കഷ്ടിച്ച് ജയിച്ച് ആഴ്‌സണലും വിജയം തുടർന്ന് എവർട്ടണും

NOVEMBER 8, 2026, 8:22 AM

ഇംഗ്ലീഷ് പ്രീമിയർ ലീഗിലെ വമ്പൻ പോരാട്ടങ്ങളിൽ ആഴ്‌സണൽ കഷ്ടിച്ച് ജയിച്ച് കയറിയപ്പോൾ ടോട്ടനത്തിന്റെ നിരാശപ്പെടുത്തുന്ന പ്രകടനം തുടരുന്നു. എവർട്ടൻ വിജയത്തോടെ മുന്നേറിയപ്പോൾ ആഴ്‌സണൽ കിരീടത്തിലേക്കുള്ള പോരാട്ടത്തിൽ മാഞ്ചസ്റ്റർ സിറ്റിക്ക് വലിയ വെല്ലുവിളി നൽകിയാണ് മുന്നോട്ട് പോകുന്നത്.

അവസാന മൂന്ന് മത്സരവും ജയിച്ചാണ് ടോട്ടനം ലീഡ്‌സിനെതിരേ ഇറങ്ങിയത്. അവസാന മൂന്ന് മത്സരത്തിൽ രണ്ട് ജയവും ഒരു തോൽവിയും നേരിട്ട ലീഡ്‌സ് ഒറ്റ ഗോളിനാണ് ടോട്ടനത്തെ വീഴ്ത്തിയത്. 61% പന്തടക്കത്തിൽ മുന്നിട്ട് നിന്നത് ടോട്ടനം ആണെങ്കിലും ആക്രമണത്തിൽ ലീഡ്‌സിനായിരുന്നു ആധിപത്യം. ഏഴിനെതിരേ 16 ഷോട്ടുകൾ തൊടുത്ത ലീഡ്‌സ് ഒന്നിനെതിരേ നാല് വലിയ അവസരങ്ങൾ സൃഷ്ടിക്കുകയും ചെയ്തു.

എന്നാൽ മത്സരഫലത്തെ മാറ്റി മറിച്ചത് ലീഡ്‌സ് പരിശീലകനായ ഡാനിയൽ ഫാർക്ക് നടത്തിയ നീക്കമാണ്. ഗോളടിക്കാനാവാതെ ഇരു ടീമും പ്രയാസപ്പെട്ടപ്പോൾ 77-ാം മിനുട്ടിൽ ലൂക്കാസ് നമീച്ചയെ തിരികെ വിളിച്ച് പകരം നോഹ് ഒക്‌ഫോറിനെ കളത്തിലിറക്കാനുള്ള ലീഡ്‌സ് പരിശീലകന്റെ തീരുമാനം മത്സരത്തിൽ വലിയ സ്വാധീനം സൃഷ്ടിച്ചു. കളത്തിലിറങ്ങി രണ്ട് മിനുട്ടിനുള്ളിൽ ഒക്‌ഫോർ ലക്ഷ്യം കണ്ടു. ഈ ലീഡ് നിലനിർത്തിയ ലീഡ് ഒടുവിൽ ഒറ്റ ഗോളിന് ടോട്ടനത്തെ മുട്ടുകുത്തിക്കുകയും ചെയ്തു.

10 മത്സരം കഴിയുമ്പോൾ മൂന്ന് വീതം ജയവും സമനിലയും നാല് തോൽവിയും ഉൾപ്പെടെ 12 പോയിന്റോടെ 11-ാം സ്ഥാനത്താണ് ടോട്ടനമുള്ളത്. ഈ സീസണിൽ പ്രതീക്ഷിച്ച നിലവാരം കാട്ടാനാവാതെ ടോട്ടനം വളരെയധികം പ്രയാസപ്പെടുകയാണെന്ന് പറയാം. സീസണിൽ മൂന്ന് ജയവും അഞ്ച് സമനിലയും രണ്ട് തോൽവിയും നേരിട്ട ലീഡ്‌സ് 14 പോയിന്റോടെ എട്ടാം സ്ഥാനത്താണുള്ളത്.

അതേ സമയം 25 വർഷത്തിന് ശേഷം ഇംഗ്ലീഷ് പ്രീമിയർ ലീഗിലേക്ക് മടങ്ങിയെത്തിയ കവൻഡ്രി സിറ്റി എഫ്‌സിയെ എവർട്ടൻ 3-1ന് തകർത്തുവിട്ടു. ഗോളൊഴിഞ്ഞു നിന്ന ആദ്യ പകുതിക്ക് ശേഷമാണ് മത്സരത്തിലെ നാല് ഗോളുകളും പിറന്നത് എന്നതാണ് എടുത്തു പറയേണ്ടത്. മികച്ച പ്രതിരോധം തീർത്ത് എവർട്ടനെ പൂട്ടാൻ ആദ്യ പകുതിയിൽ കവൻഡ്രിക്ക് സാധിച്ചെങ്കിലും രണ്ടാം പകുതിയിൽ ശക്തമായി തിരിച്ചെത്തുകയായിരുന്നു.

52-ാം മിനുട്ടിൽ യാൻ ഗോഹോയുടെ ഗോളിൽ കവൻഡ്രിയാണ് ആദ്യം ലീഡെടുത്തത്. എന്നാൽ നാല് മിനുട്ടിനുള്ളിൽ തിയീർനോ ബാറിയുടെ ഗോളിലൂടെ എവർട്ടൻ സമനില പിടിച്ചു. 61-ാം മിനുട്ടിൽ ബാറിയിലൂടെത്തന്നെ എവർട്ടൻ ലീഡുയർത്തി. 81-ാം മിനുട്ടിൽ കിർനാൻ ഡൗസ്ബറി ഹാളിലൂടെയാണ് എവർട്ടൻ മൂന്നാം ഗോൾ അക്കൗണ്ടിൽ ചേർത്തത്.

10 മത്സരത്തിൽ നിന്ന് നാല് വീതം ജയവും സമനിലയും രണ്ട് തോൽവിയും നേരിട്ട എവർട്ടൻ 16 പോയിന്റോടെ അഞ്ചാം സ്ഥാനത്തുണ്ട്. ഒമ്പത് പോയിന്റുള്ള കവൻഡ്രി 16-ാം സ്ഥാനത്താണുള്ളത്. നിലവിലെ ചാമ്പ്യന്മാരായ ആഴ്‌സണൽ ഒറ്റ ഗോളിനാണ് ഹൾ സിറ്റിയോട് രക്ഷപെട്ടത്.

ആദ്യ പകുതിയിൽ ആഴ്‌സണലിനെ ഗോൾരഹിത സമനിലയിൽ പൂട്ടാൻ ഹൾ സിറ്റിക്കായി. 72-ാം മിനുട്ടിലാണ് ആഴ്‌സണൽ വിജയ ഗോൾ നേടിയെടുത്തത്. മാർട്ടിൻ ഒഡേഗാർഡാണ് ആഴ്‌സണലിന്റെ വിജയ ഗോൾ നേടിയെടുത്തത്. 10ൽ ഒമ്പത് ജയവും ഒരു തോൽവിയുമായി 27 പോയിന്റോടെ ആഴ്‌സണൽ കുതിപ്പ് തുടരുകയാണ്. രണ്ടാം സ്ഥാനത്തുള്ള മാഞ്ചസ്റ്റർ സിറ്റിക്ക് ഒമ്പത് മത്സരത്തിൽ നിന്ന് 21 പോയിന്റാണുള്ളത്.