ന്യൂഡെല്‍ഹി: ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധി വിയറ്റ്‌നാമിലേക്കും മറ്റ് രാജ്യങ്ങളിലേക്കും തുടര്‍ച്ചയായി രഹസ്യ യാത്രകള്‍ നടത്തുകയാണെന്ന് ബിജെപി. ഇത്തരം വെളിപ്പെടുത്താത്ത യാത്രകള്‍ പ്രതിപക്ഷ നേതാവിന് യോജിച്ചതല്ലെന്നും ദേശീയ സുരക്ഷയെക്കുറിച്ചുള്ള ആശങ്കകള്‍ ഉയര്‍ത്തുന്നുവെന്നും ബിജെപി കുറ്റപ്പെടുത്തി.

രാഹുല്‍ ഗാന്ധിയുടെ വിദേശ സന്ദര്‍ശനങ്ങളെക്കുറിച്ചുള്ള വിശദാംശങ്ങള്‍ വെളിപ്പെടുത്തണമെന്ന് ബിജെപിയുടെ ദേശീയ ഐടി സെല്‍ തലവന്‍ അമിത് മാളവ്യ കോണ്‍ഗ്രസിനോട് ആവശ്യപ്പെട്ടു. 

'പ്രതിപക്ഷ നേതാവെന്ന നിലയില്‍ രാഹുല്‍ ഗാന്ധി നിര്‍ണായക സ്ഥാനം വഹിക്കുന്നു, പ്രത്യേകിച്ച് പാര്‍ലമെന്റ് സമ്മേളനം നടക്കുമ്പോള്‍ അദ്ദേഹം നടത്തുന്ന നിരവധി രഹസ്യ വിദേശ യാത്രകള്‍ ഔചിത്യത്തെയും ദേശീയ സുരക്ഷയെയും കുറിച്ച് ഗുരുതരമായ ചോദ്യങ്ങള്‍ ഉയര്‍ത്തുന്നു.' മാളവ്യ പറഞ്ഞു. 

രാവിലെ ഒരു പത്രസമ്മേളനത്തില്‍ സംസാരിക്കവെ, രാഹുല്‍ ഗാന്ധിയുടെ 'വിയറ്റ്‌നാമിനോടുള്ള അസാധാരണമായ ഇഷ്ടം' എന്ന 'കൗതുകകരമായ' കേസിനെ ബിജെപി നേതാവ് രവിശങ്കര്‍ പ്രസാദ് ചോദ്യം ചെയ്തു.

പുതുവത്സരത്തിന് വിയറ്റ്‌നാമിലെത്തിയ രാഹുല്‍ ഗാന്ധി ഹോളിക്കും അവിടെയാണെന്ന് ബിജെപി നേതാവ് രവിശങ്കര്‍ പ്രസാദ് പറഞ്ഞു.   'അദ്ദേഹം തന്റെ മണ്ഡലത്തേക്കാള്‍ കൂടുതല്‍ സമയം വിയറ്റ്‌നാമില്‍ ചെലവഴിക്കുന്നു. വിയറ്റ്‌നാമിനോടുള്ള അദ്ദേഹത്തിന്റെ അസാധാരണമായ ഇഷ്ടം അദ്ദേഹം വിശദീകരിക്കേണ്ടതുണ്ട്. ആ രാജ്യത്തേക്കുള്ള അദ്ദേഹത്തിന്റെ സന്ദര്‍ശനത്തിന്റെ ആവൃത്തി വളരെ കൗതുകകരമാണ്,' പ്രസാദ് വാര്‍ത്താസമ്മേളനത്തില്‍ പറഞ്ഞു.

പാര്‍ലമെന്റില്‍ ബജറ്റ് സമ്മേളനം പുരോഗമിക്കുന്നതിനിടെയാണ് രാഹുല്‍ വിയറ്റ്‌നാമിലെത്തിയിരിക്കുന്നത്. മുന്‍ പ്രധാനമന്ത്രിയും മുതിര്‍ന്ന കോണ്‍ഗ്രസ് നേതാവുമായ മന്‍മോഹന്‍ സിങ്ങിന്റെ മരണത്തെ തുടര്‍ന്നുള്ള ഏഴ് ദിവസത്തെ ദുഃഖാചരണത്തിനിടെയും രാഹുല്‍ ഗാന്ധി  ദക്ഷിണേഷ്യന്‍ രാജ്യത്തേക്ക് പോയിരുന്നു.

വിയറ്റ്‌നാമിന്റെ സാമ്പത്തിക മാതൃകയെപ്പറ്റി പഠിക്കാനാണ് രാഹുല്‍ ഗാന്ധി അവിടേക്ക് പോകുന്നതെന്ന് കോണ്‍ഗ്രസ് നേതാവ് ഹരീഷ് റാവത്ത് പറഞ്ഞു. 

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്