കുട്ടികളുടെ ആത്മവിശ്വാസവും പ്രസംഗശേഷിയും വളർത്താൻ കെ.എച്ച്.എൻ.എയുടെ 'യുവവാണി'; ഒക്ടോബർ 10ന് തുടക്കം

OCTOBER 10, 2026, 9:01 AM

നോർത്ത് അമേരിക്കയിലെ മലയാളി കുട്ടികളുടെയും യുവതലമുറയുടെയും പ്രസംഗശേഷി, ആശയവിനിമയ മികവ്, ആത്മവിശ്വാസം, നേതൃത്വപാടവം എന്നിവ വളർത്തുക എന്ന ലക്ഷ്യത്തോടെ കേരള ഹിന്ദൂസ് ഓഫ് നോർത്ത് അമേരിക്ക (കെ.എച്ച്.എൻ.എ) സൗത്ത് ഈസ്റ്റ് റീജിയന്റെ നേതൃത്വത്തിൽ സംഘടിപ്പിക്കുന്ന 'യുവവാണി - Voice of the Next Generation' പരിപാടിക്ക് ഒക്ടോബർ 10 ശനിയാഴ്ച തുടക്കമാകും.

പബ്ലിക് സ്പീക്കിംഗ്, ഡിബേറ്റ് എന്നിവയ്ക്ക് പ്രാധാന്യം നൽകുന്ന ഈ പരിശീലന പരിപാടി മൂന്നാം ക്ലാസ് മുതൽ മുകളിലേക്കുള്ള വിദ്യാർത്ഥികൾക്കായാണ് ഒരുക്കിയിരിക്കുന്നത്. എല്ലാ ശനിയാഴ്ചയും ഈസ്റ്റേൺ സമയം ഉച്ചയ്ക്ക് 2 മുതൽ 3 വരെയാണ് ഓൺലൈൻ ക്ലാസുകൾ നടക്കുക.

കുട്ടികൾക്ക് ആത്മവിശ്വാസത്തോടെ പൊതുവേദികളിൽ സംസാരിക്കാനും സ്വന്തം ആശയങ്ങൾ വ്യക്തമായും ഫലപ്രദമായും അവതരിപ്പിക്കാനും വിമർശനാത്മകമായി ചിന്തിക്കാനും ആരോഗ്യകരമായ സംവാദങ്ങളിൽ പങ്കെടുക്കാനും അവസരമൊരുക്കുകയാണ് യുവവാണിയുടെ പ്രധാന ലക്ഷ്യം. സ്‌കൂൾ, കോളേജ് പഠനകാലത്തും തുടർന്നുള്ള ഔദ്യോഗിക ജീവിതത്തിലും പ്രയോജനപ്പെടുന്ന ആശയവിനിമയശേഷിയും നേതൃത്വഗുണങ്ങളും വളർത്തുന്നതിനൊപ്പം കുട്ടികളുടെ വ്യക്തിത്വവികസനത്തിനും ഈ പരിശീലനം സഹായകരമാകും.

കെ.എച്ച്.എൻ.എ സൗത്ത് ഈസ്റ്റ് യൂത്ത് ആൻഡ് യുവ ലീഡർ സന നായരാണ് പരിപാടിയുടെ പ്രവർത്തനങ്ങൾക്ക് നേതൃത്വം നൽകുന്നത്. AP4WOMEN – A Platform to Practice Confidence സ്ഥാപക നീതു ഗോപാൽ, സ്റ്റാൻഫോർഡ് യൂണിവേഴ്‌സിറ്റി വിദ്യാർത്ഥി റിഖിൽ രഞ്ജിത്ത് എന്നിവർ പരിശീലകരായി പ്രവർത്തിക്കും.

