ഇന്ധന വിതരണം സുഗമമാക്കാൻ ട്രക്ക് ഡ്രൈവർമാരുടെ ജോലിസമയത്തിൽ ഇളവനുവദിച്ച് യുഎസ്

SEPTEMBER 16, 2026, 9:23 PM

യുഎസിലെ ഇന്ധന വിതരണ തടസ്സങ്ങളും വർദ്ധിച്ചുവരുന്ന വിലക്കയറ്റവും പരിഹരിക്കുന്നതിനായി ട്രക്ക് ഡ്രൈവർമാരുടെ ജോലിസമയത്തിൽ താത്കാലിക ഇളവുകൾ പ്രഖ്യാപിച്ച് ട്രംപ് ഭരണകൂടം.

ഗ്യാസോലിൻ, ഡീസൽ എന്നിവ എത്തിക്കുന്ന ഡ്രൈവർമാർക്കുള്ള പ്രതിദിന ജോലിസമയം 16 മണിക്കൂറായി ഉയർത്തിയതായി യുഎസ് ട്രാൻസ്‌പോർട്ടേഷൻ സെക്രട്ടറി ഷോൺ ഡഫി അറിയിച്ചു. ബുധനാഴ്ച മുതൽ പ്രാബല്യത്തിൽ വന്ന 90 ദിവസത്തെ ഇളവ് അനുസരിച്ച്, ഡ്രൈവർമാർക്ക് 24 മണിക്കൂറിനുള്ളിൽ 16 മണിക്കൂർ വരെ ജോലി ചെയ്യാൻ അനുമതിയുണ്ടാകും. നിലവിലെ നിയമപ്രകാരം ഇത് പരമാവധി 14 മണിക്കൂർ മാത്രമായിരുന്നു.ഡ്രൈവർമാർക്ക് ആവശ്യമായ വിശ്രമവേളകൾ നൽകുന്നുണ്ടെന്ന് ഉറപ്പുവരുത്തിക്കൊണ്ടാണ് ഇളവുകൾ അനുവദിച്ചിരിക്കുന്നത്.

ഇറാനെതിരെയുള്ള യുഎസ്-ഇസ്രായേൽ യുദ്ധവും, റഷ്യൻ എണ്ണ ശുദ്ധീകരണ ശാലകൾക്ക് നേരെയുള്ള ഉക്രെയ്ൻ ആക്രമണങ്ങളും ആഗോളതലത്തിൽ ഇന്ധന വിതരണത്തെ കടുത്ത സമ്മർദ്ദത്തിലാക്കിയിട്ടുണ്ട്. ഒരു വർഷം മുമ്പ് ഗാലന് 3.74 ഡോളറായിരുന്ന ഡീസൽ വില നിലവിൽ എനർജി ഇൻഫർമേഷൻ അഡ്മിനിസ്ട്രേഷന്റെ കണക്കനുസരിച്ച് റെക്കോർഡ് നിരക്കായ 6.29 ഡോളറിലെത്തി.

റഷ്യൻ കയറ്റുമതി നിരോധനവും വരാനിരിക്കുന്ന ശൈത്യകാലത്തെ ഉയർന്ന ആവശ്യകതയും ഇന്ധന ലഭ്യതയെ ബാധിക്കാതിരിക്കാനും, കാർഷിക മേഖലയിലെയും മറ്റ് ഗതാഗത മേഖലയിലെയും പ്രവർത്തനങ്ങൾ തടസ്സപ്പെടാതിരിക്കാനുമാണ് ഈ നടപടി.

അടിയന്തര സാഹചര്യങ്ങളിൽ ഇളവുകൾ നൽകുന്ന മോട്ടോർ കാരിയർ സേഫ്റ്റി അഡ്മിനിസ്ട്രേഷന്റെ നിയമപ്രകാരമാണ് ഉത്തരവ്. എന്നാൽ സുരക്ഷാ റേറ്റിംഗിൽ വ്യവസ്ഥകളുള്ള ട്രാൻസ്പോർട്ട് കമ്പനികൾക്ക് ഈ ഇളവ് ബാധകമല്ല. ഇതിനുമുമ്പ് പ്രകൃതിദുരന്തങ്ങൾ, കാട്ടുതീ, അല്ലെങ്കിൽ കോവിഡ് മഹാമാരി തുടങ്ങിയ അടിയന്തര ഘട്ടങ്ങളിൽ മാത്രമാണ് ഇത്തരം ഇളവുകൾ നൽകിയിട്ടുള്ളത്.