വയനാട് വടക്കനാട് മേഖലയിൽ ഭീതപരത്തിയ കാട്ടാനയെ മയക്കുവെടി വെച്ചു

MARCH 21, 2026, 9:17 PM

കല്‍പ്പറ്റ: വയനാട് സുൽത്താൻ ബത്തേരി വടക്കനാട്, വള്ളുവാടി ജനവാസ മേഖലകളിൽ ഇറങ്ങി ഭീതിപരത്തുന്ന കാട്ടാനയെ മയക്കുവെടി വെച്ച് പിടികൂടാൻ ശ്രമം.രാവിലെ അഞ്ച് മണിക്കാണ് ദൗത്യം ആരംഭിച്ചത്.

എന്നാൽ, ആനയെ മയക്കുവെടി വെച്ചെങ്കിലും കൃത്യമായിരുന്നില്ല.നിലവിൽ ആന ആര്‍ആര്‍ടി സംഘത്തിന്‍റെ നിരീക്ഷണത്തിൽ തുടരുകയാണ്. താത്തൂര്‍ ടസ്കര്‍ വണ്‍ എന്നാണ് ആനയ്ക്ക് വനംവകുപ്പ് നൽകിയ പേര്.

അതേസമയം, വീണ്ടും മയക്കുവെടി വെച്ച് പിടികൂടിയശേഷം ആനയെ മുത്തങ്ങയിലെ ആനപ്പന്തിയിലേക്ക് മാറ്റും.കാട്ടാന ആക്രമണത്തിൽ പ്രദേശത്ത് നേരത്തെ യുവ കര്‍ഷകൻ കൊല്ലപ്പെട്ടിരുന്നു. കാട്ടാനയെ പിടികൂടാത്തതിൽ പ്രതിഷേധവും ഉയര്‍ന്നിരുന്നു. ഇതിനിടെയാണ് ആനയെ പിടികൂടാനുള്ള ദൗത്യം ആരംഭിച്ചത്.