ഷാഹിദ് കപൂറിന്റെ ഏറെ പ്രതീക്ഷയോടെ കാത്തിരിക്കുന്ന ചിത്രം 'ഓ റോമിയോ' തിയേറ്ററുകളിൽ എത്തുന്നതിനു മുമ്പുതന്നെ വാർത്തകളിൽ ഇടം നേടിയിരിക്കുകയാണ്. ഷാഹിദ് കപൂർ ചിത്രത്തിൽ ഒരു ഗാംഗ്സ്റ്റർ കഥാപാത്രത്തെയാണ് അവതരിപ്പിക്കുന്നത്. ഇത് നടന്റെ കരിയറിലെ ഏറ്റവും മികച്ച പ്രകടനങ്ങളിലൊന്നായിരിക്കുമെന്ന് പ്രതീക്ഷിക്കുന്നു.
ഫെബ്രുവരി 14 ന് റിലീസ് ചെയ്യാൻ പോകുന്ന ചിത്രം ഇപ്പോൾ നിയമപരമായ പ്രശ്നത്തിലാണ്. മുംബൈ അധോലോക ചരിത്രത്തിലെ പ്രധാന വ്യക്തികളിൽ ഒരാളായ ഹുസൈൻ ഉസ്താരയുടെ കഥയെ അടിസ്ഥാനമാക്കിയുള്ളതാണ് ഈ ചിത്രമെന്ന് റിപ്പോർട്ടുകൾ പറയുന്നു. ഹുസൈൻ ഉസ്താരയുടെ മകൾ ഇപ്പോൾ ചിത്രത്തിനെതിരെ രംഗത്തെത്തിയിട്ടുണ്ട്.
തന്റെ പിതാവിനെ ചിത്രത്തിൽ തെറ്റായ രീതിയിൽ അവതരിപ്പിച്ചിരിക്കുന്നുവെന്നാരോപിച്ചാണ് ഹുസൈൻ ഉസ്താരയുടെ മകൾ സനോബർ ഷെയ്ഖ് 'ഓ റോമിയോ' നിർമാതാക്കൾക്കെതിരെ പരാതി നൽകിയത്. ഏഴ് ദിവസത്തിനുള്ളിൽ രണ്ട് കോടി രൂപ നഷ്ടപരിഹാരം നൽകണമെന്നാണ് ആവശ്യം. തന്റെ ആശങ്കകൾ പരിഹരിക്കുന്നത് വരെ ചിത്രത്തിന്റെ റിലീസ് നിർത്തിവെക്കണമെന്നും അവർ ആവശ്യപ്പെട്ടു.
"എന്റെ പിതാവ് ഒരു ഗുണ്ടാസംഘത്തിന്റെ ഭാഗമായിരുന്നില്ല. ഹുസൈൻ ഉസ്താര ഒട്ടേറെപ്പേരെ സഹായിച്ചിട്ടുണ്ട്. നഗരത്തെ കുറ്റകൃത്യങ്ങളിൽ നിന്ന് മുക്തമാക്കാനാണ് അദ്ദേഹം ആഗ്രഹിച്ചത്. അദ്ദേഹം ഒരു ക്രിമിനലായിരുന്നില്ല. അദ്ദേഹത്തിന്റെ പേരിൽ ക്രിമിനൽ റെക്കോർഡുകളൊന്നും കണ്ടെത്താനാവില്ല. സിനിമയിൽ അദ്ദേഹത്തെ ചിത്രീകരിച്ചിരിക്കുന്ന രീതിയാണ് പ്രശ്നം," സനോബർ പറഞ്ഞു.
അതിനിടെ, ചിത്രത്തിലെ ആദ്യ ഗാനമായ 'ഹം തോ തേരെ ഹി ലിയേ ഥേ' പുറത്തിറങ്ങിയതോടെ വിവാദം വീണ്ടും കടുത്തിരിക്കുകയാണ്. ഷാഹിദ് കപൂറും തൃപ്തി ദിമ്രിയും അവതരിപ്പിക്കുന്ന കഥാപാത്രങ്ങൾ തമ്മിലുള്ള പ്രണയമാണ് ഈ ഗാനത്തിലുള്ളത്. ചിത്രത്തിലെ ഈ കഥാപാത്രങ്ങൾക്ക് യഥാർത്ഥ ജീവിതത്തിലെ ഹുസൈൻ ഉസ്താരയുമായും അഷ്റഫ് ഖാനുമായും (സപ്ന ദീദി) സാമ്യമുണ്ടെന്നാണ് സോഷ്യൽ മീഡിയയിലെ സംസാരം.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
.jpg)
-20260311033306.jpg)
