സുരക്ഷാ വിവാദങ്ങൾക്കിടെ ലോകകപ്പ് സുരക്ഷയിൽ ICE നിർണായക പങ്ക് വഹിക്കും

FEBRUARY 11, 2026, 7:40 PM

അമേരിക്കയിൽ നടക്കുന്ന ലോകകപ്പിന്റെ സുരക്ഷയിൽ ICE നിർണായക പങ്ക് വഹിക്കുമെന്ന് റിപ്പോർട്ട്. യുഎസ് ഇമിഗ്രേഷൻ ആൻഡ് കസ്റ്റംസ് എൻഫോഴ്‌സ്‌മെന്റ് (ICE) താത്കാലിക മേധാവി ആണ് ഇക്കാര്യം കോൺഗ്രസ് കമ്മിറ്റിക്ക് മുന്നിൽ അറിയിച്ചത്.

ഈ വേനൽക്കാലത്തെ ലോകകപ്പ് മത്സരങ്ങൾക്കിടെ ICE നടപടികൾ താൽക്കാലികമായി നിർത്തുമോ എന്ന ചോദ്യത്തിന് മറുപടിയായി, സുരക്ഷാ സംവിധാനത്തിന്റെ പ്രധാന ഘടകമായിരിക്കും ICE എന്ന് ടോഡ് ലയൺസ് വ്യക്തമാക്കി.

അതേസമയം മിനിയാപൊളിസിൽ പ്രസിഡന്റ് ഡോണൾഡ് ട്രംപിന്റെ കുടിയേറ്റ നിയന്ത്രണ നടപടികളുടെ ഭാഗമായി ICE ഏജന്റുമാർ വെടിവെച്ച് രണ്ട് അമേരിക്കൻ പൗരന്മാർ കൊല്ലപ്പെട്ട സംഭവത്തെ തുടർന്ന്, ലയൺസിനെയും മറ്റ് ഉന്നത ഉദ്യോഗസ്ഥരെയും ഹൗസ് ഹോംലാൻഡ് സെക്യൂരിറ്റി കമ്മിറ്റി ചോദ്യം ചെയ്തിരുന്നു. അലക്സ് പ്രെട്ടിയും റെനെ ഗുഡും കൊല്ലപ്പെട്ടത് രാജ്യവ്യാപക പ്രതിഷേധത്തിന് കാരണമായിരുന്നു.

ന്യൂ ജേഴ്സിയിലെ മെറ്റ്‌ലൈഫ് സ്റ്റേഡിയം — ലോകകപ്പ് ഫൈനൽ നടക്കാനിരിക്കുന്ന വേദി എന്നിവ ഉൾപ്പെടുന്ന മണ്ഡലത്തെ പ്രതിനിധീകരിക്കുന്ന നെല്ലി പോവ്, ഫിഫ മത്സരങ്ങൾ നടക്കുന്ന സമയത്ത് ICE നടപടികൾ നിർത്തിവെക്കുമോ എന്ന് ചോദിച്ചു. അതുപോലെ സന്ദർശകരുടെ ആത്മവിശ്വാസം കുറഞ്ഞുവരുന്നതായി അവർ മുന്നറിയിപ്പ് നൽകി.

“ഈ ടൂർണമെന്റിന്റെ സുരക്ഷ ഉറപ്പാക്കാനും പങ്കെടുക്കുന്നവർക്കും സന്ദർശകർക്കും സുരക്ഷിതമായ അനുഭവം നൽകാനും ICE പ്രതിബദ്ധമാണ്” എന്ന് അതിന് മറുപടിയായി ലയൺസ് പറഞ്ഞു. “ആരാധകർ തെറ്റായി അറസ്റ്റ് ചെയ്യപ്പെടുമെന്നോ പിടിക്കപ്പെടുമെന്ന് ഭയപ്പെട്ടാൽ, അത് ലോകകപ്പ് പ്രക്രിയയെ ബാധിക്കും,” എന്ന് പോവ് ചൂണ്ടിക്കാട്ടി. അതിനും ലയൺസ് ICE സുരക്ഷ ഉറപ്പാക്കുമെന്ന മറുപടി ആവർത്തിച്ചു.

അതേസമയം എൻഫോഴ്‌സ്‌മെന്റ് നടപടിക്കിടെ ഗുഡിനെയും പ്രെട്ടിയെയും പലവട്ടം വെടിവെച്ചാണ് കൊലപ്പെടുത്തിയതെന്ന് റിപ്പോർട്ടുകൾ പറയുന്നു. ഈ മരണങ്ങളും ICEയുടെ വ്യാപക നടപടികളും മിനിയാപൊളിസിൽ വലിയ പ്രതിഷേധത്തിന് ഇടയാക്കി. അനധികൃത കുടിയേറ്റത്തിനെതിരെ നടപടികൾ ശക്തമാക്കാൻ ഏകദേശം 3,000 ഏജന്റുമാരെ വിന്യസിച്ചിരുന്നു. പിന്നീട് ചിലർ നഗരത്തിൽ നിന്ന് പിന്മാറി.

കഴിഞ്ഞ മാസം ഫുട്ബോൾ സപ്പോർട്ടേഴ്‌സ് യൂറോപ്പ് (FSE), അമേരിക്കയിലെ പോലീസിന്റെ “അധിക സൈനികവൽക്കരണം” ലോകകപ്പിന് മുമ്പ് വലിയ ആശങ്കയാണ് ഉണ്ടാക്കുന്നതെന്ന് മാധ്യമങ്ങളോട് പറഞ്ഞു. സുരക്ഷാ ഉറപ്പുകൾ ലഭിക്കാത്ത പക്ഷം ടൂർണമെന്റിൽ നിന്ന് പിന്മാറണമെന്ന് ദേശീയ ഫുട്ബോൾ ഫെഡറേഷനുകളോട് ആവശ്യപ്പെടാൻ സാധ്യതയുണ്ടെന്നും യൂറോപ്യൻ ഡെമോക്രാറ്റിക് പാർട്ടി (EDP) അറിയിച്ചു.

എന്നാൽ ആരാധകരുടെയും പങ്കാളികളുടെയും സുരക്ഷയാണ് ഏറ്റവും മുൻഗണനയെന്ന് ഫിഫ വ്യക്തമാക്കി. പ്രാദേശിക അധികാരികളുമായി ചേർന്ന് സമഗ്ര സുരക്ഷാ സംവിധാനങ്ങൾ ഒരുക്കുന്നുണ്ടെന്നും അവർ കൂട്ടിച്ചേർത്തു. അമേരിക്ക 11 നഗരങ്ങളിലായി 78 മത്സരങ്ങൾക്ക് ആണ് വേദിയാകുക. സഹ ആതിഥേയരായ കാനഡയും മെക്സിക്കോയും 13 മത്സരങ്ങൾ വീതം സംഘടിപ്പിക്കും.