‘മോഷണം ഭയന്ന് മാളുകൾ അടയ്ക്കുമോ?’; നീറ്റ് പരീക്ഷയ്ക്ക് മുന്നോടിയായ ടെലഗ്രാം നിയന്ത്രണത്തെ പരിഹസിച്ച് കമ്പനി

JUNE 17, 2026, 1:18 AM

ഡൽഹി: നീറ്റ് പുനഃപരീക്ഷയ്ക്ക് മുന്നോടിയായി രാജ്യത്ത് ടെലഗ്രാമിന് ഏർപ്പെടുത്തിയ താൽക്കാലിക നിയന്ത്രണത്തെ പരിഹസിച്ച് ടെലഗ്രാം രംഗത്ത്. ടെലഗ്രാം പ്രവർത്തനം പരിമിതപ്പെടുത്തിയ കേന്ദ്ര സർക്കാരിന്റെ നടപടിക്കെതിരെ ഉയർന്ന വിമർശനങ്ങൾക്കിടെയാണ് കമ്പനിയുടെ ഔദ്യോഗിക എക്‌സ് അക്കൗണ്ടിൽ നിന്നുള്ള പ്രതികരണം ശ്രദ്ധ നേടിയത്.

ടെലഗ്രാം നിയന്ത്രണത്തെ വിമർശിച്ച് കോൺഗ്രസ് എംപി കാർത്തി ചിദംബരം എക്‌സിൽ പങ്കുവെച്ച പോസ്റ്റിന് താഴെയായിരുന്നു ടെലഗ്രാമിന്റെ പരിഹാസ കമന്റ്. “മോഷണം നടക്കാൻ സാധ്യതയുള്ളതിനാൽ എല്ലാ ഷോപ്പിങ് മാളുകളും അടച്ചിടൂ, വാഹനങ്ങൾ അമിതവേഗത്തിൽ ഓടിക്കുന്നതിനാൽ റോഡുകളും അടച്ചിടൂ” എന്നായിരുന്നു കമ്പനിയുടെ പ്രതികരണം.

“ടെലഗ്രാം നിരോധിക്കുന്നതാണോ നീറ്റ് പരീക്ഷാ ചോദ്യപേപ്പർ ചോർച്ച തടയാനുള്ള മാസ്റ്റർ സ്‌ട്രോക്ക്?” എന്ന ചോദ്യമാണ് കാർത്തി ചിദംബരം തന്റെ പോസ്റ്റിലൂടെ ഉയർത്തിയത്.

അതേസമയം, ടെലഗ്രാമിന്റെ സ്ഥാപകനായ പാവൽ ദുരോവും വിഷയത്തിൽ പ്രതികരിച്ചു. ദശലക്ഷക്കണക്കിന് സാധാരണ ഉപയോക്താക്കളെ ബാധിക്കുന്ന നടപടിയാണിതെന്നും യഥാർഥ പ്രശ്നത്തെ അഭിമുഖീകരിക്കാതെ സ്വീകരിച്ച തീരുമാനമാണിതെന്നും അദ്ദേഹം വിമർശിച്ചു.

ടെലഗ്രാമിന് നിയന്ത്രണം ഏർപ്പെടുത്തിയാലും ചോദ്യപേപ്പർ ചോർച്ച അവസാനിക്കില്ലെന്ന് പാവൽ ദുരോവ് അഭിപ്രായപ്പെട്ടു. പരീക്ഷാ സംവിധാനത്തിനുള്ളിൽ നിന്നുള്ളവർക്ക് മറ്റ് പ്ലാറ്റ്ഫോമുകൾ ഉപയോഗിച്ച് ഇത്തരം പ്രവർത്തനങ്ങൾ തുടരാൻ കഴിയുമെന്നും അദ്ദേഹം ചൂണ്ടിക്കാട്ടി. ഇന്ത്യയിലെ 150 ദശലക്ഷത്തിലധികം ഉപയോക്താക്കളെയാണ് ഈ നടപടി ബാധിക്കുന്നതെന്നും അദ്ദേഹം എക്‌സിൽ കുറിച്ചു.

നീറ്റ് പുനഃപരീക്ഷയ്ക്ക് മുന്നോടിയായാണ് കേന്ദ്ര ഐടി മന്ത്രാലയം രാജ്യവ്യാപകമായി ടെലഗ്രാമിന്റെ പ്രവർത്തനത്തിന് നിയന്ത്രണം ഏർപ്പെടുത്താൻ നിർദേശം നൽകിയത്. ജൂൺ 22 വരെയാണ് നിയന്ത്രണം നിലവിലുള്ളത്. തട്ടിപ്പ് സംഘങ്ങൾ ടെലഗ്രാം ദുരുപയോഗം ചെയ്യുന്നത് തടയാനാണ് നടപടിയെന്നാണ് നാഷണൽ ടെസ്റ്റിംഗ് ഏജൻസി (എൻടിഎ) വ്യക്തമാക്കിയത്.

ഇതിനൊപ്പം, ജൂൺ 30 വരെ ടെലഗ്രാമിലെ സന്ദേശങ്ങൾ തിരുത്താനുള്ള (Message Edit) സൗകര്യത്തിനും നിയന്ത്രണം ഏർപ്പെടുത്തുമെന്ന് കേന്ദ്ര സർക്കാർ അറിയിച്ചു. പരീക്ഷാ ചോദ്യപേപ്പർ ചോർച്ചയുമായി ബന്ധപ്പെട്ട് വ്യാജ തെളിവുകൾ സൃഷ്ടിക്കാൻ ഈ ഫീച്ചർ ഉപയോഗിക്കുന്നതായി കണ്ടെത്തിയെന്നാണ് എൻടിഎയുടെ വിശദീകരണം.

ചാനൽ അഡ്മിന്മാർക്ക് പഴയ സന്ദേശങ്ങൾ തിരുത്താൻ കഴിയുന്നതിനാൽ, പരീക്ഷ കഴിഞ്ഞ ശേഷം ചോദ്യപേപ്പറുകൾ ചേർത്ത് പഴയ പോസ്റ്റുകൾ എഡിറ്റ് ചെയ്ത് തെറ്റിദ്ധാരണ സൃഷ്ടിക്കാൻ സാധ്യതയുണ്ടെന്നും എൻടിഎ ചൂണ്ടിക്കാട്ടി.

ജൂൺ 21-നാണ് നീറ്റ് പുനഃപരീക്ഷ നടക്കുന്നത്. മുൻപ് നടന്ന നീറ്റ് പരീക്ഷയിലെ ചോദ്യപേപ്പർ ചോർച്ച ആരോപണത്തെ തുടർന്ന് രാജ്യവ്യാപക പ്രതിഷേധങ്ങൾ ഉയർന്നിരുന്നു. സംഭവത്തിന്റെ ഉത്തരവാദിത്വം ഏറ്റെടുത്ത് കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവെക്കണമെന്ന് ആവശ്യപ്പെട്ടും വിവിധ വിദ്യാർഥി സംഘടനകളും രാഷ്ട്രീയ പാർട്ടികളും രംഗത്തെത്തിയിരുന്നു.