഖ്യാപിച്ച് കമ്പനി

APRIL 12, 2026, 4:10 AM

രാജസ്ഥാനിൽ ജെ.ബി.എൽ (JBL) കമ്പനിയുടെ 'ട്യൂൺ ബീം 2' (Tune Beam 2) ഇയർബഡ് ചെവിക്കുള്ളിൽ വെച്ച് പൊട്ടിത്തെറിച്ചതായി പരാതി. അപകടത്തിൽ വിദ്യാർത്ഥിനിയുടെ കർണ്ണപടത്തിന് (Eardrum) വീക്കം സംഭവിക്കുകയും പരിക്കേൽക്കുകയും ചെയ്തു.

ഒരു മാസം മാത്രം പഴക്കമുള്ള ഉപകരണമാണ് പൊട്ടിത്തെറിച്ചതെന്ന് ചൂണ്ടിക്കാട്ടി വിദ്യാർത്ഥിനി തകരാറിലായ ഇയർബഡിന്റെയും ഡോക്ടറുടെ കുറിപ്പടിയുടെയും ചിത്രങ്ങൾ സമൂഹമാധ്യമങ്ങളിൽ പങ്കുവെച്ചു.

സാധാരണ വോളിയത്തിൽ ഏകദേശം 15 മിനിറ്റ് മാത്രം ഉപയോഗിച്ചുകൊണ്ടിരിക്കെയാണ് വലതുവശത്തെ ഇയർബഡ് പൊട്ടിത്തെറിച്ചതെന്ന് വിദ്യാർത്ഥിനി പറഞ്ഞു. ഒരു ഡ്രില്ലിംഗ് മെഷീൻ പ്രവർത്തിക്കുന്നതുപോലെയുള്ള ശബ്ദമാണ് അനുഭവപ്പെട്ടതെന്നും തുടർന്ന് നടത്തിയ പരിശോധനയിൽ കർണ്ണപടത്തിന് വീക്കം സംഭവിച്ചതായി ഇ.എൻ.ടി (ENT) ഡോക്ടർ സ്ഥിരീകരിച്ചതായും അവർ വ്യക്തമാക്കി. ഉപഭോക്തൃ സംരക്ഷണ അതോറിറ്റികളെ ടാഗ് ചെയ്തുകൊണ്ടാണ് വിദ്യാർത്ഥിനി ഈ വിവരം പങ്കുവെച്ചത്.

സംഭവം വിവാദമായതോടെ ജെ.ബി.എൽ ഇന്ത്യ അന്വേഷണം ആരംഭിച്ചു. വിഷയം ഗൗരവമായി കാണുന്നുവെന്നും തുടർനടപടികൾക്കായി ഇന്ത്യയിലെ പ്രത്യേക ടീമിന് വിവരം കൈമാറിയതായും കമ്പനി അറിയിച്ചു.

വയർലെസ് ഓഡിയോ ഉപകരണങ്ങളുടെ സുരക്ഷയെക്കുറിച്ച് വലിയ ചർച്ചകൾക്കാണ് ഈ സംഭവം വഴിവെച്ചിരിക്കുന്നത്. ബാറ്ററികളുടെ ഗുണനിലവാരവും സുരക്ഷാ പരിശോധനകളും കർശനമാക്കണമെന്ന് സോഷ്യൽ മീഡിയ ഉപയോക്താക്കൾ ആവശ്യപ്പെടുന്നു.

JBL right side earphones bursted in my ear and lead to TM membrane inflammation
It was gifted to me by my sister one month back , JBL tune beams 2 @JBLaudio pic.twitter.com/HTvceq0y3R
— A🕶 (@Capybara2233_) April 8, 2026