പാലക്കാട്ട് വിദ്യാഭ്യാസ സ്ഥാപനങ്ങൾക്ക് ഇന്ന് അവധി; ചുഴലിക്കാറ്റ് മുന്നറിയിപ്പുമായി കാലാവസ്ഥാ വകുപ്പ്

OCTOBER 25, 2026, 9:51 AM

പാലക്കാട് ജില്ലയിൽ കനത്ത മഴ തുടരുന്ന സാഹചര്യത്തിൽ എല്ലാ വിദ്യാഭ്യാസ സ്ഥാപനങ്ങൾക്കും അവധി പ്രഖ്യാപിച്ചു. പ്രൊഫഷണൽ കോളേജുകൾ ഉൾപ്പെടെയുള്ള സ്ഥാപനങ്ങൾക്ക് അവധി ബാധകമാണെന്ന് ജില്ലാ കളക്ടർ അറിയിച്ചു. അങ്കണവാടികൾ, മദ്രസകൾ, ട്യൂഷൻ സെന്ററുകൾ, കോച്ചിങ് ക്ലാസുകൾ, സ്പെഷ്യൽ ക്ലാസുകൾ എന്നിവയ്ക്കും അവധിയായിരിക്കും.

മുൻകൂട്ടി നിശ്ചയിച്ച പരീക്ഷകൾക്ക് മാറ്റമില്ല. എല്ലാ സുരക്ഷാ ക്രമീകരണങ്ങളും ഉറപ്പാക്കി മുൻകൂട്ടി തീരുമാനിച്ച മേളകൾ നടത്തണമെന്ന് ജില്ലാ കളക്ടർ കെ. സുധീർ നിർദ്ദേശം നൽകി.

സംസ്ഥാനത്ത് വരും ദിവസങ്ങളിൽ മഴ ശക്തിപ്പെടുമെന്ന് കാലാവസ്ഥാ വകുപ്പ് മുന്നറിയിപ്പ് നൽകി. തെക്കുകിഴക്കൻ അറബിക്കടലിലും കേരള തീരത്തും ഒരു ന്യൂനമർദം നിലനിൽക്കുന്നുണ്ട്. ഈ ന്യൂനമർദവുമായി ബന്ധപ്പെട്ട ചക്രവാതച്ചുഴിയിൽ നിന്ന് കേരളത്തിലൂടെ വടക്കൻ തമിഴ്‌നാട് തീരം വരെ ന്യൂനമർദ പാത്തി ട്രഫ് സ്ഥിതിചെയ്യുന്നതായും കേന്ദ്ര കാലാവസ്ഥാ വകുപ്പ് അറിയിച്ചു.

മധ്യ ബംഗാൾ ഉൾക്കടലിലും തെക്കുകിഴക്കൻ ബംഗാൾ ഉൾക്കടലിലും ഒരു തീവ്രന്യൂനമർദം നിലനിൽക്കുന്നു. ഇത് അതിതീവ്ര ന്യൂനമർദമായി മാറാൻ സാധ്യതയുണ്ട്. തിങ്കളാഴ്ച രാവിലെ മധ്യബംഗാൾ ഉൾക്കടലിലും അതിനോട് ചേർന്നുള്ള മധ്യപടിഞ്ഞാറൻ ബംഗാൾ ഉൾക്കടലിലും ഇത് ചുഴലിക്കാറ്റായി രൂപാന്തരപ്പെടാൻ സാധ്യതയുണ്ടെന്നും മുന്നറിയിപ്പിൽ പറയുന്നു.

ചൊവ്വാഴ്ച രാവിലെ ഇത് മധ്യപടിഞ്ഞാറൻ ബംഗാൾ ഉൾക്കടലിൽ ഒരു ശക്തമായ ചുഴലിക്കാറ്റായി മാറാനും തുടർന്ന് വടക്കുപടിഞ്ഞാറൻ ദിശയിലേക്ക് നീങ്ങാനും സാധ്യതയുണ്ട്. ഇത് കൂടുതൽ ശക്തിപ്രാപിച്ച് അതിശക്തമായ ചുഴലിക്കാറ്റായി മാറും. ഒക്ടോബർ 28-ന് രാവിലെ ആന്ധ്രാപ്രദേശ് തീരത്തിന് സമീപമുള്ള മധ്യപടിഞ്ഞാറൻ ബംഗാൾ ഉൾക്കടലിൽ എത്തിച്ചേരുമെന്നും പ്രവചിക്കുന്നു.

ഉച്ചയ്ക്ക് മുമ്പ് ആന്ധ്രാപ്രദേശ്–യാനം തീരങ്ങൾക്കിടയിലൂടെ ബാപട്‌ലക്കും വിശാഖപട്ടണത്തിനും ഇടയിലായി, മണിക്കൂറിൽ 115–125 കിലോമീറ്ററും പരമാവധി 140 കിലോമീറ്റർ വേഗതയും കൈവരിക്കുന്ന അതിശക്തമായ ചുഴലിക്കാറ്റായി കരയിൽ പ്രവേശിക്കാൻ സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പിൽ വ്യക്തമാക്കുന്നു.

English Summary: All educational institutions in Palakkad district including professional colleges have been declared a holiday due to heavy rain. The district collector announced the holiday, which also applies to anganwadis, madrassas, tuition centers, coaching classes and special classes. Pre-scheduled examinations will proceed as planned, and fairs should be organized with full safety precautions. The India Meteorological Department has warned of heavy rain across the state in the coming days, with a low-pressure area over the southeast Arabian Sea and Kerala coast. A deep depression is located over the central and southeast Bay of Bengal, expected to intensify into a severe cyclonic storm by Saturday, a cyclonic storm by Monday morning, and a very severe cyclonic storm by Tuesday morning. This system is likely to move northwestwards, further intensify, and cross the Andhra Pradesh-Yanam coasts between Bapatla and Visakhapatnam around October 28 morning, with winds gusting up to 140 kmph.

Tags: Malayalam News, News Malayalam, Latest Malayalam News, Vachakam News, Palakkad Holiday, Kerala Rain, Cyclone Warning, Bay of Bengal Cyclone, Weather Alert, Educational Institution Holiday, മഴ മുന്നറിയിപ്പ്, പാലക്കാട് അവധി, ചുഴലിക്കാറ്റ്

ചിത്രം: Vaishakh.sukumar, CC BY-SA 4.0, via Wikimedia Commons