സിഐയ്‌ക്കെതിരായ ഭീഷണി പോസ്റ്റ്; അർജുൻ ആയങ്കിയുടെ ജാമ്യം റദ്ദാക്കാൻ പൊലീസ് നീക്കം

JUNE 8, 2026, 10:09 PM

കൊച്ചി: കോതമംഗലം സിഐയെ സമൂഹമാധ്യമങ്ങളിലൂടെ ഭീഷണിപ്പെടുത്തിയെന്ന കേസിൽ അർജുൻ ആയങ്കിയുടെ ജാമ്യം റദ്ദാക്കാൻ പൊലീസ് നടപടി തുടങ്ങി. ജാമ്യ വ്യവസ്ഥകൾ ലംഘിച്ചതായി ചൂണ്ടിക്കാട്ടി കോതമംഗലം മജിസ്‌ട്രേറ്റ് കോടതിയിൽ പൊലീസ് റിപ്പോർട്ട് സമർപ്പിച്ചു എന്നാണ് ലഭിക്കുന്ന വിവരം.

സംഘടിത കുറ്റകൃത്യത്തിന് ഗൂഢാലോചന നടത്തിയെന്ന കേസിൽ അർജുൻ ആയങ്കി ഉൾപ്പെടെ ആറുപേരെ കഴിഞ്ഞ മാസം കോതമംഗലം പൊലീസ് അറസ്റ്റ് ചെയ്തിരുന്നു. പിന്നീട് ജാമ്യത്തിൽ പുറത്തിറങ്ങിയ ശേഷമാണ് കോതമംഗലം സിഐ പ്രശാന്തിനെ ലക്ഷ്യമിട്ട് സമൂഹമാധ്യമത്തിൽ വിവാദ പോസ്റ്റ് പ്രസിദ്ധീകരിച്ചതെന്നാണ് പൊലീസ് ആരോപണം.

പോസ്റ്റിൽ പൊലീസ് ഉദ്യോഗസ്ഥനെതിരെ ഭീഷണിസ്വഭാവമുള്ള പരാമർശങ്ങൾ നടത്തിയതായി കണ്ടെത്തിയതിനെ തുടർന്നാണ് ഐടി ആക്ട് ഉൾപ്പെടെയുള്ള വകുപ്പുകൾ പ്രകാരം പുതിയ കേസ് രജിസ്റ്റർ ചെയ്തത്. സംഭവത്തെ ജാമ്യ വ്യവസ്ഥകളുടെ ലംഘനമായി കണക്കാക്കിയാണ് പൊലീസ് കോടതിയെ സമീപിച്ചിരിക്കുന്നത്.

‘കോതമംഗലം സർക്കിൾ ഇൻസ്‌പെക്ടർക്ക് ഒരു തുറന്ന കത്ത്’ എന്ന രീതിയിലായിരുന്നു അർജുൻ ആയങ്കിയുടെ പോസ്റ്റ്. തനിക്കെതിരായ പൊലീസ് നടപടി പ്രതികാരപരമാണെന്ന ആരോപണവും പോസ്റ്റിൽ ഉന്നയിച്ചിരുന്നു. ഇതിലെ ചില പരാമർശങ്ങൾ ഭീഷണിയുടെയും പ്രകോപനത്തിന്റെയും സ്വഭാവമുള്ളതാണെന്നാണ് അന്വേഷണ സംഘത്തിന്റെ വിലയിരുത്തൽ.

അതേസമയം, കേസുമായി ബന്ധപ്പെട്ട തുടർനടപടികൾ കോടതിയുടെ പരിഗണനയിലാണെന്ന് പൊലീസ് അറിയിച്ചു. ജാമ്യം റദ്ദാക്കണമോയെന്ന കാര്യത്തിൽ കോടതി തീരുമാനം നിർണായകമാകും.