'ഒരു മാസത്തിൽ 6 കിലോ കുറച്ചു, പിന്നെ വീണ്ടും വണ്ണം കൂട്ടി'; മോളിവുഡ് ടൈംസ് സിനിമയ്ക്കായി നടത്തിയ മേക്കോവർ തുറന്ന് പറഞ്ഞ് ഗോപിക രമേശ്

JULY 5, 2026, 9:07 PM

തിരുവനന്തപുരം: നസ്‌ലൻ പ്രധാന വേഷത്തിലെത്തിയ 'മോളിവുഡ് ടൈംസ്' അടുത്തിടെയാണ് തിയേറ്ററുകളിലെത്തിയത്. അഭിനവ് സുന്ദർ നായക് സംവിധാനം ചെയ്ത ചിത്രം കഴിഞ്ഞ ദിവസം ഒടിടിയിലും റിലീസ് ചെയ്തു. ചിത്രത്തിൽ പ്രധാന കഥാപാത്രങ്ങളിലൊന്നായി അഭിനയിച്ചത് യുവനടി ഗോപിക രമേശ് ആയിരുന്നു. 'തണ്ണീർ മത്തൻ ദിനങ്ങൾ' എന്ന ചിത്രത്തിലൂടെ ശ്രദ്ധ നേടിയ ഗോപിക, 'മോളിവുഡ് ടൈംസ്' സിനിമയിൽ ഒരു സിനിമാ നടിയുടെ വേഷമാണ് അവതരിപ്പിച്ചത്.

ചിത്രത്തിനായി ശരീരഭാരം കുറയ്ക്കുകയും പിന്നീട് വീണ്ടും കൂട്ടുകയും ചെയ്ത അനുഭവമാണ് ഗോപിക ഒരു അഭിമുഖത്തിൽ പങ്കുവെച്ചത്.

"എനിക്ക് പി.സി.ഒ.ഡി (PCOD) ഉണ്ട്. അതുകൊണ്ടുതന്നെ ജങ്ക് ഫുഡും എണ്ണ കൂടുതലുള്ള ഭക്ഷണവും അധികം കഴിക്കാൻ കഴിയില്ല. അതൊരു പേടി എനിക്കുണ്ടായിരുന്നു. സിനിമയുടെ ഓഡിഷന് പോകുമ്പോൾ വണ്ണം കൂട്ടണമെന്നോ കുറയ്ക്കണമെന്നോ അറിയില്ലായിരുന്നു. ഓഡിഷൻ കഴിഞ്ഞ് തിരഞ്ഞെടുക്കപ്പെട്ട ശേഷമാണ് കഥാപാത്രത്തിന് വേണ്ടി വണ്ണം കൂട്ടേണ്ടിവരുമെന്ന് അറിയുന്നത്. കഥയിൽ ഇങ്ങനെയൊരു സീൻ ഉണ്ടെന്ന് അപ്പോഴാണ് പറഞ്ഞത്.

അതിന് മുമ്പ് ചിത്രത്തിലെ യക്ഷിയുമായി ബന്ധപ്പെട്ട രംഗങ്ങൾ ചിത്രീകരിക്കേണ്ടതിനാൽ ഞാൻ ഒരു മാസം മുഴുവൻ കർശനമായ ഡയറ്റും വർക്ക്‌ഔട്ടും പിന്തുടർന്ന് ഏകദേശം ആറ് കിലോ ഭാരം കുറച്ചു," ഗോപിക പറഞ്ഞു.

യക്ഷിയുടെ രംഗങ്ങൾ പൂർത്തിയായതിന് ശേഷമാണ് വീണ്ടും വണ്ണം കൂട്ടേണ്ടി വന്നത്. എന്നാൽ അതിനായി അധികം സമയം ലഭിച്ചില്ലെന്നും, സാധ്യമായ രീതിയിൽ ഭക്ഷണം കഴിച്ച് ഒരു പരിധിവരെ ഭാരം കൂട്ടാൻ ശ്രമിച്ചുവെന്നും ഗോപിക പറഞ്ഞു.

"സിനിമയിൽ ഞാൻ ചിപ്സ് കഴിക്കുന്ന ഒരു രംഗമുണ്ട്. ആ രംഗത്തിൽ കാണുന്ന വണ്ണം ഞാൻ സ്വയം കൂട്ടിയതാണ്. അതിൽ വിഎഫ്എക്സ് (VFX) ഒന്നും ഉപയോഗിച്ചിട്ടില്ല," താരം വ്യക്തമാക്കി.

എന്നാൽ പിന്നീട് വരുന്ന ചില രംഗങ്ങളിൽ കഥാപാത്രത്തിന് ആവശ്യമായ ശരീരഘടന ലഭിക്കാൻ വേണ്ടത്ര സമയം ലഭിക്കാത്തതിനാൽ വിഎഫ്എക്സിന്റെ സഹായം ഉപയോഗിക്കേണ്ടി വന്നതായും ഗോപിക പറഞ്ഞു.

"കഥാപാത്രത്തിന് ആവശ്യമായ രീതിയിൽ ശരീരഭാരം കൂട്ടാൻ കുറച്ചുകൂടി സമയം വേണമായിരുന്നു. എന്നാൽ ഷെഡ്യൂളിന്റെ തിരക്ക് കാരണം അതിനുള്ള അവസരം ലഭിച്ചില്ല. അതുകൊണ്ടാണ് ചില രംഗങ്ങളിൽ വിഎഫ്എക്സ് ഉപയോഗിച്ചത്. എങ്കിലും ശരീരഭാരം കുറയ്ക്കുകയും കൂട്ടുകയും ചെയ്ത ആ മുഴുവൻ പ്രക്രിയയും ഞാൻ വളരെ ആസ്വദിച്ചു," ഗോപിക രമേശ് പറഞ്ഞു.