അവിശ്വാസികൾക്ക് ആചാരങ്ങളിൽ എന്ത് കാര്യം? ശബരിമല കേസിൽ ജസ്റ്റിസ് ബി.വി. നാഗരത്ന

APRIL 21, 2026, 5:12 AM

ശബരിമല യുവതീ പ്രവേശനവുമായി ബന്ധപ്പെട്ട കേസിൽ സുപ്രീം കോടതി ഭരണഘടനാ ബെഞ്ചിൽ നിന്ന് അതീവ പ്രാധാന്യമുള്ള നിരീക്ഷണങ്ങളാണ് പുറത്തുവരുന്നത്. മതപരമായ ആചാരങ്ങളിൽ ആർക്കൊക്കെ ഇടപെടാം എന്ന വിഷയത്തിൽ ബെഞ്ചിലെ ജഡ്ജിമാർക്കിടയിൽ ഭിന്നമായ കാഴ്ചപ്പാടുകൾ പ്രകടമായി. യഥാർത്ഥ വിശ്വാസികൾ ഒരിക്കലും തങ്ങളുടെ മതപരമായ ആചാരങ്ങളെ ചോദ്യം ചെയ്യില്ലെന്നും, വിശ്വാസമില്ലാത്തവർക്ക് ആചാരങ്ങളിൽ ഇടപെടാൻ അവകാശമില്ലെന്നുമാണ് ജസ്റ്റിസ് ബി.വി. നാഗരത്ന വ്യക്തമാക്കിയത്. ശബരിമല തന്ത്രി കണ്ഠരര് രാജീവരർക്ക് വേണ്ടി ഹാജരായ അഭിഭാഷകന്റെ വാദത്തിനിടെയായിരുന്നു ഈ സുപ്രധാന പരാമർശം.

യുവതീ പ്രവേശനത്തിനായി ഹർജി നൽകിയവർ യഥാർത്ഥ അയ്യപ്പ വിശ്വാസികളല്ലെന്ന വാദത്തെ പിന്തുണയ്ക്കുന്ന രീതിയിലായിരുന്നു ജസ്റ്റിസ് നാഗരത്നയുടെ പ്രതികരണം. പ്രത്യേക അജണ്ടകളുമായി എത്തുന്നവരുടെ ഇത്തരം പൊതുതാൽപര്യ ഹർജികൾ കോടതി എന്തിന് കേൾക്കണമെന്നും അവർ ചോദിച്ചു.

സ്ത്രീകൾക്ക് പ്രവേശനം വേണമെന്ന് ആവശ്യപ്പെട്ട് ഏതെങ്കിലും അയ്യപ്പ വിശ്വാസി കോടതിയെ സമീപിച്ചിട്ടുണ്ടോ എന്ന് ആരാഞ്ഞ ജസ്റ്റിസ് നാഗരത്ന, ആചാരങ്ങളെ അന്ധവിശ്വാസമായി കാണുന്നതിനോടും വിയോജിപ്പ് പ്രകടിപ്പിച്ചു.അതേസമയം, ചില ആചാരങ്ങൾ അന്ധവിശ്വാസമാണെന്ന് തീരുമാനിക്കാൻ കോടതിക്ക് അധികാരമുണ്ടെന്ന് ചീഫ് ജസ്റ്റിസ് ഡി.വൈ. ചന്ദ്രചൂഡ് നിരീക്ഷിച്ചു.

മതപരമായ കാര്യങ്ങളിൽ അവസാന വാക്ക് നിയമസഭയുടേതാണെന്ന് പറയാനാകില്ലെന്നും, മനുഷ്യബലി പോലുള്ള നൈതികതയ്ക്ക് നിരക്കാത്ത ആചാരങ്ങൾ നടന്നാൽ കോടതിക്ക് ഇടപെടാമെന്നും അദ്ദേഹം വ്യക്തമാക്കി. എന്നാൽ ഒരു മതാചാരത്തെ മാത്രം അന്ധവിശ്വാസമായി മുദ്രകുത്താൻ കോടതിക്ക് കഴിയില്ലെന്നും, അത്തരം കാര്യങ്ങളിൽ തീരുമാനമെടുക്കാൻ ആവശ്യമായ പണ്ഡിത പരിജ്ഞാനം കോടതികൾക്കില്ലെന്നുമാണ് കേന്ദ്ര സർക്കാർ ബെഞ്ചിനെ അറിയിച്ചത്.

ക്ഷേത്രങ്ങളിലെ പൂജാരി നിയമനം അടക്കമുള്ള കാര്യങ്ങൾ യോഗ്യതയുടെ അടിസ്ഥാനത്തിലാണ് നടക്കുന്നതെന്നും അതിൽ സർക്കാരുകൾക്ക് ഇടപെടാനാവില്ലെന്നും കേന്ദ്രം വ്യക്തമാക്കി. ആചാരങ്ങൾ പൊതുസമാധാനത്തെയോ നൈതികതയെയോ ബാധിക്കുന്നുണ്ടെങ്കിൽ മാത്രമേ കോടതിയുടെ ഇടപെടൽ ആവശ്യമുള്ളൂ എന്ന പൊതുനിരീക്ഷണത്തോടെയാണ് ചർച്ചകൾ പുരോഗമിക്കുന്നത്.