പി വി അൻവർ വ്യക്തിഹത്യ ചെയ്യുന്നുവെന്ന് മുഹമ്മദ് റിയാസ്; തെരഞ്ഞെടുപ്പ് കമ്മീഷന് പരാതി നൽകും

APRIL 1, 2026, 11:09 PM

കോഴിക്കോട്: ബേപ്പൂർ മണ്ഡലത്തിലെ യുഡിഎഫ് സ്ഥാനാർത്ഥി പി.വി. അൻവറിനെതിരെ എൽഡിഎഫ് സ്ഥാനാർത്ഥി പി.എ. മുഹമ്മദ് റിയാസ് ഇന്ന് പരാതി നൽകും. തന്നെയും മുഖ്യമന്ത്രി പിണറായി വിജയന്റെ കുടുംബാംഗങ്ങളെയും വ്യക്തിപരമായി അധിക്ഷേപിക്കുന്നു എന്ന് ചൂണ്ടിക്കാട്ടിയാണ് തിരഞ്ഞെടുപ്പ് കമ്മീഷന് പരാതി നൽകുന്നത്.

തിരഞ്ഞെടുപ്പ് പ്രചാരണത്തിനിടെ പി.വി. അൻവർ വ്യക്തിഹത്യ നടത്തുന്നു എന്നാണ് പ്രധാന ആരോപണം. 'മരുമോനിസം', 'പിണറായിസം' തുടങ്ങിയ പദപ്രയോഗങ്ങളിലൂടെ തനിക്കും മുഖ്യമന്ത്രിയുടെ കുടുംബത്തിനുമെതിരെ മോശം പരാമർശങ്ങൾ നടത്തുന്നു എന്ന് റിയാസ് പരാതിയിൽ പറയുന്നു.

ഇത്തരം കടന്നാക്രമണങ്ങൾ തിരഞ്ഞെടുപ്പ് പെരുമാറ്റച്ചട്ടങ്ങളുടെ ലംഘനമാണെന്ന് മുഹമ്മദ് റിയാസ് ചൂണ്ടിക്കാട്ടുന്നു. തന്റെ പോരാട്ടം 'പിണറായിസത്തിനും മരുമോനിസത്തിനും' എതിരെയാണെന്ന് പി.വി. അൻവർ നേരത്തെ തന്നെ പ്രഖ്യാപിച്ചിരുന്നു. ഇതിനെതിരെയാണ് ഇപ്പോൾ നിയമനടപടികളുമായി എൽഡിഎഫ് മുന്നോട്ട് പോകുന്നത്.