‘ഒടിയൻ’ ആയി പൃഥ്വിരാജ്; രാഹുൽ സദാശിവന്റെ ഹൊറർ ത്രില്ലറിൽ മഞ്ജു വാര്യരും

JUNE 16, 2026, 11:20 PM

മലയാള സിനിമയിൽ വലിയ കൗതുകമുണർത്തുന്ന പ്രഖ്യാപനവുമായി സംവിധായകൻ രാഹുൽ സദാശിവൻ. പൃഥ്വിരാജ്യും മഞ്ജു വാര്യർയും കേന്ദ്ര കഥാപാത്രങ്ങളാകുന്ന പുതിയ ചിത്രത്തിന് ‘ഒടിയൻ’ എന്നാണ് പേര് നൽകിയിരിക്കുന്നത്. ഹൊറർ-ത്രില്ലർ വിഭാഗത്തിൽ ഒരുങ്ങുന്ന ചിത്രം രാഹുൽ സദാശിവനും ഈ താരജോഡിയും ആദ്യമായി ഒന്നിക്കുന്ന പ്രോജക്ട് കൂടിയാണ്.

ധർമ്മ പ്രൊഡക്ഷൻസും പൃഥ്വിരാജ് പ്രൊഡക്ഷൻസും ചേർന്നാണ് ചിത്രം നിർമ്മിക്കുന്നത്. കരൺ ജോഹർ നേതൃത്വം നൽകുന്ന ധർമ്മ പ്രൊഡക്ഷൻസ് ആദ്യമായി ഒരു മലയാള സിനിമയുടെ നിർമ്മാണ പങ്കാളിയാകുന്നു എന്ന പ്രത്യേകതയും ചിത്രത്തിനുണ്ട്. സുപ്രിയ മേനോനും നിർമ്മാണത്തിൽ പങ്കാളിയാണ്.

മലയാളം, തമിഴ്, തെലുങ്ക്, കന്നഡ, ഹിന്ദി ഭാഷകളിലായി ഒരുങ്ങുന്ന ചിത്രത്തിന്റെ രചനയും സംവിധാനവും രാഹുൽ സദാശിവൻ തന്നെയാണ് നിർവഹിക്കുന്നത്. “സത്യവും മായയും തമ്മിലുള്ള യുദ്ധം” എന്നതാണ് ചിത്രത്തിന്റെ ടാഗ്‌ലൈൻ. ഓഗസ്റ്റിൽ ചിത്രീകരണം ആരംഭിക്കുമെന്നാണ് വിവരം.

‘റെഡ് റെയിൻ’, ‘ഭൂതകാലം’, ‘ഭ്രമയുഗം’, ‘ഡീയസ് ഇരെ’ എന്നീ ചിത്രങ്ങൾക്ക് ശേഷം രാഹുൽ സദാശിവൻ സംവിധാനം ചെയ്യുന്ന സിനിമയായതിനാൽ തന്നെ പ്രഖ്യാപനഘട്ടത്തിൽ തന്നെ വലിയ പ്രതീക്ഷയാണ് ചിത്രത്തിന് ലഭിക്കുന്നത്.

ഇത് മൂന്നാം തവണയാണ് പൃഥ്വിരാജും മഞ്ജു വാര്യരും ഒരുമിച്ച് അഭിനയിക്കുന്നത്. മുമ്പ് ‘പാവാട’, ‘ലൂസിഫർ’, ‘എമ്പുരാൻ’ എന്നീ ചിത്രങ്ങളിൽ ഇരുവരും ഒന്നിച്ചിരുന്നു.

അതേസമയം, 2018-ൽ വി.എ. ശ്രീകുമാർ മേനോൻ സംവിധാനം ചെയ്ത് മോഹൻലാൽ നായകനായ ‘ഒടിയൻ’ എന്ന ചിത്രം പുറത്തിറങ്ങിയിരുന്നു. ആ ചിത്രത്തിലും മഞ്ജു വാര്യർ തന്നെയായിരുന്നു നായിക. അതേ പേരിൽ വീണ്ടും ഒരു മലയാള സിനിമ എത്തുന്നു എന്നതാണ് പുതിയ പ്രഖ്യാപനത്തിലെ ശ്രദ്ധേയമായ മറ്റൊരു പ്രത്യേകത.

മലയാള സിനിമയിലെ നിലവിലെ ചട്ടപ്രകാരം, നിർമ്മാതാവിന്റെ അനുമതിയോടെ മുമ്പ് ഉപയോഗിച്ച സിനിമാ ടൈറ്റിലുകൾ വീണ്ടും ഉപയോഗിക്കാൻ സാധിക്കും. അതുകൊണ്ടുതന്നെ ‘ഒടിയൻ’ എന്ന പേര് വീണ്ടും വെള്ളിത്തിരയിലെത്തുകയാണ്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്