ജീവനക്കാരുടെ പ്രതിഷേധവും പീഡനാരോപണവും: 'നോമ'യുടെ ചീഫ് ഷെഫ് റെനെ റെഡ്‌സെപ്പി രാജിവെച്ചു

MARCH 11, 2026, 10:27 PM

ലോകത്തിലെ ഏറ്റവും മികച്ച ഭക്ഷണശാലകളിലൊന്നായി അറിയപ്പെടുന്ന ഡെന്മാർക്കിലെ 'നോമ' ലോസ് ആഞ്ചലസിൽ തങ്ങളുടെ താൽക്കാലിക ശാഖ ആരംഭിച്ച ആദ്യ ദിനം തന്നെ വൻ പ്രതിഷേധത്തിനും അപ്രതീക്ഷിത രാജിക്കും സാക്ഷ്യം വഹിച്ചു.

സ്ഥാപകനും ലോകപ്രശസ്ത പാചകക്കാരനുമായ റെനെ റെഡ്‌സെപ്പി തന്റെ പദവി ഒഴിഞ്ഞതായി പ്രഖ്യാപിച്ചു. ജോലിസ്ഥലത്തെ പീഡനങ്ങളെക്കുറിച്ച് മുൻ ജീവനക്കാർ ഉന്നയിച്ച ഗുരുതരമായ ആരോപണങ്ങൾക്കും പ്രതിഷേധങ്ങൾക്കും പിന്നാലെയാണ് ഈ നാടകീയ നീക്കം.

ഒരാൾക്ക് 1,500 ഡോളർ (ഏകദേശം 1.25 ലക്ഷം രൂപ) നിരക്കുള്ള ഈ ഭക്ഷണശാലയുടെ ടിക്കറ്റുകളെല്ലാം ഇതിനകം വിറ്റുപോയിരുന്നു. എന്നാൽ ഉദ്ഘാടന ദിവസം സിൽവർ ലേക്കിലെ ഭക്ഷണശാലയ്ക്ക് മുന്നിൽ മുൻ ജീവനക്കാർ പ്രതിഷേധവുമായി ഒത്തുകൂടി.

റെഡ്‌സെപ്പിയുടെ കീഴിലുള്ള ജോലി തങ്ങളെ മാനസികമായും ശാരീരികമായും തകർത്തുവെന്ന് പ്രതിഷേധക്കാർ ആരോപിച്ചു. ജീവനക്കാരെ ശാരീരികമായി ഉപദ്രവിക്കുകയും അപമാനിക്കുകയും ചെയ്യുന്ന ക്രൂരമായ തൊഴിൽ സാഹചര്യമാണ് നോമയിൽ നിലനിന്നിരുന്നതെന്ന് മുൻ ഫെർമന്റേഷൻ ഡയറക്ടർ ജേസൺ ഇഗ്നാസിയോ വൈറ്റ് വെളിപ്പെടുത്തി.

തന്റെ പെരുമാറ്റം പലർക്കും ദോഷകരമായി ബാധിച്ചുവെന്ന് സമ്മതിച്ച റെഡ്‌സെപ്പി, സോഷ്യൽ മീഡിയയിലൂടെയാണ് രാജി വിവരം അറിയിച്ചത്. രണ്ട് പതിറ്റാണ്ടിലേറെ നീണ്ട നേതൃത്വത്തിന് ശേഷം താൻ മാറിനിൽക്കുകയാണെന്നും പുതിയ നേതൃത്വം ഭക്ഷണശാലയെ മുന്നോട്ട് നയിക്കുമെന്നും അദ്ദേഹം പറഞ്ഞു.

അതേസമയം, തങ്ങളുടെ ആവശ്യങ്ങൾ അംഗീകരിച്ചില്ലെങ്കിൽ നിയമനടപടികളുമായി മുന്നോട്ട് പോകുമെന്ന് മുൻ ജീവനക്കാർ മുന്നറിയിപ്പ് നൽകിയിട്ടുണ്ട്. അതിപ്രശസ്തമായ ഈ സ്ഥാപനത്തിന്റെ തിളക്കത്തിന് പിന്നിലെ കറുത്ത വശങ്ങൾ ചർച്ചയായത് ആഗോള ഭക്ഷണപ്രേമികൾക്കിടയിൽ വലിയ ഞെട്ടലുണ്ടാക്കിയിരിക്കുകയാണ്.