പുതിയ തലമുറയ്ക്ക് മികച്ച വിദ്യാഭ്യാസവും അവസരങ്ങളും നൽകുന്നതിനൊപ്പം സ്വന്തം അഭിപ്രായങ്ങൾ ആത്മവിശ്വാസത്തോടെ പ്രകടിപ്പിക്കാനും സമൂഹത്തിൽ നേതൃത്വപരമായ ഉത്തരവാദിത്തങ്ങൾ ഏറ്റെടുക്കാനും പ്രാപ്തരാക്കേണ്ടത് ഏറെ പ്രധാനമാണെന്ന് കെ.എച്ച്.എൻ.എ പ്രസിഡന്റ് ടി. ഉണ്ണികൃഷ്ണൻ അഭിപ്രായപ്പെട്ടു. കുട്ടികളുടെ കഴിവുകൾ കണ്ടെത്താനും അവ വളർത്തിയെടുക്കാനും സഹായിക്കുന്ന യുവവാണി പോലുള്ള സംരംഭങ്ങൾ കെ.എച്ച്.എൻ.എയുടെ യുവജനശാക്തീകരണ പ്രവർത്തനങ്ങളുടെ ഭാഗമാണെന്നും അദ്ദേഹം വ്യക്തമാക്കി.

പുതിയ തലമുറയുടെ ശബ്ദത്തിന് കരുത്തും അവരുടെ ആശയങ്ങൾക്ക് വേദിയുമൊരുക്കുന്ന യുവവാണി, കുട്ടികൾക്ക് ആത്മവിശ്വാസത്തോടെ മുന്നോട്ടുവരാനുള്ള മികച്ച അവസരമാണെന്ന് സൗത്ത് ഈസ്റ്റ് റീജിയൻ ആർ.വി.പി. ഷാജീവ് പദ്മനിവാസ് പറഞ്ഞു. കുട്ടികൾക്ക് ഭയമോ മടിയോ കൂടാതെ സംസാരിക്കാനും ആശയങ്ങൾ പങ്കുവയ്ക്കാനും പരസ്പരം പഠിക്കാനും കഴിയുന്ന സൗഹൃദപരമായ അന്തരീക്ഷമാണ് പരിപാടിയിലൂടെ ഒരുക്കുന്നതെന്നും അദ്ദേഹം കൂട്ടിച്ചേർത്തു.

യുവവാണിയുടെ പ്രയോജനം പരമാവധി കുട്ടികളിലേക്ക് എത്തിക്കുന്നതിന് രക്ഷിതാക്കളുടെയും കുടുംബങ്ങളുടെയും സജീവ പങ്കാളിത്തം ഉണ്ടാകണമെന്ന് കെ.എച്ച്.എൻ.എ പ്രസിഡന്റ് ടി. ഉണ്ണികൃഷ്ണൻ, ജനറൽ സെക്രട്ടറി സിനു നായർ, ട്രഷറർ അശോക് മേനോൻ, വൈസ് പ്രസിഡന്റ് കെ.വി. സഞ്ജീവ് കുമാർ, ജോയിന്റ് സെക്രട്ടറി ശ്രീകുമാർ ഹരിലാൽ, ജോയിന്റ് ട്രഷറർ അപ്പുക്കുട്ടൻ പിള്ള, ട്രസ്റ്റി ബോർഡ് ചെയർപേഴ്‌സൺ വനജ നായർ എന്നിവരടങ്ങുന്ന എക്‌സിക്യൂട്ടീവ് നേതൃത്വവും ബോർഡ് ഓഫ് ഡയറക്ടേഴ്‌സ്, ട്രസ്റ്റി ബോർഡ് അംഗങ്ങളും അഭ്യർത്ഥിച്ചു.

പരിപാടിയുടെ രജിസ്‌ട്രേഷൻ ആരംഭിച്ചിട്ടുണ്ട്. താൽപര്യമുള്ള വിദ്യാർത്ഥികൾക്ക് https://namaha.org/?page_id=4281 എന്ന ലിങ്കിലൂടെ രജിസ്റ്റർ ചെയ്യാം.

ഒക്ടോബർ 10 ശനിയാഴ്ച ആരംഭിക്കുന്ന ക്ലാസുകൾ എല്ലാ ശനിയാഴ്ചയും ഈസ്റ്റേൺ സമയം ഉച്ചയ്ക്ക് 2 മുതൽ 3 വരെ Zoom വഴിയാണ് നടക്കുക.