ബിഷപ്പുമാർക്കും ദീപികയ്ക്കും എതിരായ പരാമർശങ്ങൾക്ക് പിന്നാലെ പി.സി. ജോർജ് പാലാ അരമനയിലെത്തി

APRIL 11, 2026, 5:09 AM

കോട്ടയം: ബിഷപ്പുമാർക്കും ദീപികക്കും എതിരായ അധിക്ഷേപ പരാമർശങ്ങൾക്ക് പിന്നാലെ പി.സി. ജോർജ് പാലാ അരമനയിലെത്തി.

നൂറാം ജന്മദിനം ആഘോഷിക്കുന്ന മാർ പള്ളിക്കാപ്പറമ്പിൽ ബിഷപ്പിനെ സന്ദർശിക്കുന്നതിനാണ് പി.സി. ജോർജ് എത്തിയത്.

സഭയിലെ നേതൃത്വത്തെ ബഹുമാനമാണ്. എന്നാൽ ബിഷപ്പുമാർ നന്ദികേട് കാണിച്ച് രാഷ്ട്രീയം കളിച്ചാൽ ഇനിയും വർത്തമാനം പറയുമെന്നും പി.സി. ജോർജ് മുന്നറിയിപ്പ് നൽകി.

രാഷ്ട്രീയം പറയാൻ വന്നതല്ലെന്നും സഭയുമായി യാതൊരു പ്രശ്നവുമില്ലെന്നും പി.സി. ജോർജ് അറിയിച്ചു.

കാഞ്ഞിരപ്പള്ളി ബിഷപ്പിനെതിരെ മാത്രമാണ് പറഞ്ഞത്. ഞാനും ഷോൺ ജോർജും നിയമസഭയിൽ കാണുമെന്നും പി.സി. ജോർജ് വ്യക്തമാക്കി.

ദീപിക ദിനപത്രത്തിന് എതിരെ ബിജെപി നേതാവ് ഷോൺ ജോർജ് ഇന്നും രംഗത്തെത്തി. സഭയുടെ ഹൃദയത്തിൽ ക്രിസ്തുവിന് പകരം കോൺഗ്രസാണ് ഉള്ളത്. വീക്ഷണവും ദീപികയും തമ്മിൽ തിരിച്ചറിയാൻ പറ്റാത്ത അവസ്ഥ. എഴുതി വിടുന്ന എല്ലാ കോപ്രായങ്ങളും സഭയുടേതല്ല എന്നും ഷോൺ ജോർജ് വിമർശിച്ചു.