ലോകമെമ്പാടുമുള്ള ആക്ഷൻ സിനിമാ പ്രേമികളുടെ ഹരമായ 'റാംബോ' (Rambo) എന്ന ഇതിഹാസ കഥാപാത്രത്തിന്റെ തുടക്കകാലം പറയുന്ന പുതിയ ചിത്രം വരുന്നു. നോഹ സെന്റിനിയോ  നായകനാകുന്ന ഈ പ്രീക്വൽ ചിത്രത്തിൽ, ഒറിജിനൽ റാംബോ സിൽവസ്റ്റർ സ്റ്റാലോൺ എക്സിക്യൂട്ടീവ് പ്രൊഡ്യൂസറായി എത്തുന്നു എന്നതാണ് പുതിയ വിശേഷം.

'സിസു' (Sisu) എന്ന ചിത്രത്തിലൂടെ ശ്രദ്ധേയനായ ജൽമാരി ഹെലാൻഡറാണ് ഈ ചിത്രം സംവിധാനം ചെയ്യുന്നത്. പതിറ്റാണ്ടുകളായി തന്റെ ജീവിതത്തിന്റെ ഭാഗമായ റാംബോയുടെ കഥ എവിടെ തുടങ്ങുന്നു എന്ന് ലോകത്തിന് കാണിച്ചുകൊടുക്കുന്നതിൽ താൻ ആവേശഭരിതനാണെന്ന് സ്റ്റാലോൺ പറഞ്ഞു. ഇതിഹാസമായി മാറുന്നതിന് മുൻപുള്ള റാംബോയുടെ ജീവിതത്തെയാകും ചിത്രം ആഴത്തിൽ പരിശോധിക്കുക.

ചിത്രത്തിന്റെ ചിത്രീകരണം നിലവിൽ ബാങ്കോക്കിൽ പുരോഗമിക്കുകയാണ്. സൊഹ്‌റാബ് നോഷിർവാനി, റോറി ഹെയ്ൻസ് എന്നിവർ ചേർന്നാണ് തിരക്കഥ ഒരുക്കിയിരിക്കുന്നത്. നോഹയ്ക്കൊപ്പം 'സിന്നേഴ്സ്' താരം യാവോ, ജേസൺ ടോബിൻ, ജെഫേഴ്സൺ വൈറ്റ്, 'വൈറ്റ് ലോട്ടസ്' ഫെയിം ടൈം തപ്തിംതോങ്, ക്വിൻസി ഐസയ്യ തുടങ്ങിയ പ്രമുഖ താരങ്ങളും പ്രധാന വേഷങ്ങളിൽ എത്തുന്നുണ്ട്. ഹോളിവുഡിലെ പ്രശസ്തരായ റൂസ്സോ ബ്രദേഴ്സും ഈ ചിത്രത്തിന്റെ എക്സിക്യൂട്ടീവ് പ്രൊഡ്യൂസർമാരായി സ്റ്റാലോണിനൊപ്പമുണ്ട്.

1982-ൽ പുറത്തിറങ്ങിയ 'ഫസ്റ്റ് ബ്ലഡ്' മുതൽ 2019-ലെ 'റാംബോ: ലാസ്റ്റ് ബ്ലഡ്' വരെ അഞ്ച് ചിത്രങ്ങളിലൂടെയാണ് സിൽവസ്റ്റർ സ്റ്റാലോൺ ഈ കഥാപാത്രത്തെ അനശ്വരമാക്കിയത്. സ്റ്റാലോണിന്റെ കരിയറിലെ ഏറ്റവും ഐക്കോണിക് വേഷങ്ങളിലൊന്നായ റാംബോയുടെ പ്രീക്വൽ നിർമ്മിക്കുന്നത് ലയൺസ്‌ഗേറ്റ്, ടെംപിൾട്ടൺ മീഡിയ തുടങ്ങിയ വമ്പൻ ബാനറുകൾ ചേർന്നാണ്. സ്റ്റാലോണിന്റെ സാന്നിധ്യം കൂടി ഉറപ്പായതോടെ പുതിയ ചിത്രത്തിന് മേലുള്ള പ്രേക്ഷകരുടെ പ്രതീക്ഷ വാനോളമുയർന്നിരിക്കുകയാണ്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്