മുഖ്യമന്ത്രി പിണറായി വിജയന്റെ മകൾ വീണ വിജയൻ ഉൾപ്പെട്ട മാസപ്പടി കേസിൽ സിബിഐ അന്വേഷണം ആവശ്യപ്പെട്ടുള്ള പൊതുതാൽപര്യ ഹർജി (പിഐഎൽ) കേരള ഹൈക്കോടതിയുടെ പുതിയ ഡിവിഷൻ ബെഞ്ച് വിശദമായ വാദത്തിനായി പരിഗണിക്കും. കേസ് പരിഗണിക്കുന്നതിൽ നിന്ന് മുമ്പ് ഉണ്ടായിരുന്ന ഡിവിഷൻ ബെഞ്ചിലെ ഒരംഗം പിന്മാറിയതിനെ തുടർന്നാണ് ഹർജി പുതിയ ബെഞ്ചിന് മുന്നിൽ എത്തുന്നത്.

കരിമണൽ കമ്പനിയായ കൊച്ചിൻ മിനറൽസ് ആൻഡ് റൂട്ടൈൽ ലിമിറ്റഡ് (സിഎംആർഎൽ) വീണ വിജയന്റെ സ്ഥാപനമായ എക്‌സാലോജിക് സൊല്യൂഷൻസിന് സേവനം നൽകാതെ മാസപ്പടി ഇനത്തിൽ 1.72 കോടി രൂപ നൽകിയെന്ന ആദായനികുതി തർക്ക പരിഹാര ബോർഡിന്റെ കണ്ടെത്തലുകളുടെ അടിസ്ഥാനത്തിലാണ് കേസുമായി ബന്ധപ്പെട്ട നിയമപോരാട്ടങ്ങൾ ആരംഭിച്ചത്. സിബിഐ അന്വേഷണം ആവശ്യപ്പെട്ട് മാധ്യമപ്രവർത്തകനായ എം.ആർ. അജയനാണ് ഹൈക്കോടതിയിൽ പൊതുതാൽപര്യ ഹർജി സമർപ്പിച്ചത്.

നേരത്തെ, കേസ് പരിഗണിച്ചിരുന്ന ഡിവിഷൻ ബെഞ്ചിലെ ഒരംഗം പിന്മാറിയിരുന്നു. അതിനു മുമ്പ് കേസ് പരിഗണിച്ച മറ്റൊരു ബെഞ്ചിലെ ജഡ്ജിയും വ്യക്തിപരമായ കാരണങ്ങളാൽ പിന്മാറ്റം അറിയിച്ചിരുന്നു. തുടർച്ചയായി ജഡ്ജിമാർ പിന്മാറിയ സാഹചര്യത്തിലാണ് കേസ് ചീഫ് ജസ്റ്റിസിന്റെ നിർദ്ദേശപ്രകാരം പുതിയ ഡിവിഷൻ ബെഞ്ചിന് മുന്നിൽ എത്തുന്നത്.

സിഎംആർഎൽ-എക്‌സാലോജിക് സാമ്പത്തിക ഇടപാടുകളിൽ കോർപ്പറേറ്റ് തട്ടിപ്പ് നടന്നു എന്ന് കണ്ടെത്തിയതിനെ തുടർന്ന് കേന്ദ്ര സർക്കാരിന്റെ സീരിയസ് ഫ്രോഡ് ഇൻവെസ്റ്റിഗേഷൻ ഓഫീസ് (എസ്എഫ്ഐഒ) വീണ വിജയനെ പ്രതിയാക്കി കുറ്റപത്രം സമർപ്പിച്ചിരുന്നു. എങ്കിലും, കമ്പനീസ് ആക്ട് പ്രകാരമുള്ള കുറ്റങ്ങൾ മാത്രമാണ് എസ്എഫ്ഐഒ അന്വേഷിച്ചത്. അഴിമതി നിരോധന നിയമം, കള്ളപ്പണം വെളുപ്പിക്കൽ നിയമം എന്നിവ പ്രകാരമുള്ള ഗൗരവമായ കാര്യങ്ങൾ അന്വേഷണ പരിധിയിൽ കൊണ്ടുവരണമെന്നും അതിനായി സിബിഐ അന്വേഷണം അനിവാര്യമാണെന്നുമാണ് ഹർജിക്കാരൻ കോടതിയിൽ ആവശ്യപ്പെട്ടിട്ടുള്ളത്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്