മുംബൈ: മുഗള്‍ ചക്രവര്‍ത്തി ഔറംഗസേബിനെ പുകഴ്ത്തിയ സമാജ്‌വാദി പാര്‍ട്ടി എംഎല്‍എ അബു ആസ്മിയെ മഹാരാഷ്ട്ര നിയമസഭയില്‍ നിന്ന് സസ്പെന്‍ഡ് ചെയ്തു. നാല് തവണ എംഎല്‍എയായ അദ്ദേഹത്തെ സസ്പെന്‍ഡ് ചെയ്യാനുള്ള നിര്‍ദ്ദേശം പാര്‍ലമെന്ററി കാര്യ മന്ത്രി ചന്ദ്രകാന്ത് പാട്ടീല്‍ ബുധനാഴ്ച നടപടികള്‍ ആരംഭിച്ചയുടനെ അവതരിപ്പിച്ചു.

ഒന്നോ രണ്ടോ സെഷനുകളിലല്ല അസ്മിയെ മൊത്തത്തില്‍ എംഎല്‍എ എന്ന നിലയില്‍ സസ്പെന്‍ഡ് ചെയ്യണമെന്ന് ബിജെപി എംഎല്‍എ സുധീര്‍ മുങ്കന്തിവാര്‍ ആവശ്യപ്പെട്ടു. ഛത്രപതി ശിവാജി മഹാരാജ് ആദരണീയനാണ്, അദ്ദേഹത്തെ അപമാനിക്കുന്നവരെ അത്ര എളുപ്പം വെറുതെ വിടാനാകില്ലെന്നും അദ്ദേഹം പറഞ്ഞു.

മറാത്താ അഭിമാനങ്ങളിലൊന്നായ ഛത്രപതി ശിവാജിയുടെ മകന്‍ ഛത്രപതി സംഭാജി മഹാരാജിനെ കേന്ദ്രീകരിച്ചുള്ള 'ഛാവ' എന്ന സിനിമയിലെ ചരിത്ര സംഭവങ്ങളുടെ ചിത്രീകരണത്തെ വിമര്‍ശിച്ചതോടെയാണ് മാന്‍ഖുര്‍ദ് ശിവാജി നഗറില്‍ നിന്നുള്ള എംഎല്‍എ അസ്മി രാഷ്ട്രീയ വിവാദം സൃഷ്ടിച്ചത്. ഔറംഗസേബ് ഒരു 'നല്ല ഭരണാധികാരി' ആയിരുന്നുവെന്നും ഇന്ത്യയുടെ അതിര്‍ത്തികള്‍ അഫ്ഗാനിസ്ഥാനിലേക്കും പിന്നീട് ബര്‍മ്മയിലേക്കും എത്തിയെന്നും ആസ്മി ഊന്നിപ്പറഞ്ഞു.

'ചാവ'യില്‍ തെറ്റായ ചരിത്രമാണ് കാണിക്കുന്നത്... ഔറംഗസേബ് നിരവധി ക്ഷേത്രങ്ങള്‍ നിര്‍മ്മിച്ചു. അദ്ദേഹം ഒരു ക്രൂരനായ ഭരണാധികാരിയാണെന്ന് ഞാന്‍ കരുതുന്നില്ല,' ആസ്മി പറഞ്ഞു. ഔറംഗസേബിന്റെ ഭരണകാലത്ത് ഇന്ത്യയെ 'സ്വര്‍ണ്ണ പക്ഷി' എന്ന് വിളിച്ചിരുന്നുവെന്നും, ആഗോള ജിഡിപിയുടെ 24% രാജ്യത്തിന്റെ സമ്പദ്വ്യവസ്ഥയാണ് വഹിച്ചിരുന്നതെന്നും അദ്ദേഹം അവകാശപ്പെട്ടു.

അദ്ദേഹത്തിന്റെ പരാമര്‍ശം മഹാരാഷ്ട്ര നിയമസഭയില്‍ ബഹളമുണ്ടാക്കിയതോടെ ഉപമുഖ്യമന്ത്രി ഏകനാഥ് ഷിന്‍ഡെ അദ്ദേഹത്തെ സസ്പെന്‍ഡ് ചെയ്യണമെന്ന് ആവശ്യപ്പെട്ടു. ആസ്മി തന്റെ വിവാദ പരാമര്‍ശങ്ങള്‍ പിന്‍വലിക്കുകയും തന്റെ വാക്കുകള്‍ വളച്ചൊടിച്ചതാണെന്ന് ഊന്നിപ്പറയുകയും ചെയ്തു. എന്നിരുന്നാലും സസ്‌പെന്‍ഷനുമായി സ്പീക്കര്‍ മുന്നോട്ടു പോവുകയായിരുന്നു.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്