സാഹചര്യങ്ങൾ നിർബന്ധിക്കുന്നുണ്ടെങ്കിലും, യു.ഡി.എഫ് സർക്കാർ വന്നാലും പെൻഷൻ പ്രായം ഉയർത്തുക എളുപ്പമാകില്ലെന്നു വ്യക്തം. ഈ വിഷയത്തിൽ എല്ലാ രാഷ്ട്രീയ കക്ഷികളും കൃത്യമായ നിലപാടു വിശദമാക്കാൻ വിഷമിക്കുന്നു. ജീവനക്കാർക്ക് പെൻഷൻ ഉയർന്നു കിട്ടണം. തൊഴിൽ കിട്ടാക്കനിയായിരിക്കേ യുവജന പ്രസ്ഥാനങ്ങൾക്ക് അതിനെ എതിർക്കാതിരിക്കാനുമാകില്ല. 

ആശ്വാസ നടപടി

എഴുപതുകളിലും എൺപതുകളിലും ഡോക്ടർ അഥവാ എൻജിനീയർ ആകാനാകാത്ത ചെറുപ്പക്കാരുടെ സ്വപ്‌നം സർക്കാർ ജോലിക്കപ്പുറം ഗൾഫിലേക്ക് പോകുക എന്നതായിരുന്നു. അതിനും മുമ്പേ പേർഷ്യ എന്ന ഇറാൻ ആയിരുന്നു ആകർഷക രാജ്യം. ഇന്ത്യയിൽ സർക്കാർ ജോലികളുടെ ശമ്പളം അന്ന് ഉന്നത ഉദ്യോഗസ്ഥന്മാർക്കുവരെ വളരെ തുച്ഛമായിരുന്നു. എന്നാൽ ഗൾഫിലും മറ്റും ചെറിയ ജോലിക്കു പോലും വലിയ ശമ്പളം കിട്ടിയിരുന്നു. ഗൾഫിൽ ലേബറായി ജോലിചെയ്യുന്ന ആൾ പോലും നാട്ടിലെ സർക്കാർ ഉദ്യോഗസ്ഥന്റെ വീടിനേക്കാൾ വലിയ വീട് വയ്ക്കുന്ന കാലം അക്കാലത്ത് വന്നു. സർക്കാർ ജോലിക്ക് ഇന്നുള്ള ആകർഷണീയത കൈവരുമെന്ന് അന്നൊന്നും ആരും സ്വപ്‌നത്തിൽപ്പോലും ചിന്തിച്ചിരുന്നില്ല. 

തൊണ്ണൂറുകൾക്കു ശേഷം, ആഗോളവത്കരണത്തിന്റെ വരവോടെ ലോകക്രമങ്ങളും സാമ്പത്തിക സമവാക്യങ്ങളുമൊക്കെ അപ്പാടെ മാറിമറിഞ്ഞു. കോളേജ് അദ്ധ്യാപകന്റെ ശമ്പളം കേട്ടാൽ ഗൾഫുകാരൻ പോലും ഞെട്ടുന്ന സാഹചര്യമുണ്ടായി. സർക്കാർ ഉദ്യോഗസ്ഥരുടെ ശമ്പളവും ഉയർന്ന അക്കങ്ങളിലേക്കെത്തി. ഇന്നിപ്പോൾ നാട്ടിൽ ഒരു സർക്കാർ ജോലി കിട്ടിയാൽ ജീവിതം സുരക്ഷിതമായി എന്നാണ് ഭൂരിപക്ഷം ഉദ്യോഗാർത്ഥികളും പൊതു സമൂഹവും കരുതുന്നത്. എന്നാൽ ജോലി കിട്ടുക എന്നത് അതീവ ബുദ്ധിമുട്ടുള്ള കാര്യമായി. പി.എസ്.സി പരീക്ഷയ്ക്കും മറ്റും പരിശീലിപ്പിക്കുന്ന സ്ഥാപനങ്ങൾ കൂണു പോലെ മുളച്ച് പണം കൊയ്യുന്നു.പതിനെട്ട് വയസു കഴിഞ്ഞാൽ ഒരാൾക്ക് പി.എസ്.സി പരീക്ഷയ്ക്ക് അപേക്ഷിക്കാനുള്ള യോഗ്യതയാകുമെങ്കിലും ആ പ്രായത്തിൽ വിദ്യാഭ്യാസം പൂർത്തിയാക്കുന്നതിനും നൈപുണ്യ വികാസത്തിനും മറ്റുമാണ് ഭൂരിപക്ഷം ചെറുപ്പക്കാരും ഊന്നൽ നൽകുന്നത്.

