ലക്നൗവിൽ വൻ ദുരന്തം; കോച്ചിംഗ് സെന്ററിലുണ്ടായ തീപിടുത്തത്തിൽ 15 വിദ്യാർത്ഥികൾക്ക് ദാരുണാന്ത്യം

JUNE 22, 2026, 11:28 AM

ഉത്തർപ്രദേശിലെ ലക്നൗവിൽ അലിഗഞ്ചിലുണ്ടായ വൻ തീപിടുത്തത്തിൽ 15 വിദ്യാർത്ഥികൾക്ക് ദാരുണാന്ത്യം. അലിഗഞ്ചിലെ ഉഷ മെഹ്ത മാർഗിലുള്ള മൂന്ന് നില കെട്ടിടത്തിലാണ് തിങ്കളാഴ്ച ഉച്ചയോടെ തീപിടുത്തമുണ്ടായത്. ആനിമേഷൻ കോച്ചിംഗ് സെന്ററും പെറ്റ് ക്ലിനിക്കും പ്രവർത്തിച്ചിരുന്ന കെട്ടിടമാണ് അഗ്നിക്കിരയായത്.

കെട്ടിടത്തിൽ നിന്ന് കറുത്ത പുക ഉയരുന്നത് കണ്ടതോടെയാണ് നാട്ടുകാർ വിവരമറിഞ്ഞത്. നിമിഷങ്ങൾക്കുള്ളിൽ തീ കെട്ടിടത്തിന്റെ മുകൾനിലകളിലേക്ക് അതിവേഗം പടരുകയായിരുന്നു. കോച്ചിംഗ് ക്ലാസിൽ പങ്കെടുക്കുകയായിരുന്ന നിരവധി വിദ്യാർത്ഥികൾ കെട്ടിടത്തിനുള്ളിൽ കുടുങ്ങിപ്പോയി.

തീയും പുകയും നിറഞ്ഞതോടെ രക്ഷപ്പെടാനായി ചില വിദ്യാർത്ഥികൾ കെട്ടിടത്തിന്റെ ഒന്നാം നിലയിൽ നിന്ന് താഴേക്ക് ചാടി. കെട്ടിടത്തിൽ നിന്ന് ചാടുന്ന വിദ്യാർത്ഥികളുടെ ദൃശ്യങ്ങൾ ഭയാനകമായിരുന്നു. ചാടിയവർക്ക് ഗുരുതരമായി പരിക്കേൽക്കുകയും ഉടൻ തന്നെ ആശുപത്രിയിൽ പ്രവേശിപ്പിക്കുകയും ചെയ്തു.

വിവരമറിഞ്ഞയുടൻ 14 ഫയർ യൂണിറ്റുകളും എൻഡിആർഎഫ്, എസ്ഡിആർഎഫ് സംഘങ്ങളും സ്ഥലത്തെത്തി രക്ഷാപ്രവർത്തനം ആരംഭിച്ചു. കെട്ടിടത്തിന്റെ ഭിത്തി തുരന്നാണ് അഗ്നിശമന സേനാംഗങ്ങൾ ഉള്ളിലേക്ക് കടന്നത്. പുക കാരണം ഉള്ളിലേക്കുള്ള പ്രവേശനം വളരെ ദുഷ്കരമായിരുന്നുവെന്ന് രക്ഷാപ്രവർത്തകർ പറഞ്ഞു.

ആശുപത്രിയിൽ എത്തിച്ചപ്പോഴേക്കും 15 പേർ മരിച്ചതായി ഡോക്ടർമാർ സ്ഥിരീകരിച്ചു. പരിക്കേറ്റ മറ്റ് ഏഴ് വിദ്യാർത്ഥികൾ കിംഗ് ജോർജ് മെഡിക്കൽ യൂണിവേഴ്സിറ്റിയിലെ ട്രോമ സെന്ററിൽ ചികിത്സയിലാണ്. സംഭവത്തിൽ ഉയർന്നതലത്തിലുള്ള അന്വേഷണത്തിന് സർക്കാർ ഉത്തരവിട്ടു.

ലക്നൗവിൽ ദുരന്തവാർത്ത അറിഞ്ഞതോടെ അലിഗർ സന്ദർശനത്തിലായിരുന്ന ഉത്തർപ്രദേശ് മുഖ്യമന്ത്രി യോഗി ആദിത്യനാഥ് യാത്ര റദ്ദാക്കി ഉടൻ തിരിച്ചെത്തി. മരണപ്പെട്ടവരുടെ കുടുംബാംഗങ്ങളെ അനുശോചനം അറിയിച്ച അദ്ദേഹം, സംഭവത്തിൽ കുറ്റക്കാർക്കെതിരെ കർശന നടപടി സ്വീകരിക്കുമെന്ന് ഉറപ്പുനൽകി. ഉന്നത ഉദ്യോഗസ്ഥരോട് അടിയന്തരമായി റിപ്പോർട്ട് സമർപ്പിക്കാനും നിർദ്ദേശിച്ചിട്ടുണ്ട്.

പ്രധാനമന്ത്രി നരേന്ദ്ര മോദി ദുരന്തത്തിൽ അഗാധമായ ദുഃഖം രേഖപ്പെടുത്തി. മരണപ്പെട്ടവരുടെ കുടുംബത്തിന് പ്രധാനമന്ത്രിയുടെ ദേശീയ ദുരിതാശ്വാസ നിധിയിൽ നിന്ന് രണ്ട് ലക്ഷം രൂപയും പരിക്കേറ്റവർക്ക് 50,000 രൂപയും നഷ്ടപരിഹാരം പ്രഖ്യാപിച്ചു. പെറ്റ് ക്ലിനിക്കിൽ ഉണ്ടായിരുന്ന ഏതാനും മൃഗങ്ങളും തീപിടുത്തത്തിൽ ചത്തതായി റിപ്പോർട്ടുകളുണ്ട്.

കെട്ടിടത്തിനുള്ളിൽ ഉണ്ടായിരുന്ന തടി കൊണ്ടുള്ള ഫർണിച്ചറുകൾ തീ അതിവേഗം പടരാൻ കാരണമായി എന്ന് പ്രാഥമിക നിഗമനം. അഗ്നി സുരക്ഷാ മാനദണ്ഡങ്ങൾ പാലിച്ചാണോ ഈ കോച്ചിംഗ് സെന്റർ പ്രവർത്തിച്ചിരുന്നതെന്ന് അധികൃതർ പരിശോധിച്ചുവരികയാണ്. സംഭവസ്ഥലത്ത് ഇപ്പോഴും തണുപ്പിക്കൽ നടപടികൾ തുടരുകയാണ്.

English Summary A massive fire at a commercial building in Lucknow Aliganj area claimed the lives of at least 15 students on Monday afternoon. The three floor structure housed an animation coaching centre and a pet clinic where thick smoke and flames trapped several youngsters. Horrifying visuals from the spot showed desperate students jumping from the first floor to escape the blaze. Rescue teams including fire tenders and NDRF personnel worked for hours to gain access to the trapped victims. Uttar Pradesh Chief Minister Yogi Adityanath has ordered a high level inquiry into the tragedy. Prime Minister Narendra Modi expressed his deep anguish and announced financial assistance for the families of the deceased and the injured. Further investigations into the cause of the fire and safety compliance of the building are currently underway.