'ജനവിരുദ്ധമായി പ്രവർത്തിക്കുന്ന എല്ലാ ഭരണാധികാരികൾക്കുമുള്ള മുന്നറിയിപ്പാണീ ജനകീയ വിജയം'; ധർമേന്ദ്ര പ്രധാന്റെ രാജി രാജ്യചരിത്രത്തിലെ നിർണായക നിമിഷമെന്ന് പ്രിയങ്ക ഗാന്ധി

JULY 25, 2026, 8:20 AM

കൽപ്പറ്റ: നീറ്റ് ക്രമക്കേടുകൾക്കെതിരായ പ്രക്ഷോഭങ്ങൾക്കൊടുവിൽ കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവെച്ച സംഭവത്തിൽ പ്രതികരിച്ച് പ്രിയങ്ക ഗാന്ധി.

ജനവിരുദ്ധമായി പ്രവർത്തിക്കുന്ന എല്ലാ ഭരണാധികാരികൾക്കുമുള്ള ശക്തമായ മുന്നറിയിപ്പും പാഠവുമാണ് ഈ ജനകീയ വിജയമെന്ന് പ്രിയങ്ക പറഞ്ഞു.

ഇതൊരു ചരിത്ര ദിനമാണെന്നും രാജ്യത്തിന്റെ ചരിത്രത്തിലെ തന്നെ നിർണായക നിമിഷമാണിതെന്നും അവർ വിശേഷിപ്പിച്ചു. അടിച്ചമർത്തലുകൾക്കെതിരെ ഒരടിപോലും പിന്നോട്ട് പോകാതെ പോരാടിയ യുവാക്കളുടെയും വിദ്യാർത്ഥികളുടെയും വീരോചിതമായ വിജയമാണിത്.

രാജ്യത്തെ ജനകീയ ശക്തി വീണ്ടെടുത്ത ഈ ശുഭദിനത്തിൽ, ഭരണഘടനയെയും ജനാധിപത്യ സ്വാതന്ത്ര്യത്തെയും സ്നേഹിക്കുന്ന പ്രസ്ഥാനങ്ങളും പൊതുസമൂഹവും എന്നും വിദ്യാർത്ഥികൾക്കൊപ്പം നിലകൊള്ളുമെന്നും അവർ വ്യക്തമാക്കി.

വിദ്യാർത്ഥി പ്രക്ഷോഭത്തിന് നേരെ വലിയ രീതിയിലുള്ള പൊലീസ് അതിക്രമങ്ങളും കണ്ണീർവാതക പ്രയോഗങ്ങളും ഉണ്ടായിട്ടും അവർ ഭയപ്പെടാതെ ഉറച്ചുനിന്നു. തന്റെ സഹോദരൻ രാഹുൽ ഗാന്ധി ഉൾപ്പെടെയുള്ളവർ ഈ പോരാട്ടത്തിൽ അവർക്കൊപ്പം അടിയുറച്ചു നിന്നതിൽ അഭിമാനമുണ്ടെന്നും പ്രിയങ്ക കൂട്ടിച്ചേർത്തു.