ആരോഗ്യനില വഷളായി; ജന്തര്‍ മന്തറില്‍ നിരാഹാരത്തിലായിരുന്ന സോനം വാങ്ചുക്കിനെ പോലീസ് ആശുപത്രിയിലേക്ക് നീക്കി

JULY 17, 2026, 10:18 PM

ന്യൂഡല്‍ഹി: നീറ്റ് പരീക്ഷാ ക്രമക്കേടുകളില്‍ പ്രതിഷേധിച്ച് കേന്ദ്ര വിദ്യാഭ്യാസ മന്ത്രിയുടെ രാജി ആവശ്യപ്പെട്ട് ഡല്‍ഹി ജന്തര്‍ മന്തറില്‍ നിരാഹാര സമരം നടത്തിവന്ന പ്രമുഖ പരിസ്ഥിതി പ്രവര്‍ത്തകന്‍ സോനം വാങ്ചുക്കിനെ ഡല്‍ഹി പോലീസ് സമരവേദിയില്‍നിന്ന് നീക്കി ആശുപത്രിയിലാക്കി. 21 ദിവസമായി തുടരുന്ന കടുത്ത ഉപവാസത്തെ തുടര്‍ന്ന് വാങ്ചുക്കിന്റെ ആരോഗ്യനില അതീവ ഗുരുതരമായ സാഹചര്യത്തിലാണ് ശനിയാഴ്ച പുലര്‍ച്ചെ പോലീസ് ഇടപെട്ടത്.

മെഡിക്കല്‍ വിദഗ്ധരുടെ നിര്‍ദേശവും ഡല്‍ഹി ഹൈക്കോടതിയുടെ ഉത്തരവും മുന്‍നിര്‍ത്തിയാണ് അദ്ദേഹത്തെ മാറ്റിയതെന്ന് വ്യക്തമാക്കിയ പോലീസ്, ജന്തര്‍ മന്തറിലെ മറ്റ് പ്രതിഷേധക്കാരോട് സമാധാനപരമായി പിരിഞ്ഞുപോകാന്‍ ആവശ്യപ്പെടുകയും ചെയ്തു. അതേസമയം പോലീസിന്റെ നടപടിക്കെതിരെ കടുത്ത പ്രതിഷേധവുമായി സമരക്കാര്‍ രംഗത്തെത്തിയിട്ടുണ്ട്. സോനം വാങ്ചുക്കിനെ ബലപ്രയോഗത്തിലൂടെയാണ് പോലീസ് മാറ്റിയതെന്നും, പ്രതിഷേധത്തെ അടിച്ചമര്‍ത്താനുള്ള ശ്രമത്തിന്റെ ഭാഗമായി സമരവേദിയിലുണ്ടായിരുന്ന കോക്രോച്ച് പാര്‍ട്ടി സ്ഥാപകന്‍ അഭിജിത് ദീപ്കെ ഉള്‍പ്പെടെയുള്ളവരെ പോലീസ് മര്‍ദിച്ചെന്നും സമരക്കാര്‍ ആരോപിച്ചു.

വാങ്ചുക്കിനെ ആശുപത്രിയിലേക്ക് മാറ്റിയെങ്കിലും നീറ്റ് ക്രമക്കേടിനെതിരായ തങ്ങളുടെ പോരാട്ടം ശക്തമായി മുന്നോട്ട് കൊണ്ടുപോകാനാണ് സമരക്കാരുടെ തീരുമാനം.