'താൻ വീട്ടുതടങ്കലിലെന്ന് മമത ബാനർജി'; പോലീസുകാർ പുറത്തിറങ്ങാൻ അനുവദിക്കുന്നില്ലെന്ന് മമത

JULY 6, 2026, 12:06 AM

കൊൽക്കത്ത: പശ്ചിമ ബംഗാളിലെ ബാരൂയിപൂരിൽ ബലാത്സംഗത്തിനിരയായി കൊല്ലപ്പെട്ട 12 വയസ്സുകാരിയുടെ കുടുംബത്തെ സന്ദർശിക്കാൻ പൊലീസ് അനുവദിക്കുന്നില്ലെന്നും, തന്നെ വീട്ടുതടങ്കലിലാക്കിയിരിക്കുകയാണെന്നും ആരോപിച്ച് പശ്ചിമ ബംഗാൾ മുൻ മുഖ്യമന്ത്രി മമ്ത ബാനർജി രംഗത്തെത്തി.

ബിജെപി പ്രവർത്തകൻ പ്രതിയായ ഈ കേസ് സംസ്ഥാനത്ത് വലിയ പ്രതിഷേധത്തിന് വഴിവെച്ചിരിക്കുകയാണ്. പൊലീസ് തന്നെ വീട്ടിൽ നിന്ന് പുറത്തിറങ്ങാൻ അനുവദിക്കുന്നില്ലെന്ന് മമത ആരോപിച്ചു.

"ബാരൂയിപൂരിലെ സംഭവം അതീവ ഗുരുതരമായ നിലയിലേക്ക് മാറിയിരിക്കുകയാണ്. ജനങ്ങൾക്ക് ഇത് സഹിക്കാനാവില്ല. എന്റെ വീടിന് പുറത്ത് ആയിരക്കണക്കിന് പൊലീസ് ഉദ്യോഗസ്ഥരാണ് റോഡിന്റെ ഇരുവശത്തുമായി നിലയുറപ്പിച്ചിരിക്കുന്നത്. ഞങ്ങളെ വീട്ടുതടങ്കലിലാക്കിയിരിക്കുകയാണെന്നാണ് ഞാൻ മനസ്സിലാക്കുന്നത്. പൊലീസ് ഇത് ഔദ്യോഗികമായി അറിയിച്ചിട്ടില്ലെങ്കിലും നിലവിലെ സാഹചര്യം അതാണ്," എന്ന് മമത ബാനർജി പ്രതികരിച്ചു.

12 വയസ്സുകാരിയുടെ കൊലപാതകത്തെ തുടർന്ന് ബാരൂയിപൂർ മേഖലയിൽ വ്യാപക പ്രതിഷേധവും അക്രമസംഭവങ്ങളും അരങ്ങേറിയിരുന്നു.

സ്ഥിതിഗതികൾ നിയന്ത്രണവിധേയമാക്കുന്നതിനായി പ്രദേശത്ത് വൻ പൊലീസ് സന്നാഹത്തെ വിന്യസിച്ചിരിക്കുകയാണ്. സംഭവവുമായി ബന്ധപ്പെട്ട അന്വേഷണം തുടരുകയാണെന്നും കൂടുതൽ സുരക്ഷാ നടപടികൾ സ്വീകരിച്ചിട്ടുണ്ടെന്നും അധികൃതർ അറിയിച്ചു.