വിഖ്യാത സംവിധായകൻ നോഹ ബാംബാക്കിന്റെ (Noah Baumbach) പുതിയ ചിത്രമായ 'ജെ കെല്ലി' (Jay Kelly) ഹോളിവുഡ് താരങ്ങളുടെ ലോകത്തേക്കും പ്രശസ്തിയുടെ പൊള്ളത്തരങ്ങളിലേക്കും വെളിച്ചം വീശുന്നു. പ്രമുഖ നടൻ ജോർജ് ക്ലൂണി (George Clooney) മുഖ്യകഥാപാത്രമായെത്തുന്ന ഈ ചിത്രം, ഒരു നടന്റെ ആത്മപരിശോധനയുടെയും സ്വയം കണ്ടെത്തലിന്റെയും കഥ പറയുന്നു. സിനിമ ഇതിനോടകം തന്നെ നിരൂപക പ്രശംസ നേടി മുന്നേറുകയാണ്.
അറുപതുകളിലെത്തി നിൽക്കുന്ന, ലോകമെമ്പാടും ആരാധകരുള്ള സൂപ്പർതാരം ജെ കെല്ലി (ജോർജ് ക്ലൂണി) ഒരു പ്രതിസന്ധി ഘട്ടത്തിലൂടെ കടന്നുപോകുന്നതാണ് ചിത്രത്തിന്റെ പ്രമേയം. സിനിമയിലെ കഥാപാത്രങ്ങളായി ജീവിക്കുമ്പോൾ താൻ യഥാർത്ഥത്തിൽ ആരാണെന്ന് അയാൾക്ക് കണ്ടെത്താൻ സാധിക്കുന്നില്ല. താൻ ജീവിക്കുന്നത് യഥാർത്ഥ ജീവിതമല്ല, അഭിനയിച്ച സിനിമകളുടെ ഓർമ്മകൾ മാത്രമാണ് തന്റെ ജീവിതത്തിലുള്ളതെന്നും കെല്ലി തിരിച്ചറിയുന്നു.
ഒരിക്കൽ തന്നെ ചതിച്ച പഴയൊരു സുഹൃത്തുമായുള്ള കൂടിക്കാഴ്ച കെല്ലിയുടെ ഈ ചിന്തകളെ കൂടുതൽ പ്രബലമാക്കുന്നു. ഇതേത്തുടർന്ന്, ഒരു പുതിയ സിനിമയിൽ നിന്ന് പിന്മാറുന്ന കെല്ലി, യൂറോപ്പിലേക്കുള്ള യാത്രയിൽ സ്വന്തം മകളെ തേടിപ്പോകാൻ തീരുമാനിക്കുന്നു. തൻ്റെ കരിയറിനായി കുടുംബത്തെയും വ്യക്തിബന്ധങ്ങളെയും അയാൾ എങ്ങനെ അവഗണിച്ചു എന്ന് ഈ യാത്രയിൽ കെല്ലി തിരിച്ചറിയുന്നു.
ജെ കെല്ലിയുടെ വിശ്വസ്തനായ മാനേജർ റോൺ (ആദം സാൻഡ്ലർ) ഒരു പ്രധാന കഥാപാത്രമായി ചിത്രത്തിലുണ്ട്. കെല്ലിയുടെ താൽപ്പര്യങ്ങൾക്കായി സ്വന്തം ജീവിതം പോലും വേണ്ടെന്ന് വെച്ച റോണിന്റെ വിഷമങ്ങൾ സിനിമയിൽ ആഴത്തിൽ പറയുന്നു. പ്രശസ്തിയുടെ ലോകത്തും സൗഹൃദബന്ധങ്ങൾ ഒരു കച്ചവടമായി മാറുന്നതിന്റെ ദുരന്തം റോണിലൂടെ ബാംബാക്ക് പ്രേക്ഷകരിലേക്ക് എത്തിക്കുന്നു.
തന്റെ വ്യക്തിജീവിതത്തിൽ സംഭവച്ച നഷ്ടങ്ങളെക്കുറിച്ചുള്ള തിരിച്ചറിവ് കെല്ലിക്ക് ഒരു പരിധി വരെ ആശ്വാസം നൽകുന്നുണ്ടെങ്കിലും, പൂർണ്ണമായ ഒരു വീണ്ടെടുപ്പല്ല ചിത്രം നൽകുന്നത്. ജോർജ് ക്ലൂണി തന്റെ താരപരിവേഷം മാറ്റിവെച്ച് വളരെ മികച്ച പ്രകടനമാണ് കാഴ്ചവെച്ചിരിക്കുന്നതെന്നാണ് നിരൂപക പക്ഷം. ഒപ്പം, മാനേജരായി എത്തിയ ആദം സാൻഡ്ലറുടെ പ്രകടനവും പ്രേക്ഷകരുടെ കണ്ണുനനയിക്കുന്നതാണ്. പ്രശസ്തിയുടെയും ബന്ധങ്ങളുടെയും സങ്കീർണ്ണതകൾ ചർച്ച ചെയ്യുന്ന 'ജെ കെല്ലി' ഈ വർഷത്തെ മികച്ച ചിത്രങ്ങളിൽ ഒന്നാണ്.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
.jpg)
-20260311033306.jpg)
