'നിങ്ങള്‍ പിന്‍വാങ്ങുന്നതാണ് നല്ലത്': ഗാസയിലേക്കുള്ള ബോട്ട് യാച്ചിനെക്കുറിച്ച് ഗ്രേറ്റ തുന്‍ബെര്‍ഗിന് മുന്നറിയിപ്പുമായി ഇസ്രായേല്‍

JUNE 8, 2025, 6:48 PM

ജെറുസലേം: ഇസ്രായേല്‍ ഉപരോധത്തെ ധിക്കരിച്ച് ഗാസയിലെത്താന്‍ പദ്ധതിയിടുന്ന സ്വീഡന്റെ ഗ്രേറ്റ തുന്‍ബെര്‍ഗ് ഉള്‍പ്പെടെയുള്ള പ്രവര്‍ത്തകരെ വഹിച്ചുകൊണ്ടുള്ള ഒരു ചാരിറ്റി ബോട്ടിന്റെ യാത്ര നിര്‍ത്താന്‍ ഇസ്രായേല്‍ പ്രതിരോധ മന്ത്രി ഇസ്രായേല്‍ കാറ്റ്സ് ഞായറാഴ്ച ആവശ്യപ്പെട്ടു.

പലസ്തീന്‍ അനുകൂല ഫ്രീഡം ഫ്‌ലോട്ടില്ല കോയലിഷന്‍ (എഫ്എഫ്സി) പ്രവര്‍ത്തിപ്പിക്കുന്ന, ബ്രിട്ടീഷ് പതാകയുള്ള മാഡ്ലീന്‍ യാച്ച് ജൂണ്‍ 6 നാണ് സിസിലിയില്‍ നിന്ന് യാത്ര തിരിച്ചത്. നിലവില്‍ ഈജിപ്ഷ്യന്‍ തീരത്ത്, ഇസ്രായേല്‍ ഉപരോധിച്ച ഗാസ മുനമ്പിലേക്ക് നീങ്ങുകയാണ്. മാഡ്ലീന്‍ ഗാസയില്‍ എത്താതിരിക്കാനുള്ള നടപടി സ്വീകരിക്കാന്‍ താന്‍ ഐഡിഎഫിനോട് നിര്‍ദ്ദേശിച്ചുവെന്ന് കാറ്റ്സ് ഒരു പ്രസ്താവനയില്‍ പറഞ്ഞു. സെമിറ്റിക് വിരുദ്ധരായ ഗ്രേറ്റയ്ക്കും ഹമാസ് പ്രചാരണം നടത്തുന്ന അവരുടെ സുഹൃത്തുക്കളോടും പറയുന്നു, നിങ്ങള്‍ പിന്നോട്ട് പോകുന്നതാണ് നല്ലത്. കാരണം നിങ്ങള്‍ ഗാസയില്‍ എത്തില്ലെന്ന് കാറ്റ്‌സ് വ്യക്തമാക്കുന്നു.

ഗാസയിലെ ഇസ്രായേലിന്റെ നിയമവിരുദ്ധ ഉപരോധത്തെയും വര്‍ദ്ധിച്ചുവരുന്ന യുദ്ധക്കുറ്റങ്ങളെയും വെല്ലുവിളിക്കാനും മാനുഷിക സഹായത്തിന്റെ അടിയന്തര ആവശ്യകത എടുത്തുകാണിക്കാനും മാഡ്‌ലീന്‍ ക്രൂവില്‍ ചേര്‍ന്നതെന്ന് കാലാവസ്ഥാ പ്രവര്‍ത്തക തുന്‍ബര്‍ഗ് പറഞ്ഞു. യഹൂദവിരുദ്ധതയെക്കുറിച്ചുള്ള ഇസ്രായേലിന്റെ മുന്‍ ആരോപണങ്ങള്‍ അവര്‍ നിരസിച്ചു.

അതേസമയം 2023 ഒക്ടോബറില്‍ ഹമാസ് നടത്തിയ അപ്രതീക്ഷിത ആക്രമണം 1,200 ലധികം പേരെ കൊല്ലുകയും 251 പേരെ ബന്ദികളാക്കുകയും ചെയ്തതിനെത്തുടര്‍ന്നാണ് ഇസ്രായേല്‍ ഹമാസുമായി യുദ്ധത്തിലേര്‍പ്പെട്ടത്.