കുടിയേറ്റക്കാരെ നാടുകടത്താൻ സ്വന്തമായി വിമാനങ്ങൾ വാങ്ങാൻ നീക്കവുമായി ഐ.സി.ഇ

AUGUST 20, 2025, 8:54 PM

വാഷിങ്ടൺ: ഹോംലാൻഡ് സെക്യൂരിറ്റി സെക്രട്ടറി ക്രിസ്റ്റി നോം, കുടിയേറ്റക്കാരെ നാടുകടത്തുന്നതിനായി Immigration and Customs Enforcement (ICE) സ്ഥാപനം സ്വന്തം വിമാനങ്ങൾ വാങ്ങി പ്രവർത്തിപ്പിക്കണമെന്ന നിർദ്ദേശം മുന്നോട്ടുവെച്ചതായി റിപ്പോർട്ടുകൾ.

എന്നാൽ വിമാനങ്ങൾ സ്വന്തമാക്കുകയും പരിപാലിക്കുകയും ചെയ്യുന്നത് വലിയ ചെലവേറിയ കാര്യമാകും എന്നാണ് മുൻ ഉദ്യോഗസ്ഥർ പറയുന്നത്. പക്ഷേ, അതിലൂടെ പ്രതിമാസം ഇരട്ടിയോളം ആളുകളെ നാടുകടത്താൻ ICE-യ്ക്ക് കഴിയുമെന്നും അവർ വിലയിരുത്തുന്നു.

ഇപ്പോൾ ICE പതിവായി ചാർട്ടർ വിമാനങ്ങളാണ് ഉപയോഗിക്കുന്നതെന്നാണ് 2022–23 കാലയളവിൽ ICE ചീഫ് ഓഫ് സ്റ്റാഫായിരുന്ന ജേസൺ ഹൗസർ പറയുന്നത്. സാധാരണയായി 8 മുതൽ 14 വരെ വിമാനങ്ങൾ ഒരേസമയം ചാർട്ട് ചെയ്യാറുണ്ട്. അതുവഴി ബൈഡൻ ഭരണകാലത്ത് പ്രതിമാസം ഏകദേശം 15,000 പേരെ നാടുകടത്താൻ കഴിഞ്ഞു.

എന്നാൽ "30,000–35,000 പേരെ മാസത്തിൽ നാടുകടത്തണമെങ്കിൽ, വിമാനങ്ങളുടെ എണ്ണം ഇരട്ടിയാക്കണം, അല്ലെങ്കിൽ ഏകദേശം 30 വിമാനങ്ങൾ സ്വന്തമാക്കണം" എന്നും അദ്ദേഹം കൂട്ടിച്ചേർത്തു. സ്വന്തമായി 30 വിമാനങ്ങൾ ഉണ്ടായാൽ, ICE ഇപ്പോൾ ആശ്രയിക്കുന്ന സ്വകാര്യ ചാർട്ടർ കമ്പനികളുടെ നിയന്ത്രണങ്ങളിൽ നിന്ന് മോചിതരാകും.

അതേസമയം ട്രംപ് ഭരണകൂടം ഓരോ വർഷവും 10 ലക്ഷം അനധികൃത കുടിയേറ്റക്കാരെ നാടുകടത്തുമെന്ന് ആണ് വ്യക്തമാക്കിയിട്ടുള്ളത്. അദ്ദേഹം അധികാരത്തിലേറിയ ആദ്യ ആറു മാസത്തിനിടെ തന്നെ 1–1.5 ലക്ഷം പേരെ (സ്വമേധയാ നാട്ടിലേക്ക് മടങ്ങിയവരെയും ഉൾപ്പെടുത്തി) നാടുകടത്തിയതായി ആഭ്യന്തര ഡാറ്റ പറയുന്നു. യുഎസിലെ അനധികൃത കുടിയേറ്റക്കാരുടെ കൃത്യമായ എണ്ണം വ്യക്തമല്ലെങ്കിലും, അത് ദശലക്ഷങ്ങൾ ആയിരിക്കുമെന്നാണ് കണക്കുകൾ.

എന്നാൽ ഒരു വിമാനത്തിന്റെ വില $80 മില്യൺ മുതൽ $400 മില്യൺ വരെ വരാമെന്ന് വ്യോമയാന വിദഗ്ധർ പറയുന്നു. 30 വിമാനങ്ങൾ വാങ്ങണമെങ്കിൽ $2.4 ബില്യൺ മുതൽ $12 ബില്യൺ വരെ ചെലവ് വരും. എന്നാൽ വലിയ തോതിൽ വാങ്ങുമ്പോൾ വില കുറയുമോ എന്നത് വ്യക്തമല്ല.

ചാർട്ടർ കമ്പനികൾ ഇപ്പോൾ വിമാനങ്ങളുടെ പരിപാലനവും Federal Aviation Administration നിയമാനുസരണം പ്രവർത്തനവും ഉറപ്പാക്കുന്നു. എന്നാൽ സ്വന്തമായി വിമാനങ്ങൾ വാങ്ങിയാൽ, പൈലറ്റുമാർ, സുരക്ഷാ ഉദ്യോഗസ്ഥർ, മെഡിക്കൽ ടീമുകൾ, എന്നിവയെല്ലാം ICE-ക്കു തന്നെ നിയമിക്കേണ്ടിവരും.

പ്രസിഡന്റ് ട്രംപ് അവതരിപ്പിച്ച ബിഗ് ബിൽ വഴി ICE-ക്ക് $30 ബില്യൺ ലഭിച്ചിട്ടുണ്ട്. ആകെ ബജറ്റ് $75 ബില്യണായി ഉയർന്ന് മുൻകാലത്തെ $9.5 ബില്യണിന്റെ പല ഇരട്ടിയായി ആണ് തുക ലഭിച്ചത്.

ഈ ഫണ്ടിൽ നിന്നാണ് വിമാനങ്ങൾ വാങ്ങാൻ സാധ്യത കാണുന്നത്. ICE തടങ്കൽ കേന്ദ്രങ്ങളിൽ തിരക്ക് കൂടുന്നത് ഒഴിവാക്കാൻ കൂടുതൽ നാടുകടത്തൽ ആവശ്യമാണ് എന്നാണ് വിദഗ്ധർ വ്യക്തമാക്കുന്നത്.