ഹൂസ്റ്റൺ: കേരളത്തിന്റെ അക്ഷര നഗരി എന്നറിയപ്പെടുന്ന കോട്ടയം പട്ടണമുൾപ്പെടുന്ന കോട്ടയം ജില്ലയിൽ നിന്ന് അമേരിക്കയിലെ ഹൂസ്റ്റൺ പട്ടണത്തിലും സമീപ പ്രദേശത്തും താമസിക്കുന്നവരുടെ സംഘടനായ കോട്ടയം ക്ലബ്ബിന്റെ 2026 ലെക്കുള്ള ഭാരവാഹികളുടെ തിരഞ്ഞെടുപ്പും പോയ വർഷത്തെ വാർഷിക റിപ്പോർട്ടും കണക്കും അവതരിപ്പിച്ചു.

ഫെബ്രുവരി 22 നു ഞായറാഴ്ച വൈകിട്ട് ആറുമണിയോടെ അപ്‌ന ബസാർ ഹാളിൽ വച്ചായിരുന്നു ജനറൽ ബോഡിയും തിരഞ്ഞെടുപ്പും നടന്നത്. മാത്യു കുര്യാക്കോസിന്റെ അധ്യക്ഷതയിൽ കൂടിയ യോഗത്തിൽ സമ്മേളനത്തിൽ എത്തിച്ചേർന്ന എല്ലാവർക്കും സുഗു ഫിലിപ്പ് സ്വാഗതം പറഞ്ഞു. തുടർന്ന് സെക്രട്ടറി ഷിബു കെ. മാണി വാർഷിക റിപ്പോർട്ടും ട്രഷറർ അജി കോര വാർഷിക കണക്കും അവതരിപ്പിക്കുകയുണ്ടായി.

ഇന്റേണൽ ഓഡിറ്റർ മാത്യു കഴിഞ്ഞ ഭരണസമിതിയുടെ പ്രവർത്തനങ്ങളെ അനുമോദിക്കുകയും തുടർന്ന് ജനറൽ ബോഡി വാർഷിക റിപ്പോർട്ടും കണക്കും ഐക്യകണ്‌ഠേന പാസ്സാക്കുകയും ചെയ്തു.  അതിനുശേഷം 2026ലേക്കുള്ള ഭരണ സമിതിയുടെ തിരഞ്ഞടുപ്പ് നടന്നു.

പ്രസിഡന്റായി സുഗു ഫിലിപ്പിനെയും വൈസ് പ്രസിഡന്റുമാരായി മാത്യു കുര്യാക്കോസിനെയും റോസെനി ഷോണിനെയും സെക്രട്ടറിയായി ലതീഷ് കൃഷ്ണനെയും ജോയിന്റ് സെക്രട്ടറിയായി ബിബി പാറയിലിനെയും ട്രഷറായി ജോജി ഈപ്പനെയും ജോയിന്റ് ട്രഷററായി ബിജു ശിവനെയും ഓഡിറ്ററായി അജി കോരയെയും പിആർഒയായി എസ്.കെ. ചെറിയനെയും ഐക്യകണ്‌ഠേന തിരഞ്ഞെടുത്തു.

അഡൈ്വസറി ബോർഡ് അംഗങ്ങളായി ഷിബു കെ. മാണി, പി.സി. ജോർജ് എന്നിവരെയും എക്‌സിക്യൂട്ടീവ് ബോർഡ് അംഗങ്ങളായി സ്റ്റീഫൻ ഫിലിപ്പോസ്, സുജി ജോൺ, വന്നല പോത്തൻ, തോമസ് സ്‌കറിയ, ഷോൺ തോമസ്, എബ്രഹാം കുര്യാക്കോസ് (ബെന്നി), ജൂബി തോമസ്, സജീവ് ജേക്കബ്, ബിജോയ് തോമസ്, മധു ചേരിക്കൽ എന്നിവരെയും വിമൻസ് ഫോറം അംഗങ്ങളായി ടിസിയാ ഷിബു, മറിയാമ്മ ജോർജ്, മറിയ സ്‌കറിയ, ഡോ. ടോൺസി ഈപ്പൻ, ആൻസി ജോൺ, ശാന്തമ്മ പോത്തൻ സുജ ബെന്നി എന്നിവരെയും തിരഞ്ഞെടുത്തു.

ഹൂസ്റ്റണിലെ കലാ സാഹിത്യ രംഗത്തെ നിറ സാന്നിധ്യമാണ് പ്രസിഡന്റായി വീണ്ടും തിരഞ്ഞെടുത്ത സുഗു ഫിലിപ്പ്. അറിയപ്പെടുന്ന ഗായകനും മിമിക്രികാലാകാരനും കൂടിയാണദ്ദേഹം. മാഗിന്റെ സജ്ജീവ പ്രവർത്തകനാണ് സെക്രട്ടറിയായി തിരഞ്ഞെടുത്ത ലതീഷ് കൃഷ്ണൻ.

കഴിഞ്ഞ രണ്ട് പതിറ്റാണ്ടായി ഹൂസ്റ്റനിൽ വളരെ സജ്ജീവമായി പ്രവർത്തിക്കുന്ന സംഘടനയാണ് കോട്ടയം ക്ലബ്. നാടിന്റെ സാംസ്‌കാരിക പൈതൃകം കാത്തുസൂക്ഷിക്കുന്നതോടൊപ്പം നിരവധി ജീവ കാരുണ്യ പ്രവർത്തനങ്ങൾ നാട്ടിൽ ഇതിനോടകം ചെയ്തിട്ടുണ്ട്.

വരും കാലങ്ങളിൽ ക്ലബ്ബിനെ ശക്തിപ്പെടുത്തുന്ന പ്രവർത്തനങ്ങൾ നടത്തുന്നതിനായിട്ടുള്ള നിർദ്ദേശങ്ങൾ അംഗങ്ങൾ മുന്നോട്ട് വയ്ക്കുകയുണ്ടായി. ജനറൽ ബോഡിയിൽ പങ്കെടുക്കുന്നതിനായി നിരവധി ആളുകൾ എത്തിച്ചേർന്നത് സംഘടനയുടെ പ്രവർത്തന മികവിനുള്ള അംഗീകാരമാണെന്നും കൂടുതൽ പ്രവർത്തനങ്ങളുമായി മുന്നോട്ട് പോകുമെന്നും എല്ലാവരെയും ഒന്നിച്ച് കൊണ്ടുപോകുന്ന രീതിയിൽ പ്രവൃത്തിക്കുമെന്ന് പ്രസിഡന്റായി തിരഞ്ഞെടുക്കപ്പെട്ട സുഗു ഫിലിപ്പ് ഉറപ്പുനൽകുകയുണ്ടായി.

ബിജു ശിവൻ യോഗത്തിൽ പങ്കെടുത്ത എല്ലാവർക്കും കൃതജ്ഞത രേഖപ്പെടുത്തി. ഡിന്നറോടുകൂടി പരിപാടികൾ സമാപിച്ചു. 

ബ്ലെസ്സൺ, ഹൂസ്റ്റൺ