ആപ്പിൾ ടിവി പ്ലസിലെ ജനപ്രിയ പരമ്പരയായിരുന്ന പാം റോയൽ (Palm Royale) അപ്രതീക്ഷിതമായി നിർത്തലാക്കുന്നു. ക്രിസ്റ്റൻ വിഗ് പ്രധാന വേഷത്തിലെത്തിയ ഈ കോമഡി ഡ്രാമ രണ്ട് സീസണുകൾക്ക് ശേഷമാണ് സ്ട്രീമിംഗ് പ്ലാറ്റ്‌ഫോം അവസാനിപ്പിക്കുന്നത്. 

ഇതിനോടകം 11 എമ്മി  അവാർഡ് നാമനിർദ്ദേശങ്ങൾ കരസ്ഥമാക്കിയ പരമ്പര പെട്ടെന്ന് നിർത്താനുണ്ടായ കാരണം ആപ്പിൾ ടിവി വെളിപ്പെടുത്തിയിട്ടില്ല. 2024-ൽ ഒന്നാം സീസൺ പുറത്തിറങ്ങിയപ്പോൾ തന്നെ വലിയ പ്രേക്ഷക ശ്രദ്ധ നേടാൻ ഈ സീരീസിന് സാധിച്ചിരുന്നു.

ജൂലിയറ്റ് മക്ഡാനിയലിൻ്റെ മിസ്റ്റർ ആൻഡ് മിസിസ് അമേരിക്കൻ പൈ എന്ന നോവലിനെ ആസ്പദമാക്കിയാണ് അബെ സിൽവിയ ഈ പരമ്പര ഒരുക്കിയത്. 1969-ലെ ഫ്ലോറിഡ പശ്ചാത്തലമാക്കി നിർമ്മിച്ച സീരീസിൽ മാക്സിൻ ഡെല്ലാകോർട്ടെ സിമ്മൺസ് എന്ന കഥാപാത്രത്തെയാണ് ക്രിസ്റ്റൻ വിഗ് അവതരിപ്പിച്ചത്. 

പാം ബീച്ചിലെ അതിസമ്പന്നരുടെ ഇടയിലേക്ക് നുഴഞ്ഞുകയറാൻ ശ്രമിക്കുന്ന ഒരു സാധാരണക്കാരിയുടെയും അവരുടെ മോഹങ്ങളുടെയും കഥ രസകരമായ രീതിയിലാണ് പാം റോയൽ അവതരിപ്പിച്ചത്. റിക്കി മാർട്ടിൻ, ലോറ ഡേൺ, ആലിസൺ ജാനി തുടങ്ങിയ വൻ താരനിരയും പരമ്പരയുടെ ഭാഗമായിരുന്നു.

ഒന്നാം സീസണിന് ലഭിച്ച എമ്മി നാമനിർദ്ദേശങ്ങൾക്ക് പുറമെ, രണ്ടാം സീസണിലെ മികച്ച പ്രകടനത്തിന് ക്രിസ്റ്റൻ വിഗ്ഗിന് സ്ക്രീൻ ആക്ടേഴ്സ് ഗിൽഡ് (SAG) അവാർഡ് നാമനിർദ്ദേശവും ലഭിച്ചിരുന്നു. രണ്ടാം സീസണിൽ ജോൺ സ്റ്റാമോസ്, പാറ്റി ലുപോൺ തുടങ്ങിയ പുതിയ താരങ്ങളെ ഉൾപ്പെടുത്തി പരമ്പര കൂടുതൽ വിപുലീകരിച്ചിരുന്നുവെങ്കിലും അപ്രതീക്ഷിതമായ ഈ പിൻവാങ്ങൽ ആരാധകരെ നിരാശരാക്കിയിരിക്കുകയാണ്. 

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്