തമിഴ് സിനിമയിലെ രണ്ട് ഇതിഹാസങ്ങൾ, സൂപ്പർസ്റ്റാർ രജനികാന്തും ഉലകനായകൻ കമൽ ഹാസനും 47 വർഷങ്ങൾക്ക് ശേഷം ഒന്നിക്കുന്ന KH x RK എന്ന ചിത്രത്തെക്കുറിച്ചുള്ള വിവരങ്ങൾ പുറത്ത്. സംവിധായകൻ നെൽസൺ ദിലീപ്കുമാർ ഒരുക്കുന്ന ഈ ബിഗ് ബജറ്റ് ചിത്രത്തിന്റെ ചിത്രീകരണം 2027-ൽ ആരംഭിക്കുമെന്നാണ് സൂചന.

ചിത്രത്തിന്റെ സംഗീത സംവിധായകൻ അനിരുദ്ധിന്റെ വാക്കുകളാണ് ഇപ്പോൾ ആരാധകർക്ക് ആവേശം പകരുന്നത്. "മിക്കവാറും അടുത്ത വർഷം (2027) സിനിമയുടെ ചിത്രീകരണം ആരംഭിക്കും. വലിയ പ്രതീക്ഷകളാണ് ഈ പ്രൊജക്റ്റിന് മേലുള്ളത്," എന്ന് അനിരുദ് ഇന്ത്യ ടുഡേയ്ക്ക് നൽകിയ അഭിമുഖത്തിൽ പറഞ്ഞു. 

ചിത്രത്തിന്റെ പ്രൊമോ വീഡിയോയ്ക്കായി ഒരുക്കിയ ആജാ രാജ എന്ന ഗാനത്തിന് ലഭിച്ച മികച്ച പ്രതികരണത്തിൽ താൻ അതീവ സന്തോഷവാനാണെന്നും അദ്ദേഹം കൂട്ടിചേർത്തു. ഇത്തവണ ഒരു റെട്രോ സ്റ്റൈൽ സംഗീതമാണ് ചിത്രത്തിനായി പരീക്ഷിക്കുന്നതെന്നും അനിരുദ് വെളിപ്പെടുത്തി.

ചിത്രത്തിന്റെ പ്രൊമോ വീഡിയോയിൽ രജനിയും കമലും ഒന്നിച്ചെത്തിയത് AI (കൃത്രിമ ബുദ്ധി) ഉപയോഗിച്ചാണെന്ന തരത്തിൽ സോഷ്യൽ മീഡിയയിൽ പ്രചരിച്ച അഭ്യൂഹങ്ങൾക്ക് മറുപടിയുമായി നിർമ്മാണ കമ്പനിയായ റെഡ് ജയന്റ് മൂവീസ് രംഗത്തെത്തി. 

ഷൂട്ടിംഗ് സെറ്റിൽ രജനികാന്തും കമൽ ഹാസനും നെൽസണും അനിരുദും ഒന്നിച്ച് നിൽക്കുന്ന ബിഹൈൻഡ് ദി സീൻ (BTS) ദൃശ്യങ്ങൾ അവർ പങ്കുവെച്ചു. ഷൂട്ടിംഗിന് ശേഷം ഇരുതാരങ്ങളും കെട്ടിപ്പിടിക്കുന്ന ദൃശ്യങ്ങൾ ആരാധകർ ഏറ്റെടുത്തു കഴിഞ്ഞു. ഇത് പഴയകാല സിനിമാ നിർമ്മാണ രീതിയിലുള്ള യഥാർത്ഥ ചിത്രീകരണമാണെന്ന് നിർമ്മാതാക്കൾ ഉറപ്പിച്ചു പറഞ്ഞു.

1979-ൽ പുറത്തിറങ്ങിയ നിനൈത്താലെ ഇനിക്കും എന്ന ചിത്രത്തിന് ശേഷം ഇതാദ്യമായാണ് രജനിയും കമലും ഒരു പൂർണ്ണരൂപത്തിലുള്ള സിനിമയ്ക്കായി ഒന്നിക്കുന്നത്. കരിയറിന്റെ തുടക്കത്തിൽ അപൂർവ്വ രാഗങ്ങൾ, പതിനാറു വയതിനിലേ തുടങ്ങിയ നിരവധി ചിത്രങ്ങളിൽ ഇരുവരും ഒന്നിച്ചഭിനയിച്ചിട്ടുണ്ടെങ്കിലും പിന്നീട് തെന്നിന്ത്യൻ സിനിമയിലെ രണ്ട് ധ്രുവങ്ങളായി വളരുകയായിരുന്നു.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്