ദുബായ്: ലോകത്തിന്റെ വിവിധ ഭാഗങ്ങളില് കഴിയുന്ന മലയാളി പ്രവാസികളുടെ ആരോഗ്യ സുരക്ഷ മുന്നിര്ത്തി നോര്ക്ക റൂട്ട്സ് നടപ്പിലാക്കുന്ന സമഗ്ര ഇന്ഷുറന്സ് പദ്ധതിയായ നോര്ക്ക കെയര് പ്ലസ് പോളിസിയിലേക്ക് ഓഗസ്റ്റ് 18 മുതല് അപേക്ഷിക്കാം. പൊതുമേഖലാ ഇന്ഷുറന്സ് സ്ഥാപനമായ യുനൈറ്റഡ് ഇന്ത്യ ഇന്ഷുറന്സുമായി സഹകരിച്ചാണ് ഈ പദ്ധതി ആവിഷ്കരിച്ചിരിക്കുന്നത്. പ്രവാസികള്ക്കും അവരുടെ കുടുംബങ്ങള്ക്കും അടിയന്തര വൈദ്യസഹായവും അപകട സുരക്ഷയും ഉറപ്പാക്കുന്ന രീതിയിലാണ് പദ്ധതി രൂപകല്പന ചെയ്തിരിക്കുന്നത്. സെപ്റ്റംബര് 18 വരെയുള്ള ഒരു മാസക്കാലയളവിലാണ് പുതിയ അംഗങ്ങള്ക്ക് എന്റോള് ചെയ്യാനുള്ള സൗകര്യം ലഭ്യമാകുന്നത്.
അഞ്ചു ലക്ഷം രൂപ മുതല് ഒരു കോടി രൂപ വരെയുള്ള ഏഴ് വ്യത്യസ്ത സ്ലാബുകളിലായി പദ്ധതി ലഭ്യമാണ്. തിരഞ്ഞെടുത്ത ഇന്ഷുറന്സ് തുകയ്ക്കും കവറേജിനും അനുസൃതമായാണ് പ്രീമിയം തുക നിശ്ചയിച്ചിട്ടുള്ളത്. പോളിസി ഉടമയുടെ കുടുംബത്തിനും പദ്ധതിയിലൂടെ സംരക്ഷണം ലഭിക്കും. പത്തു ലക്ഷം രൂപ മുതലുള്ള ഉയര്ന്ന സ്ലാബുകള് തിരഞ്ഞെടുക്കുന്നവര്ക്ക് പോളിസി ഉടമയുടെയോ പങ്കാളിയുടെയോ 80 വയസ്സുവരെയുള്ള മാതാപിതാക്കളെ പദ്ധതിയില് ഉള്പ്പെടുത്താമെന്നത് വലിയ ആശ്വാസമാണ്. 18 മുതല് 70 വയസ്സുവരെയുള്ള, സാധുവായ നോര്ക്ക പ്രവാസി ഐ.ഡിയോ സ്റ്റുഡന്റ് ഐ.ഡിയോ ഉള്ള കേരളീയരായ പ്രവാസികള്ക്കാണ് എന്റോള് ചെയ്യാന് അര്ഹതയുള്ളത്.
കേരളത്തിലെ 688 ആശുപത്രികള് അടക്കം രാജ്യത്തുടനീളമുള്ള 24,000-ത്തോളം പ്രമുഖ ആശുപത്രികളില് പദ്ധതി വഴി ക്യാഷ്ലെസ് ചികിത്സാ സൗകര്യം ലഭ്യമാണ്. പൂര്ണ്ണമായും പാരദര്ശകമായി നടപ്പിലാക്കുന്ന പദ്ധതിയില് ക്ലെയിം തീര്പ്പാക്കല് നിരക്ക് 99.38 ശതമാനമാണ്. ഇതിനോടകം 31,660 പോളിസി ഉടമകള്ക്കായി 227 കോടി രൂപ ക്ലെയിം ഇനത്തില് കൈമാറിയിട്ടുണ്ട്.
ലോകത്താകമാനമുള്ള 40 ലക്ഷത്തിലധികം മലയാളി പ്രവാസികളില് ഒരു ലക്ഷത്തി അറുപതിനായിരത്തോളം പേര് മാത്രമാണ് നിലവില് ഇത്തരം സുരക്ഷാ പദ്ധതികളുടെ ഭാഗമായിട്ടുള്ളത്. രോഗബാധയോ മറ്റ് അപകടങ്ങളോ ഉണ്ടാകുമ്പോള് സാമ്പത്തിക പ്രതിസന്ധി ഒഴിവാക്കാന് പരമാവധി പ്രവാസികള് ഓഗസ്റ്റ് 18 മുതല് ആരംഭിക്കുന്ന രജിസ്ട്രേഷന് പ്രയോജനപ്പെടുത്തി പദ്ധതിയില് അംഗങ്ങളാകണമെന്ന് അധികൃതര് ആഹ്വാനം ചെയ്യുന്നു. നോര്ക്കയുടെ ഔദ്യോഗിക വെബ്സൈറ്റായ www.norkaroots.kerala.gov.in വഴിയോ നോര്ക്ക കെയര് പ്ലസ് മൊബൈല് ആപ്പ് വഴിയോ പ്രവാസികള്ക്ക് രജിസ്ട്രേഷന് പൂര്ത്തിയാക്കാം.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20260718093504.jpg)
-20260603054738.jpg)
-20260615114222.jpg)
