സിബിഎസ്ഇ ഒൻപതാം ക്ലാസിൽ ത്രിഭാഷാ പദ്ധതി നിർബന്ധമാക്കുന്നതിൽ സുപ്രീം കോടതിക്ക് ആശങ്ക

JULY 16, 2026, 5:42 AM

ഡൽഹി: സിബിഎസ്ഇ പാഠ്യപദ്ധതിയിൽ ഒൻപതാം ക്ലാസ് മുതൽ മൂന്നാം ഭാഷ പഠനം നിർബന്ധമാക്കുന്നതിൽ ആശങ്ക പ്രകടിപ്പിച്ച് സുപ്രീം കോടതി. ബോർഡ് പരീക്ഷയ്ക്ക് തയ്യാറെടുക്കുന്ന വിദ്യാർത്ഥികൾക്ക് ഇത് അനാവശ്യ മാനസിക സമ്മർദം സൃഷ്ടിക്കുമെന്ന് ജസ്റ്റിസ് ബി.വി. നാഗരത്‌ന നിരീക്ഷിച്ചു.

തമിഴ്നാട്ടിലെ എല്ലാ ജില്ലകളിലും ജവഹർ നവോദയ വിദ്യാലയങ്ങൾ സ്ഥാപിക്കണമെന്ന മദ്രാസ് ഹൈക്കോടതി ഉത്തരവിനെതിരെ തമിഴ്നാട് സർക്കാർ നൽകിയ അപ്പീൽ പരിഗണിക്കവെയായിരുന്നു കോടതിയുടെ പരാമർശം. നവോദയ വിദ്യാലയങ്ങളിലെ ത്രിഭാഷാ നയത്തെ എതിർത്താണ് തമിഴ്നാട് സർക്കാർ സംസ്ഥാനത്ത് ഇത്തരം സ്കൂളുകൾ സ്ഥാപിക്കുന്നതിനെതിരെ നിലപാട് സ്വീകരിച്ചിരിക്കുന്നത്.

കേസിൽ സിബിഎസ്ഇയുടെ ഭാഷാനയം നേരിട്ട് വിഷയമായിരുന്നില്ലെങ്കിലും, മൂന്നാം ഭാഷ പഠിപ്പിക്കേണ്ട പ്രായത്തെക്കുറിച്ച് ജസ്റ്റിസ് നാഗരത്‌ന നിർണായക അഭിപ്രായം രേഖപ്പെടുത്തി.

"ഒൻപതാം ക്ലാസിൽ പുതിയൊരു ഭാഷ തുടങ്ങുന്നത് ശരിയായ രീതിയല്ല. ബോർഡ് പരീക്ഷയുടെ സമ്മർദമുള്ള ഘട്ടമാണത്. മൂന്നാം ഭാഷ ആറാം ക്ലാസ് മുതൽ തന്നെ ആരംഭിക്കണം."

1970-കളിലെ തന്റെ സ്കൂൾ വിദ്യാഭ്യാസം ഓർമ്മിച്ച ജസ്റ്റിസ് നാഗരത്‌ന, അന്നുതന്നെ എട്ടാം ക്ലാസ് അവസാനത്തോടെ പരീക്ഷാ സമ്മർദം അനുഭവപ്പെട്ടിരുന്നുവെന്നും, ഇന്നത്തെ കുട്ടികൾക്ക് അത് കൂടുതൽ കടുത്തതാണെന്നും പറഞ്ഞു.

മൂന്നാം ഭാഷയായി ഹിന്ദി തന്നെ പഠിക്കണമെന്ന നിർബന്ധം എവിടെയും ഇല്ലെന്നും കോടതി വ്യക്തമാക്കി. പ്രാദേശിക ഭാഷയും ഇംഗ്ലീഷും കൂടാതെ ഏതെങ്കിലും ഒരു മൂന്നാം ഭാഷ പഠിക്കണമെന്നാണ് നയം. അത് ഹിന്ദിയോ സംസ്കൃതമോ മറ്റ് ഭാഷകളിലേതെങ്കിലും ആകാമെന്നും കോടതി ചൂണ്ടിക്കാട്ടി.

കേന്ദ്ര സർക്കാർ പദ്ധതികളോടുള്ള തമിഴ്നാടിന്റെ സമീപനത്തെയും സുപ്രീം കോടതി വിമർശിച്ചു. സംസ്ഥാനത്തിന് സ്വന്തം വിദ്യാഭ്യാസ നയം ഉണ്ടായിരിക്കാമെങ്കിലും, കേന്ദ്ര സർക്കാർ സ്കൂളുകൾ സ്ഥാപിക്കുന്നതിനെ എതിർക്കുന്നത് ശരിയല്ലെന്ന് കോടതി നിരീക്ഷിച്ചു.

തമിഴ്നാട്ടിൽ നവോദയ വിദ്യാലയങ്ങൾ സ്ഥാപിക്കുന്ന വിഷയത്തിൽ കേന്ദ്രവും സംസ്ഥാനവും തമ്മിലുള്ള ചർച്ചകൾ തുടരുകയാണെന്ന് കോടതി വ്യക്തമാക്കി. പുതിയതായി അധികാരത്തിലെത്തിയ ടിവികെ സർക്കാരിന് നിലപാട് വ്യക്തമാക്കാൻ സമയം അനുവദിച്ച കോടതി കേസ് ഓഗസ്റ്റ് 11-ലേക്ക് മാറ്റി.