'ദി ഒഡീസി' നവംബർ 17 മുതൽ ഒ.ടി.ടിയിൽ! എവിടെ കാണാം?

AUGUST 22, 2026, 10:35 PM

തിയേറ്ററുകളിൽ തരംഗം സൃഷ്ടിച്ച ക്രിസ്റ്റോഫർ നോളന്റെ 'ദി ഒഡീസി' ഡിജിറ്റൽ സ്ട്രീമിംഗിലേക്ക് കടക്കുന്നു. ബോക്‌സ് ഓഫീസിൽ ചരിത്രപരമായ മുന്നേറ്റം നടത്തിയതിന് ശേഷം ചിത്രം നവംബർ 17 മുതൽ വിവിധ ഡിജിറ്റൽ പ്ലാറ്റ്‌ഫോമുകളിൽ ലഭ്യമാകുമെന്ന് റിപ്പോർട്ടുകൾ വ്യക്തമാക്കുന്നു.

പ്രീമിയം വീഡിയോ ഓൺ ഡിമാൻഡ് വഴിയാകും ചിത്രം വാടകയ്‌ക്കോ (Rent) വാങ്ങുന്നതിനോ ലഭ്യമാവുക. ഗ്രീക്ക് കവി ഹോമറിന്റെ ഇതിഹാസ കാവ്യത്തെ അടിസ്ഥാനമാക്കി നിർമ്മിച്ച ചിത്രം ആഗോളതലത്തിൽ വൻ വിജയമായി മാറിയിരുന്നു.

യൂണിവേഴ്സൽ പിക്ചേഴ്സ് (Universal Pictures) ചിത്രത്തിന്റെ 4K അൾട്രാ എച്ച്.ഡി, ബ്ലൂ-റേ, ഡി.വി.ഡി (4K Ultra HD, Blu-ray, DVD) പതിപ്പുകളും അതേ ദിവസം തന്നെ പുറത്തിറക്കുന്നുണ്ട്. ആപ്പിൾ ടി.വി, പ്രൈം വീഡിയോ യൂട്യൂബ് മൂവീസ് തുടങ്ങിയ പ്രധാന പ്ലാറ്റ്‌ഫോമുകളിലൂടെ ചിത്രം കാണാൻ സാധിക്കും. 1.3 ബില്യൺ ഡോളറിലധികം കളക്ഷൻ നേടിക്കൊണ്ട് സർവ്വകാല റെക്കോർഡുകൾ തകർത്താണ് ചിത്രം മുന്നേറിയത്.

ഡെഡ്‌പൂൾ ആൻഡ് വോൾവറിൻ സ്ഥാപിച്ച റെക്കോർഡ് മറികടന്ന് എക്കാലത്തെയും മികച്ച ബോക്‌സ് ഓഫീസ് കളക്ഷൻ നേടുന്ന ആർ-റേറ്റഡ് (R-rated) ചിത്രമായി 'ദി ഒഡീസി' മാറി. നോളന്റെ മറ്റ് ചിത്രങ്ങളായ ഒപ്പൻഹൈമർ, ഡാർക്ക് നൈറ്റ് റൈസസ് എന്നിവയെക്കാൾ വലിയ വിജയമാണ് ഈ ചിത്രം സ്വന്തമാക്കിയത്.

മാറ്റ് ഡാമൺ, ആനി ഹാത്ത്‌വേ, ടോം ഹോളണ്ട് , സെൻഡയ തുടങ്ങി വമ്പൻ താരനിര അണിനിരന്ന ചിത്രം 123 ദിവസത്തെ തിയേറ്റർ പ്രദർശനത്തിന് ശേഷമാണ് ഹോം എന്റർടൈൻമെന്റിലേക്ക് എത്തുന്നത്. ഇന്ത്യൻ പ്രേക്ഷകർക്കായുള്ള ഒ.ടി.ടി പ്ലാറ്റ്‌ഫോം വിവരങ്ങളും തുകയുമെല്ലാം റിലീസിന് തൊട്ടുമുമ്പ് പ്രഖ്യാപിക്കുമെന്ന് അണിയറപ്രവർത്തകർ അറിയിച്ചു.