ഇരുപത്തിയഞ്ച് വയസോടെ ജോലി തിരയാൻ തുടങ്ങുന്നതായിരുന്നു പഴയ ട്രെൻഡ്. അതിലും ഇപ്പോൾ മാറ്റം വരുകയും പഠനത്തിനൊപ്പം പി.എസ്.സി കോച്ചിംഗിന് പോകുന്നവരുടെ എണ്ണം കൂടുകയും ചെയ്തിട്ടുണ്ട്. പി.എസ്.സി പരീക്ഷയ്ക്ക് അപേക്ഷ ക്ഷണിച്ചാൽ തന്നെ അത് നടത്തി ലിസ്റ്റ് പ്രസിദ്ധീകരിക്കുമ്പോഴേക്കും വർഷങ്ങൾ കടന്നുപോകും. മൂന്ന് വർഷമാണ് ഒരു ലിസ്റ്റിന്റെ കാലാവധി. ആദ്യ തവണ തന്നെ പി.എസ്.സി പരീക്ഷ എഴുതി ജോലി നേടുന്നവർ വളരെ കുറവാണ്. പല തവണ അതിന് ശ്രമിക്കേണ്ടിവരും. അതിനാൽ പി.എസ്.സി പരീക്ഷയ്ക്ക് അപേക്ഷിക്കുന്നതിനുള്ള ജനറൽ വിഭാഗത്തിന്റെ പ്രായപരിധി 36 വയസ്സിൽ നിന്ന് ഉയർത്തണമെന്ന ന്യായമായ ആവശ്യം നിരവധി വർഷങ്ങളായി ഉദ്യോഗാർത്ഥികൾ ഉന്നയിച്ചുപോന്നു.

പി.എസ്.സി പരീക്ഷ എഴുതാനുള്ള ഉയർന്ന പ്രായപരിധി പൊതുവിഭാഗത്തിന് 40 വയസായി രണ്ടാം പിണറായി സർക്കാരിന്റെ അവസാന കാലത്ത് ഉയർത്തിയത് സുപ്രധാനമായ തീരുമാനം തന്നെ. ഒ.ബി.സി വിഭാഗത്തിലുള്ളവർക്ക് നിലവിലെ 39ൽ നിന്ന് 43 വയസാക്കി. പട്ടികവിഭാഗക്കാർക്ക് 41ൽ നിന്ന് 45 വയസുവരെയും ഉയർത്തി. വിധവകൾക്ക് നിലവിൽ അഞ്ചു വർഷം പ്രായപരിധിയിൽ ഇളവുണ്ട്.

ഇവർക്ക് കൂട്ടിയ നാലു വർഷത്തിന്റെ ആനുകൂല്യം ലഭിക്കും. നിലവിൽ 75 ലക്ഷത്തോളം പേരാണ് പി.എസ്.സിയിൽ ജോലിക്കായി ഒറ്റത്തവണ രജിസ്‌ട്രേഷൻ നടത്തിയിട്ടുള്ളത്. ഇവരിൽ 36 കഴിഞ്ഞ് 40 വരെയെത്തി പി.എസ്.സി വിജ്ഞാപനങ്ങൾക്ക് അപേക്ഷിക്കാനാകാത്ത 16 ലക്ഷത്തോളം പേരുണ്ടാകും. ഇവർക്ക് സർക്കാരിന്റെ തീരുമാനം പ്രയോജനം ചെയ്യും. ഏറെ വൈകി ഉദ്യോഗം കിട്ടുന്നവർക്ക് മിനിമം കാലം ജോലി ചെയ്യാൻ കഴിയണമെന്ന ആവശ്യവും പെൻഷൻ പ്രായം ഉയർത്തണമെന്ന നിർദ്ദേശത്തിന്റെ അനുബന്ധമായി മാറുന്നു ഇതോടെ.

ബാബു കദളിക്കാട്‌