'പ്രായമല്ല പ്രധാനം, ഫിറ്റാണെങ്കിൽ രോഹിതും വിരാടും ലോകകപ്പ് കളിക്കും'; ബി.സി.സി.ഐ അധ്യക്ഷൻ

OCTOBER 21, 2026, 3:59 AM

2027-ലെ ഏകദിന ലോകകപ്പിനുള്ള ഇന്ത്യൻ ടീമിൽ വിരാട് കോഹ്‌ലിയുടെയും രോഹിത് ശർമ്മയുടെയും സാധ്യതകളെക്കുറിച്ച് നിലപാട് വ്യക്തമാക്കി ബി.സി.സി.ഐ പ്രസിഡന്റ് മിഥുൻ മൻഹാസ്. താരങ്ങളുടെ പ്രായമല്ല, മറിച്ച് ഫിറ്റ്‌നസും ഗ്രൗണ്ടിലെ പ്രകടനവുമാണ് സെലക്ഷനുള്ള മാനദണ്ഡമെന്ന് അദ്ദേഹം വ്യക്തമാക്കി. ന്യൂസിലൻഡ് പര്യടനത്തിന് മുന്നോടിയായി 'സ്പോർട്സ് സ്റ്റാർ' മാധ്യമത്തിന് നൽകിയ അഭിമുഖത്തിലാണ് മൻഹാസ് ഇക്കാര്യം വ്യക്തമാക്കിയത്.

അടുത്ത വർഷം ഒക്ടോബർ, നവംബർ മാസങ്ങളിലായി ദക്ഷിണാഫ്രിക്ക, സിംബാബ്‌വെ, നമീബിയ എന്നീ രാജ്യങ്ങളിലായാണ് ഏകദിന ലോകകപ്പ് നടക്കുന്നത്. ടി20, ടെസ്റ്റ് ക്രിക്കറ്റുകളിൽ നിന്ന് ഇതിനോടകം വിരമിച്ച രോഹിത് ശർമ്മയും വിരാട് കോഹ്‌ലിയും തങ്ങളുടെ കരിയറിലെ അവസാന ലോകകപ്പിനായുള്ള തയ്യാറെടുപ്പിലാണ്. 2027 ഏപ്രിലിൽ രോഹിത് ശർമ്മയ്ക്ക് 40 വയസ്സും, ലോകകപ്പ് വേളയിൽ വിരാട് കോഹ്‌ലിക്ക് 38 വയസ്സും തികയും. എങ്കിലും പ്രായമല്ല പ്രധാനമെന്ന് ബി.സി.സി.ഐ പ്രസിഡന്റ് ആവർത്തിച്ചു.

"എന്റെ കാഴ്ചപ്പാടിൽ, ഫിറ്റ്‌നസും പ്രകടനവുമാണ് സെലക്ഷനുള്ള മാനദണ്ഡം, തീർച്ചയായും പ്രായമല്ല. ഒരാൾ കളിക്കാൻ ഫിറ്റാണെന്നും, മികച്ച പ്രകടനം കാഴ്ചവെച്ച് രാജ്യത്തിനായി മത്സരങ്ങൾ വിജയിപ്പിച്ചുകൊടുക്കുന്നുണ്ടെന്നും വന്നാൽ, നമ്മൾ ആ കാര്യത്തിൽ മാത്രമാണ് ശ്രദ്ധ കേന്ദ്രീകരിക്കേണ്ടത്," മൻഹാസ് പറഞ്ഞു.

യുവതാരം ശുഭ്മാൻ ഗില്ലിന്റെ ക്യാപ്റ്റൻസി വളർച്ചയ്ക്ക് രോഹിത്തിന്റെയും കോഹ്‌ലിയുടെയും സാന്നിധ്യം വലിയ മുതൽക്കൂട്ടാകുമെന്ന് മൻഹാസ് അഭിപ്രായപ്പെട്ടു. "എം.എസ്. ധോണിയുടെ കീഴിൽ വിരാട് കോഹ്‌ലി വളർന്നുവന്നതുപോലെയും, സൗരവ് ഗാംഗുലിയുടെ മാർഗ്ഗനിർദ്ദേശം ധോണിക്ക് ലഭിച്ചതുപോലെയും ഗില്ലിന് ഈ സീനിയർ താരങ്ങളുടെ സാന്നിധ്യം സഹായകരമാകും. ജസ്പ്രീത് ബുംറ ഉൾപ്പെടെയുള്ളവരുടെ നേതൃപാടവവും ടീമിന് കരുത്താകും," അദ്ദേഹം കൂട്ടിച്ചേർത്തു.

അതേസമയം, ഒക്ടോബർ 22 മുതൽ ആരംഭിക്കുന്ന ന്യൂസിലൻഡിനെതിരായ പരമ്പരയിൽ ഇന്ത്യ അഞ്ച് ടി20 മത്സരങ്ങളും, അഞ്ച് ഏകദിനങ്ങളും, രണ്ട് ടെസ്റ്റുകളുമാണ് കളിക്കുന്നത്. നവംബർ 4 മുതൽ 15 വരെയാണ് ഏകദിന പരമ്പര നടക്കുന്നത്. 2027 ലോകകപ്പിനുള്ള ഒരുക്കങ്ങളുടെ ഭാഗമായി രോഹിതും വിരാടും ഈ പരമ്പരയിൽ കളിക്കുന്നത് ഏറെ നിർണ്ണായകമാണ്.