കൂടത്തായി കേസ്: വിസ്താരത്തിനിടെ അന്വേഷണ ഉദ്യോഗസ്ഥന് ദേഹാസ്വാസ്ഥ്യം

JULY 31, 2026, 6:13 AM

കോഴിക്കോട്: കൂടത്തായി കൊലപാതക പരമ്പരയിലെ പ്രധാന കേസായ റോയ് തോമസ് വധക്കേസിന്റെ വിചാരണയ്ക്കിടെ അന്വേഷണ ഉദ്യോഗസ്ഥൻ ആർ. ഹരിദാസന് ദേഹാസ്വാസ്ഥ്യം അനുഭവപ്പെട്ടു. വിസ്താരത്തിനിടയിലെ ഇടവേളയിൽ അസ്വസ്ഥത അനുഭവപ്പെട്ടതിനെ തുടർന്ന് അദ്ദേഹത്തെ ആശുപത്രിയിലേക്ക് മാറ്റി. ആരോഗ്യനില സംബന്ധിച്ച കൂടുതൽ വിവരങ്ങൾ പുറത്തുവന്നിട്ടില്ല.

അതേസമയം റോയ് തോമസ് വധക്കേസിന്റെ അന്തിമഘട്ട വിചാരണയാണ് നിലവിൽ നടക്കുന്നത്. കേസിൽ ഇതുവരെ 130-ലധികം സാക്ഷികളുടെ മൊഴി രേഖപ്പെടുത്തിയിട്ടുണ്ട്. ജോളി പ്രതിയായ വിവിധ കേസുകളിൽ ആദ്യം വിധി വരാൻ സാധ്യതയുള്ളത് ഈ കേസിലാണെന്നാണ് നിയമവൃത്തങ്ങൾ സൂചിപ്പിക്കുന്നത്.

2011 സെപ്റ്റംബറിലാണ് റോയ് തോമസ് മരിച്ചത്. വിഷം നൽകി ഭർത്താവിനെ കൊലപ്പെടുത്തിയെന്നാണ് ജോളിക്കെതിരായ കേസ്. ഈ കേസാണ് പിന്നീട് പുറത്തുവന്ന കൂടത്തായി കൊലപാതക പരമ്പരയിലെ നിർണായക അന്വേഷണങ്ങൾക്ക് വഴിവെച്ചത്.

2019-ലാണ് കൂടത്തായി പൊന്നാമറ്റം കുടുംബത്തിലെ തുടർച്ചയായ മരണങ്ങൾ സംസ്ഥാനതലത്തിൽ വലിയ ചർച്ചയായത്. 2002 മുതൽ 2016 വരെ ഒരേ കുടുംബത്തിലെ ആറുപേർ ദുരൂഹ സാഹചര്യത്തിൽ മരിച്ചതോടെയാണ് സംഭവങ്ങൾ വീണ്ടും അന്വേഷണ വിധേയമായത്.

അന്വേഷണത്തിൽ ആദ്യം സംശയിക്കപ്പെട്ടത് വിരമിച്ച അധ്യാപിക അന്നമ്മ തോമസിന്റെ മരണമായിരുന്നു. തുടർന്ന് ഭർത്താവ് ടോം തോമസ്, മകൻ റോയ് തോമസ്, അന്നമ്മയുടെ സഹോദരൻ എം.എം. മാത്യു, ഷാജുവിന്റെ മകൾ ആൽഫൈൻ, ഭാര്യ ഫിലി എന്നിവരുടെ മരണങ്ങളും വിശദമായി പരിശോധിച്ചു.

സ്‌പെഷ്യൽ ബ്രാഞ്ച് ഉദ്യോഗസ്ഥൻ തയ്യാറാക്കിയ റിപ്പോർട്ടിന്റെ അടിസ്ഥാനത്തിൽ അന്വേഷണം ശക്തമാക്കിയ പൊലീസ്, ഈ മരണങ്ങൾ സ്വാഭാവികമല്ലെന്നും ആസൂത്രിത കൊലപാതകങ്ങളാണെന്നുമുള്ള നിഗമനത്തിലെത്തി. തുടർന്ന് വിവിധ കേസുകൾ രജിസ്റ്റർ ചെയ്ത് അന്വേഷണം മുന്നോട്ടുകൊണ്ടുപോയതോടെയാണ് കൂടത്തായി കേസ് രാജ്യശ്രദ്ധ നേടിയത്.