ഹാരി രാജകുമാരന് മർഡോക്ക് മാധ്യമ സാമ്രാജ്യത്തിനെതിരെ ചരിത്ര വിജയം!

JANUARY 22, 2025, 6:08 PM

ലണ്ടൻ: റൂബർട്ട് മർഡോക്കിന്റെ ഉടമസ്ഥതയിലുള്ള ന്യൂസ് ഗ്രൂപ്പ് ന്യൂസ്‌പേപ്പേഴ്‌സിനെതിരെ (NGN) നിർണായക നിയമപോരാട്ടത്തിൽ വിജയം നേടി ചാൾസ് രാജാവിന്റെ ഇളയ മകൻ ഹാരി രാജകുമാരൻ. തങ്ങളുടെ സൺ ടാബ്ലോയിഡിൽ നിയമവിരുദ്ധ പ്രവർത്തനങ്ങൾ നടന്നതായി NGN ആദ്യമായി സമ്മതിക്കുകയും വലിയ നഷ്ടപരിഹാരം നൽകുകയും ചെയ്തതോടെയാണ് ഹാരിയുടെ പോരാട്ടം വിജയത്തിലെത്തിയത്.

1996 മുതൽ 2011 വരെ തൻ്റെ സ്വകാര്യ വിവരങ്ങൾ നിയമവിരുദ്ധമായി ചോർത്തിയെന്ന് ആരോപിച്ചാണ് 40 കാരനായ ഹാരി ലണ്ടനിലെ ഹൈക്കോടതിയിൽ NGN നെതിരെ കേസ് ഫയൽ ചെയ്തത്. സൺ ടാബ്ലോയിഡിന്റെയും ഇപ്പോൾ പ്രസിദ്ധീകരണം നിർത്തിയ ന്യൂസ് ഓഫ് ദി വേൾഡ് പത്രത്തിന്റെയും പ്രസാധകരാണ് NGN. ഹാരിയുട അമ്മയും പരേതയുമായ ഡയാന രാജകുമാരിയുടെ സ്വകാര്യ ജീവിതത്തിലേക്കും NGN കടന്നുകയറ്റം നടത്തിയതായി സമ്മതിച്ചിട്ടുണ്ട്. നഷ്ടപരിഹാര തുക വലിയ ഒരു സംഖ്യയാണെന്ന് കേസ് സംബന്ധിച്ച വൃത്തങ്ങൾ അറിയിച്ചു.

"ഇന്ന് ഒരു ചരിത്ര വിജയത്തിൽ, റൂബർട്ട് മർഡോക്കിൻ്റെ യുകെയിലെ പ്രധാന മാധ്യമ സ്ഥാപനമായ ദി സൺ നിയമവിരുദ്ധ പ്രവർത്തനങ്ങളിൽ ഏർപ്പെട്ടിട്ടുണ്ടെന്ന് ന്യൂസ് യുകെ സമ്മതിച്ചിരിക്കുന്നു," ഹാരിയും അദ്ദേഹത്തോടൊപ്പം കേസിൽ പങ്കാളിയായിരുന്ന ടോം വാട്സണും പ്രസ്താവനയിൽ പറഞ്ഞു.

ഹൈക്കോടതിക്ക് പുറത്ത് അവരുടെ അഭിഭാഷകൻ ഡേവിഡ് ഷെർബോൺ വായിച്ച പ്രസ്താവനയിൽ ഇങ്ങനെ പറയുന്നു: "ഇന്ന് കള്ളങ്ങൾ വെളിപ്പെട്ടിരിക്കുന്നു. ഇന്ന് മറച്ചുവെക്കലുകൾ പുറത്തായിരിക്കുന്നു. ആരും നിയമത്തിന് അതീതരല്ലെന്ന് ഇന്ന് തെളിയിക്കുന്നു. കണക്ക് പറയേണ്ട സമയം അതിക്രമിച്ചിരിക്കുന്നു."

ഹാരിയുടെ കേസും മുൻ ബ്രിട്ടീഷ് നിയമസഭാംഗമായ വാട്സണിന്റെ സമാനമായ കേസും ചൊവ്വാഴ്ച ആരംഭിക്കാനിരിക്കുകയായിരുന്നു. എന്നാൽ അവസാന നിമിഷ ചർച്ചകളെ തുടർന്ന് ഇരു വിഭാഗവും ഒരു ഒത്തുതീർപ്പിലെത്തി. സൺ പത്രത്തിൽ തെറ്റായ കാര്യങ്ങൾ സംഭവിച്ചിട്ടുണ്ടെന്ന് NGN സമ്മതിച്ചു. വർഷങ്ങളായി നിഷേധിച്ചിരുന്ന ഒരു കാര്യമാണ് ഇപ്പോൾ അവർ അംഗീകരിച്ചിരിക്കുന്നത്.