തൃശൂർ വെടിക്കെട്ട് അപകടം; ഗുരുതരമായി പരിക്കേറ്റ നാലുപേരുടെ ആരോഗ്യനില മാറ്റമില്ലാതെ തുടരുന്നു; വീണ്ടും മനുഷ്യ ശരീരാവശിഷ്ടങ്ങൾ കണ്ടെത്തി

APRIL 23, 2026, 11:45 PM

തൃശൂർ: മുണ്ടത്തിക്കോട് വെടിക്കെട്ട് അപകടത്തിൽ ഗുരുതരമായി പരിക്കേറ്റ നാലുപേരുടെ ആരോഗ്യനില മാറ്റമില്ലാതെ തുടരുന്നു. ബാബു, സതീഷ്, രാജേഷ്, വിഷ്ണു എന്നിവരാണ് അതിതീവ്ര പരിചരണ വിഭാഗത്തിൽ കഴിയുന്നത്. ഇതിൽ സതീഷ് വെന്റിലേറ്ററിലാണ്.

ഇതിനിടെ, അപകട സ്ഥലത്ത് നിന്ന് വീണ്ടും മനുഷ്യ ശരീരാവശിഷ്ടങ്ങൾ കണ്ടെത്തി. ഇന്ന് നടത്തിയ പരിശോധനയിലാണ് അവ ലഭിച്ചത്. കണ്ടെത്തിയ അവശിഷ്ടങ്ങൾ ആശുപത്രിയിലേക്ക് മാറ്റി. പൊലീസും കെടാവർ നായയും ചേർന്നുള്ള പരിശോധന സ്ഥലത്ത് തുടരുകയാണ്.

അപകടം നടന്ന സ്ഥലത്ത് നിന്ന് ഇതുവരെ 103 ശരീരാവശിഷ്ടങ്ങളാണ് കണ്ടെത്തിയത്. മരിച്ചവരിൽ 10 പേരിൽ ഒൻപത് പേരുടെ പോസ്റ്റ്മോർട്ടം പൂർത്തിയാക്കി മൃതദേഹങ്ങൾ ബന്ധുക്കൾക്ക് കൈമാറിയിട്ടുണ്ട്. ഒരാളുടെ മൃതദേഹം ഇതുവരെ തിരിച്ചറിയാൻ കഴിഞ്ഞിട്ടില്ല.

മൊത്തം 37 പേരാണ് ദുരന്തത്തിൽപ്പെട്ടത്. സ്ഥലത്ത് നിന്ന് മൊബൈൽ ഫോണുകളും കണ്ടെത്തിയിരുന്നു. അന്വേഷണം വേഗത്തിൽ പൂർത്തിയാക്കുമെന്ന് കമ്മീഷണർ അറിയിച്ചു. കൂടാതെ, 300 കിലോ സ്‌ഫോടക വസ്തുക്കൾ ഇനിയും അവശേഷിക്കുന്നുണ്ടെന്നും അവ സുരക്ഷിത സ്ഥലത്തേക്ക് മാറ്റുമെന്നും അദ്ദേഹം വ്യക്തമാക്കി. കോടതി നിർദേശ പ്രകാരം ഈ സ്‌ഫോടക വസ്തുക്കൾ നിർവീര്യമാക്കും.

ഏപ്രിൽ 21ന് ഉച്ചയ്ക്ക് ശേഷമാണ് മുണ്ടത്തിക്കോട് പടക്കപ്പുരയിൽ വൻ സ്ഫോടനം ഉണ്ടായത്. തൃശൂർ പൂരം ഒരുക്കങ്ങളുടെ ഭാഗമായി തിരുവമ്പാടിക്ക് വേണ്ടിയുള്ള വെടിക്കെട്ട് സാമഗ്രികൾ നിർമ്മിക്കുന്ന സ്ഥലത്തായിരുന്നു അപകടം. 14 പേർക്കാണ് ദുരന്തത്തിൽ ജീവൻ നഷ്ടമായത്.