എന്താണ് റെയിൽവേയിലെ RLWL ടിക്കറ്റുകൾ? കൺഫോം ആകാൻ എത്രത്തോളം സാധ്യതയുണ്ട്? അറിയേണ്ടതെല്ലാം

JUNE 17, 2026, 1:59 AM

ഇന്ത്യൻ റെയിൽവേയിൽ ട്രെയിൻ ടിക്കറ്റ് ബുക്ക് ചെയ്യുമ്പോൾ ലഭിക്കുന്ന വിവിധ വെയിറ്റിംഗ് ലിസ്റ്റുകളിൽ ഒന്നാണ് RLWL അഥവാ റിമോട്ട് ലൊക്കേഷൻ വെയിറ്റിംഗ് ലിസ്റ്റ്. സാധാരണ ജനറൽ വെയിറ്റിംഗ് ലിസ്റ്റിനെ അപേക്ഷിച്ച് ഇതിന്റെ നിയമങ്ങളും കൺഫർമേഷൻ സാധ്യതകളും വ്യത്യസ്തമാണ്.

എന്താണ് ആർ.എൽ.ഡബ്ല്യു.എൽ (RLWL)?

ട്രെയിൻ പുറപ്പെടുന്ന പ്രധാന സ്റ്റേഷനിൽ നിന്നല്ലാതെ, വഴിയിലുള്ള മറ്റേതെങ്കിലും പ്രധാന ഇന്റർമീഡിയറ്റ് സ്റ്റേഷനുകളിൽ (Remote Locations) നിന്ന് യാത്ര ആരംഭിക്കുന്നവർക്ക് വേണ്ടിയുള്ള പ്രത്യേക ക്വാട്ടയാണിത്. ട്രെയിൻ പുറപ്പെടുന്ന സ്റ്റേഷനിലെ യാത്രക്കാരുടെ റദ്ദാക്കലുകൾ (Cancellations) ഈ ടിക്കറ്റുകളെ ബാധിക്കില്ല. നിങ്ങൾ യാത്ര തിരിക്കുന്ന നിർദ്ദിഷ്ട റിമോട്ട് സ്റ്റേഷനിലെ ക്വാട്ടയിലുള്ള ആരെങ്കിലും ടിക്കറ്റ് റദ്ദാക്കിയാൽ മാത്രമേ നിങ്ങളുടെ RLWL ടിക്കറ്റുകൾ കൺഫോം ആകുകയുള്ളൂ.ഈ പ്രത്യേക ക്വാട്ടയിലെ സീറ്റുകളുടെ എണ്ണം താരതമ്യേന കുറവായതിനാൽ, ജനറൽ വെയിറ്റിങ് ലിസ്റ്റിനെ (GNWL) അപേക്ഷിച്ച് RLWL നമ്പറുകൾ മാറുന്നതിനുള്ള വേഗത വളരെ കുറവായിരിക്കും.

ടിക്കറ്റ് കൺഫോം ആകാൻ എത്രത്തോളം സാധ്യതയുണ്ട്?

RLWL ടിക്കറ്റുകൾ കൺഫോം ആകാൻ കൃത്യമായ ഫോർമുലകൾ ഇല്ലെങ്കിലും താഴെ പറയുന്ന ഘടകങ്ങൾ ഇതിനെ സ്വാധീനിക്കുന്നു:

RLWL വെയ്റ്റിംഗ് ലിസ്റ്റ് 1 മുതൽ 5 വരെയുള്ള താഴ്ന്ന നമ്പറുകളാണെങ്കിൽ അവ ആർ.എ.സി (RAC) ആകാനോ പൂർണ്ണമായി കൺഫോം ആകാനോ ഉയർന്ന സാധ്യതയുണ്ട്. എന്നാൽ ഉയർന്ന നമ്പറുകൾ മാറാറില്ല. യാത്രാ തീയതി അടുത്ത ദിവസങ്ങളിൽ പോലും ഈ ടിക്കറ്റുകൾ വളരെ പതുക്കെയേ മാറാറുള്ളൂ. എന്നാൽ പലപ്പോഴും ട്രെയിൻ പുറപ്പെടുന്നതിന് തൊട്ടുമുമ്പ് ചാർട്ട് തയ്യാറാക്കുമ്പോൾ (Chart Preparation) ഇവ പെട്ടെന്ന് കൺഫോം ആയേക്കാം.

യാത്രാ ക്ലാസ് (Sleeper/3AC/2AC), സീസൺ (ഉത്സവ കാലങ്ങൾ), റൂട്ടിന്റെ ഡിമാൻഡ്, പുറപ്പെടുന്നതിന് ശേഷിക്കുന്ന ദിവസങ്ങൾ എന്നിവ കൺഫർമേഷൻ സാധ്യതയെ സ്വാധീനിക്കും.

യാത്രക്കാർ ശ്രദ്ധിക്കേണ്ട കാര്യങ്ങൾ

യാത്രാ തീയതി അടുത്തിട്ടും നിങ്ങളുടെ RLWL നമ്പർ ഉയർന്ന നിലയിൽ തന്നെ തുടരുകയാണെങ്കിൽ, അവസാന നിമിഷത്തെ ബുദ്ധിമുട്ടുകൾ ഒഴിവാക്കാൻ മറ്റ് ട്രെയിനുകളോ ബദൽ യാത്രാ മാർഗ്ഗങ്ങളോ നോക്കുന്നതാണ് ബുദ്ധി.ബുക്കിംഗ് സമയത്ത് ലഭിക്കുന്ന 10 അക്ക PNR നമ്പർ ഉപയോഗിച്ച് വെയിറ്റിംഗ് ലിസ്റ്റിലെ മാറ്റങ്ങൾ കൃത്യമായി നിരീക്ഷിക്കുക.

ടിക്കറ്റ് പ്രവചന പ്ലാറ്റ്‌ഫോമുകൾ നൽകുന്ന വിവരങ്ങൾ ഏകദേശ സാധ്യതകൾ മാത്രമാണ്, അവയ്ക്ക് കൺഫർമേഷൻ ഉറപ്പുനൽകാൻ സാധിക്കില്ല. റെയിൽവേ ചാർട്ട് തയ്യാറാക്കുമ്പോൾ മാത്രമേ ടിക്കറ്റിന്റെ അന്തിമ സ്റ്റാറ്റസ് വ്യക്തമാകൂ.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്