അണ്ണാമലൈയുടെ ‘വി ദ ലീഡേഴ്സ്’ പാർട്ടിയാകുന്നു; 50 ലക്ഷം അംഗത്വം ലക്ഷ്യമെന്ന് അണ്ണാമലൈ

JUNE 17, 2026, 6:26 AM

ചെന്നൈ: ബിജെപി വിട്ട് രൂപീകരിച്ച ‘വി ദ ലീഡേഴ്സ്’ മുന്നേറ്റം ജൂലൈ മാസത്തോടെ രാഷ്ട്രീയ പാർട്ടിയായി മാറുമെന്ന് പ്രഖ്യാപിച്ചു കെ. അണ്ണാമലൈ. സംഘടനയെ ഒരു രാഷ്ട്രീയ പാർട്ടിയായി രൂപാന്തരപ്പെടുത്തുന്നതിനുള്ള നടപടികൾ പുരോഗമിക്കുകയാണെന്നും 50 ലക്ഷം അംഗങ്ങളെ ചേർക്കുകയാണ് ലക്ഷ്യമെന്നും അദ്ദേഹം പറഞ്ഞു.

സോഷ്യൽ മീഡിയ ലൈവിലൂടെയായിരുന്നു അണ്ണാമലൈയുടെ പ്രതികരണം. യാതൊരു പ്രലോഭനങ്ങളോ പ്രതീക്ഷകളോ ഇല്ലാതെയാണ് ഇതുവരെ 18 ലക്ഷം പേർ സംഘടനയിൽ അംഗങ്ങളായതെന്നും അദ്ദേഹം അവകാശപ്പെട്ടു.

“ഈ മുന്നേറ്റം വലിയ മാറ്റം സൃഷ്ടിക്കുമെന്ന വിശ്വാസത്തിലാണ് ആളുകൾ ഞങ്ങളോടൊപ്പം ചേരുന്നത്. ഓൺലൈനിലൂടെയും നേരിട്ടും അംഗത്വം സ്വീകരിക്കാം. ജൂലൈ മുതൽ സംഘടനയുടെ പ്രവർത്തനങ്ങൾക്ക് പുതിയ രൂപം ലഭിക്കും. അത് ജനങ്ങൾ നേരിട്ട് കാണും,” അണ്ണാമലൈ പറഞ്ഞു.

തന്റെ നേതൃത്വത്തിലുള്ള മുന്നേറ്റം ജനങ്ങളെ തെറ്റിദ്ധരിപ്പിക്കുകയോ വ്യാജ വാഗ്ദാനങ്ങൾ നൽകുകയോ ചെയ്യില്ലെന്നും അദ്ദേഹം വ്യക്തമാക്കി. എല്ലാ മതങ്ങളെയും ഒരുപോലെ കാണുന്ന സമീപനമാണ് സംഘടനയ്ക്കുള്ളതെന്നും മതപരമായ വിവേചനങ്ങൾക്ക് ഇവിടെ സ്ഥാനമില്ലെന്നും അദ്ദേഹം കൂട്ടിച്ചേർത്തു.

നിലവിൽ നടക്കുന്ന അംഗത്വ ക്യാമ്പയിൻ വരും മാസങ്ങളിലും തുടരുമെന്നും, തമിഴ്നാട്ടിലെ വിവിധ സാമൂഹിക-രാഷ്ട്രീയ വിഷയങ്ങളിൽ ജനകീയ ഇടപെടൽ നടത്തുന്ന ശക്തമായ മുന്നേറ്റമാക്കി സംഘടനയെ വളർത്തുകയാണ് ലക്ഷ്യമെന്നും അണ്ണാമലൈ പറഞ്ഞു.

സംസ്ഥാനത്ത് യുവാക്കൾക്കിടയിൽ വർധിച്ചുവരുന്ന മയക്കുമരുന്ന് ഉപയോഗത്തിനെതിരെ ശക്തമായ ജനകീയ പ്രക്ഷോഭം ഉയരണമെന്നും അദ്ദേഹം ആവശ്യപ്പെട്ടു. രാഷ്ട്രീയത്തിലേക്ക് കടക്കാൻ ആഗ്രഹിക്കുന്ന ടെക്നോക്രാറ്റുകൾക്കും പ്രൊഫഷണലുകൾക്കും അവസരം ഒരുക്കുകയാണ് പുതിയ പാർട്ടിയുടെ ലക്ഷ്യങ്ങളിലൊന്നെന്നും അണ്ണാമലൈ വ്യക്തമാക്കി.

രാഷ്ട്രീയ പാർട്ടിയായി മാറിയ ശേഷം നേതാക്കൾക്ക് കാലാവധി പരിധി ഏർപ്പെടുത്തുന്ന കാര്യം പരിഗണിക്കുമെന്നും അദ്ദേഹം പറഞ്ഞു. “പഴയതിനെ മാറ്റി പുതിയ നേതൃത്വത്തെ കൊണ്ടുവരുന്ന പ്രക്രിയ രാഷ്ട്രീയത്തിൽ തുടർച്ചയായി നടക്കണം,” എന്നും അണ്ണാമലൈ കൂട്ടിച്ചേർത്തു.

അതേസമയം, അണ്ണാമലൈ അവകാശപ്പെടുന്ന അംഗസംഖ്യയും പുതിയ പാർട്ടി രൂപീകരണവുമായി ബന്ധപ്പെട്ട വിവരങ്ങളും സ്വതന്ത്രമായി സ്ഥിരീകരിക്കപ്പെട്ടിട്ടില്ല. ജൂലൈയിൽ പ്രഖ്യാപിക്കാനിരിക്കുന്ന പുതിയ പാർട്ടിയുടെ ഘടനയും നയപരമായ നിലപാടുകളും രാഷ്ട്രീയ വൃത്തങ്ങൾ ഉറ്റുനോക്കുകയാണ്.