ആരോഗ്യ വകുപ്പ് കൂടുതൽ “കല്ലേറ്” കിട്ടുന്ന വകുപ്പ്: കെ. മുരളീധരൻ

JUNE 9, 2026, 1:16 AM

കോഴിക്കോട്: എത്ര പ്രവർത്തിച്ചാലും കൂടുതൽ കല്ലേറ് കിട്ടുന്ന വകുപ്പ് ആരോഗ്യ വകുപ്പാണെന്ന് മന്ത്രി കെ. മുരളീധരൻ. വയനാട് മെഡിക്കൽ കോളേജ് ചിലരുടെ വാശിക്ക് തുടങ്ങിയതുപോലെയാണെന്നും, വികസനത്തിന് ആവശ്യമായ സ്ഥലം ലഭ്യമല്ലെന്നും അദ്ദേഹം പറഞ്ഞു. ചുറ്റുമുള്ളത് വനഭൂമിയായതിനാൽ വനംവകുപ്പിൽ നിന്ന് സ്ഥലം ലഭിക്കുന്നതിൽ വലിയ പ്രതിസന്ധിയുണ്ടെന്നും മന്ത്രി വ്യക്തമാക്കി.

മെഡിക്കൽ കോളേജുകളിൽ രോഗികളെ നിലത്ത് കിടത്തരുതെന്ന് നിർദേശിച്ചിട്ടുണ്ടെങ്കിലും അത് ഒരു ദിവസം കൊണ്ട് നടപ്പാക്കാൻ കഴിയില്ലെന്ന് മന്ത്രി പറഞ്ഞു. താഴെത്തട്ടിലെ ആശുപത്രികൾ ശക്തിപ്പെടുത്തേണ്ടതിന്റെ ആവശ്യകതയും അദ്ദേഹം ചൂണ്ടിക്കാട്ടി. ആരോഗ്യ മേഖലയെ സ്വകാര്യവത്കരിക്കുന്നു എന്ന പ്രചാരണം വാസ്തവ വിരുദ്ധമാണെന്നും അദ്ദേഹം പറഞ്ഞു.

കോഴിക്കോട് നടന്ന ‘കായകൽപ്പം’ ജനസമ്പർക്ക പരിപാടിയിലാണ് മന്ത്രി സംസാരിച്ചത്. ആശുപത്രി വികസനത്തിന് സിഎസ്ആർ ഫണ്ട് ഉപയോഗിക്കണമെന്ന നിർദേശത്തെ തെറ്റായി വ്യാഖ്യാനിച്ചുവെന്നും, അത് സ്വകാര്യ ആശുപത്രികളെ സഹായിക്കാനാണെന്ന പ്രചാരണം ശരിയല്ലെന്നും അദ്ദേഹം പറഞ്ഞു.

സ്വകാര്യവത്കരണം നടത്തുകയാണെങ്കിൽ തനിക്ക് വകുപ്പിൽ തുടരാനാകുമോയെന്നും മന്ത്രി ചോദിച്ചു. പരാതികൾ വന്നാൽ പരിശോധിച്ച് ശരിയാണെങ്കിൽ നടപടിയെടുക്കുമെന്നും അദ്ദേഹം വ്യക്തമാക്കി. വൻ സാമ്പത്തിക ബാധ്യതയോടെയാണ് വകുപ്പ് ഏറ്റെടുത്തതെന്നും മന്ത്രി പറഞ്ഞു.

മുൻ മന്ത്രി മുഹമ്മദ് റിയാസ് പരിപാടിയിൽ പങ്കെടുക്കാത്തതിനെക്കുറിച്ചും മന്ത്രി വിമർശനം ഉന്നയിച്ചു. പഴയ കണക്കുകൾ പുറത്തുവരുമെന്ന ഭയത്തിലാണ് അദ്ദേഹം വരാതിരുന്നതെന്ന് മന്ത്രി ആരോപിച്ചു. ആരോഗ്യ മേഖലയിൽ ഭരണപരമായ മാറ്റങ്ങൾ അനിവാര്യമാണെന്നും, സ്ഥലംമാറ്റ വിഷയത്തിൽ സമരങ്ങൾക്കും പ്രതിഷേധങ്ങൾക്കും വഴങ്ങില്ലെന്നും അദ്ദേഹം വ്യക്തമാക്കി.

കഴിഞ്ഞ സർക്കാരിന്റെ കാലത്ത് സമരങ്ങൾ കണ്ടില്ലല്ലോ എന്നും മന്ത്രി പറഞ്ഞു. ആരോഗ്യ മേഖലയിലെ വെല്ലുവിളികളും പ്രതിസന്ധികളും നേരിട്ട് മനസ്സിലാക്കി പരിഹരിക്കുകയെന്ന ലക്ഷ്യത്തോടെയാണ് ‘കായകൽപ്പം’ ജനസമ്പർക്ക പരിപാടി നടത്തുന്നതെന്നും മന്ത്രി അറിയിച്ചു.