നഴ്‌സുമാരുടെ വേഷം മാറ്റണം, ഏറ്റവും കൂടുതൽ ലൈംഗികവൽക്കരിക്കപ്പെട്ട തൊഴിൽ; വിവാദ പ്രസ്താവനയുമായി കങ്കണ റണൗട്ട് എംപി

JUNE 8, 2026, 4:59 AM

നഴ്‌സുമാരുടെ വേഷം മാറ്റണമെന്ന ആവശ്യവുമായി നടിയും ബിജെപി എംപിയുമായ കങ്കണ റണൗട്ട്. നഴ്‌സിങ് എന്നത് ഏറ്റവുമധികം ലൈംഗികവൽക്കരിക്കപ്പെട്ട ഒരു തൊഴിലാണെന്നും അവരുടെ നിലവിലെ വേഷം ബ്രിട്ടീഷ് ഭരണകാലത്തേതാണെന്നുമാണ് കങ്കണയുടെ വാദം. ഈ വേഷം പൂർണ്ണമായും ഭാരതീയവൽക്കരിക്കണമെന്നും താരം നിലപാടെടുത്തു. ഇതിന് തൊട്ടുപിന്നാലെ കങ്കണയ്‌ക്കെതിരെ രാജ്യവ്യാപകമായും സമൂഹമാധ്യമങ്ങളിലും കടുത്ത വിമർശനവും ജനരോഷവും ഉയരുകയാണ്.

തന്റെ പുതിയ ചിത്രമായ 'ഭാരത് ഭാഗ്യവിധാതാ' എന്ന സിനിമയുടെ റിലീസിന് മുന്നോടിയായി സംഘടിപ്പിച്ച ഒരു ചടങ്ങിൽ വെച്ചായിരുന്നു കങ്കണയുടെ ഈ വിവാദ അഭിപ്രായപ്രകടനം.

നഴ്‌സുമാരോട് സമൂഹം കൂടുതൽ ബഹുമാനം കാണിക്കണം എന്ന് പറഞ്ഞുകൊണ്ടാണ് കങ്കണ സംസാരിച്ചു തുടങ്ങിയതെങ്കിലും പിന്നീട് അത് അധിക്ഷേപിക്കുന്ന തരത്തിലുള്ള പ്രസ്താവനകളിലേക്ക് മാറുകയായിരുന്നു. ഒന്നും രണ്ടും ലോകയുദ്ധകാലത്ത് യുഎസ് സേനയിലെ നഴ്‌സുമാർ ധരിച്ചിരുന്ന രീതിയിലുള്ള പിൻവെച്ച തൊപ്പിയും മറ്റുമാണ് ഇന്നും ഇവിടെ പിന്തുടരുന്നതെന്ന് കങ്കണ അവകാശപ്പെട്ടു.

ഈ വിദേശി വേഷം മാറ്റി നഴ്‌സുമാരുടെ യൂണിഫോം ഭാരതീയ രീതിയിലേക്ക് മാറ്റണമെന്നാണ് താരം ആവശ്യപ്പെടുന്നത്.ആശുപത്രികളിൽ എല്ലാത്തരം കഠിനമായ ജോലികളും ചെയ്യേണ്ടി വരുന്നത് നഴ്‌സുമാരാണെന്നും അവർ കൂട്ടിച്ചേർത്തു.

കങ്കണയുടെ ഈ പുതിയ പ്രസ്താവനയെ ചില ബിജെപി നേതാക്കൾ അനുകൂലിച്ച് രംഗത്തെത്തിയെങ്കിലും, പ്രതിപക്ഷ പാർട്ടികളും പൊതുജനങ്ങളും ഇതിനെതിരെ കടുത്ത ഭാഷയിലാണ് പ്രതികരിക്കുന്നത്. ഇത് ഭരണകക്ഷിയായ ബിജെപിയെ വീണ്ടും പ്രതിരോധത്തിലാക്കിയിരിക്കുകയാണ്.

നഴ്‌സുമാരുടെ യൂണിഫോം മാറ്റുകയല്ല ഇപ്പോൾ ചെയ്യേണ്ടത്, മറിച്ച് തകർന്ന ഭിത്തികളും ആവശ്യത്തിന് ഉപകരണങ്ങളുമില്ലാത്ത ഇന്ത്യയിലെ സർക്കാർ ആശുപത്രികളുടെ അടിസ്ഥാന സൗകര്യങ്ങളാണ് ആദ്യം മെച്ചപ്പെടുത്തേണ്ടതെന്ന് കോൺഗ്രസ് പാർട്ടി ശക്തമായി പ്രതികരിച്ചു.

മുൻപ് വിമാനത്താവളത്തിലെ സുരക്ഷാ ഉദ്യോഗസ്ഥയോട് മോശമായി പെരുമാറിയത് ഉൾപ്പെടെ നിരവധി തവണ വിവാദ പ്രസ്താവനകളിലൂടെയും പ്രവർത്തികളിലൂടെയും വാർത്തകളിൽ നിറഞ്ഞ കങ്കണയുടെ ഈ പുതിയ പരാമർശം ആരോഗ്യ മേഖലയിലെ ജീവനക്കാർക്കിടയിലും വലിയ പ്രതിഷേധത്തിന് കാരണമായിട്ടുണ്ട്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്