മേജർ ലീഗ് സോക്കറിൽ ക്യാപ്ടൻ ലിയോണൽ മെസിയുടെ തകർപ്പൻ പ്രകടനത്തിൽ അറ്റ്‌ലാന്റ യുണൈറ്റഡിനെ തകർത്ത് ഇന്റർ മയാമി. ഒന്നിനെതിരെ മൂന്ന് ഗോളുകൾക്കാണ് മയാമി അറ്റ്‌ലാന്റയുടെ ഹോം ഗ്രൗണ്ടിൽ വിജയം കൊയ്തത്. വെറും നാല് മിനിറ്റിനിടെ രണ്ട് ഗോളുകൾ നേടി മെസി തിളങ്ങിയ മത്സരത്തിൽ ക്രിസ്റ്റ്യൻ 'കിലി' ഗോൺസാലസിന് കീഴിൽ തുടർച്ചയായ മൂന്നാം വിജയം സ്വന്തമാക്കാനും മയാമിക്കായി.
മത്സരത്തിന്റെ ആദ്യപകുതിയുടെ അവസാന നിമിഷങ്ങളിൽ മെസിയും സുവാരസും ചേർന്ന് നടത്തിയ നീക്കത്തിനൊടുവിൽ ജർമൻ ബെർതെറാമെയാണ് ഇന്റർ മയാമിയുടെ ആദ്യ ഗോൾ നേടിയത്. തുടർന്ന് രണ്ടാം പകുതിയിലാണ് മെസിയുടെ വിസ്മയിപ്പിക്കുന്ന പ്രകടനം കണ്ടത്. 56-ാം മിനിറ്റിൽ ബെർതെറാമെയുടെ പാസ് സ്വീകരിച്ച് അറ്റ്‌ലാന്റ പ്രതിരോധ നിരയെ വകഞ്ഞുമാറ്റി മെസി ആദ്യ ഗോൾ കണ്ടെത്തി. തൊട്ടുപിന്നാലെ 60-ാം മിനിറ്റിൽ ലൂയിസ് സുവാരസ് നൽകിയ മനോഹരമായ പാസ് സ്വീകരിച്ച് മൈതാനമധ്യത്തുനിന്ന് ഒറ്റക്ക് മുന്നേറി എതിർ പ്രതിരോധ താരത്തെയും ഗോൾകീപ്പറെയും കാഴ്ചക്കാരാക്കി മെസി തന്റെ രണ്ടാം ഗോളും വലയിലാക്കി. 89-ാം മിനിറ്റിൽ പെനാൽറ്റിയിലൂടെ ഫാഫാ പികോ അറ്റ്‌ലാന്റയുടെ ആശ്വാസ ഗോൾ കണ്ടെത്തിയെങ്കിലും അത് മത്സരഫലത്തെ ബാധിച്ചില്ല.
ഈ സീസണിലെ മികച്ച ഫോം തുടരുന്ന മെസി നിലവിൽ 25 ഗോളുകളോടെ എംഎൽഎസ് ടോപ് സ്‌കോറർ പട്ടികയിൽ ബഹുദൂരം മുന്നിലാണ്. മത്സരത്തിലെ ആദ്യ ഗോളിന് വഴിയൊരുക്കിയതോടെ തുടർച്ചയായ മൂന്ന് എംഎൽഎസ് സീസണുകളിൽ 15ലധികം അസിസ്റ്റുകൾ തികയ്ക്കുന്ന ആദ്യ താരമെന്ന ചരിത്ര റെക്കോർഡും മെസി സ്വന്തമാക്കി. മറ്റ് ലീഗ് മത്സരങ്ങളിൽ സെന്റ് ലൂയിസ് സിറ്റിയുടെ 19 മത്സരങ്ങൾ നീണ്ട അപരാജിത കുതിപ്പ് മിനസോട്ടയോട് 3-2ന് തോറ്റതോടെ അവസാനിച്ചു. ഷാർലറ്റിനോട് 2-2ന് സമനില വഴങ്ങിയ ഫിലാഡൽഫിയ യൂണിയൻ തങ്ങളുടെ തോൽവി അറിയാതെയുള്ള മുന്നേറ്റം 15 മത്സരങ്ങളിലേക്ക് നീട്ടി.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20261018031631.jpg)
