നെയ്യാറ്റിൻകര യുവാവിന്റെ കൊലപാതകം: അച്ഛനും മക്കളുമടക്കം നാല് പേർ കസ്റ്റഡിയിൽ

JULY 5, 2026, 9:49 PM

തിരുവനന്തപുരം: നെയ്യാറ്റിൻകരയിൽ യുവാവ് കൊല്ലപ്പെട്ട സംഭവത്തിൽ അച്ഛനും മക്കളുമുൾപ്പെടെ നാല് പേരെ പൊലീസ് കസ്റ്റഡിയിലെടുത്തു.

ആലുനിന്നകുഴി സ്വദേശി ബിജു, മക്കളായ അമ്പാടി, മിഥുൻ, അമ്പാടിയുടെ സുഹൃത്ത് എന്നിവരാണ് പൊലീസ് കസ്റ്റഡിയിലുള്ളത്. ആക്രമണം നടത്തിയതാരെന്നത് സംബന്ധിച്ച് അന്വേഷണം തുടരുകയാണ്. കസ്റ്റഡിയിലുള്ളവരുടെ അറസ്റ്റ് ഉടൻ രേഖപ്പെടുത്തുമെന്നാണ് വിവരം.

ബൈക്ക് റേസിനെ ചൊല്ലിയ തർക്കം കൊലപാതകത്തിൽ കലാശിക്കുകയായിരുന്നു. നെയ്യാറ്റിൻകര സ്വദേശി മനോജ് ആണ് ആക്രമണത്തിൽ കൊല്ലപ്പെട്ടത്. ബിജുവിന്റെ മകനെ കാണാനെത്തിയ സുഹൃത്ത് വീടിന് മുന്നിൽ ബൈക്ക് റേസ് നടത്തിയതിനെ ചൊല്ലിയായിരുന്നു തർക്കത്തിന്റെ തുടക്കം. മനോജും സംഭവത്തിൽ ഇടപെട്ടതോടെ വാക്കേറ്റം രൂക്ഷമാവുകയും പിന്നീട് കയ്യാങ്കളിയിലേക്ക് മാറുകയും ചെയ്തു. ഇതിനിടെയുണ്ടായ ആക്രമണത്തിലാണ് മനോജിന് മാരകമായി പരിക്കേറ്റത്.