പ്രതിപക്ഷ ഉപനേതൃ പദവി തർക്കം: ഉപനേതൃ സ്ഥാനം സിപിഐക്ക് നൽകുന്നതിൽ തെറ്റില്ലെന്ന് ആനി രാജ

JUNE 5, 2026, 1:26 AM

ഡൽഹി: പ്രതിപക്ഷ ഉപനേതൃ പദവി ചൊല്ലിയുള്ള തർക്കം തുടരുന്നതിനിടെ പ്രതികരണവുമായി സിപിഐ നേതാവ് ആനി രാജ രംഗത്ത്. സിപിഐക്ക് ആരുടെയും മുന്നിൽ തലകുനിക്കേണ്ട സാഹചര്യമില്ലെന്നും, തെരഞ്ഞെടുപ്പ് തോൽവിയിൽ നിന്ന് പാഠം ഉൾക്കൊണ്ടതായി ജനങ്ങളെ ബോധ്യപ്പെടുത്തേണ്ടതുണ്ടെന്നും അവർ പറഞ്ഞു.

പുതിയ സാഹചര്യത്തിൽ പ്രതിപക്ഷ ഉപനേതൃ സ്ഥാനം സിപിഐയ്ക്ക് നൽകുന്നതിൽ തെറ്റില്ലെന്നും, ഉയരുന്ന വിമർശനങ്ങൾക്കും സംശയങ്ങൾക്കും മറുപടി നൽകാൻ ഈ പദവി സഹായകമാകുമെന്നും ആനി രാജ അഭിപ്രായപ്പെട്ടു. ഇത് ഇടതുപക്ഷത്തിന് ഗുണകരമാകുമെന്നും അവർ കൂട്ടിച്ചേർത്തു.

കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാന് രാജി ആവശ്യപ്പെട്ട് ജൂൺ 6-ന് സംഘടിപ്പിക്കുന്ന പ്രതിഷേധത്തിൽ പങ്കെടുക്കുമെന്നും ആനി രാജ അറിയിച്ചു. ദേശീയ മഹിളാ ഫെഡറേഷനെ പ്രതിനിധീകരിച്ച് പങ്കെടുക്കുമോ എന്നത് സംബന്ധിച്ച് ഇന്ന് യോഗം ചേർന്ന് തീരുമാനിക്കുമെന്നും അവർ വ്യക്തമാക്കി. സിജെപി രജിസ്റ്റർ ചെയ്ത പാർട്ടി അല്ലെങ്കിലും അവർ ഉയർത്തുന്ന വിഷയങ്ങൾ സിപിഐയുടെ നിലപാടുകളുമായി സാമ്യമുള്ളതാണെന്നും ആനി രാജ പറഞ്ഞു.

ഇതിനൊപ്പം, ജൂൺ 8-ന് ന്യൂഡൽഹിയിൽ ചേരുന്ന ‘ഇൻഡ്യ’ സഖ്യ യോഗത്തെക്കുറിച്ചും അവർ അതൃപ്തി പ്രകടിപ്പിച്ചു. സഖ്യം പേരിനുമാത്രമല്ല പ്രവർത്തിക്കേണ്ടതെന്നും, ജനങ്ങളുടെ പ്രതീക്ഷകൾക്ക് അനുസരിച്ച് പ്രവർത്തിക്കാൻ മുന്നണിക്ക് കഴിഞ്ഞിട്ടില്ലെന്നും അവർ പറഞ്ഞു. യോഗത്തിൽ പങ്കെടുക്കണോ എന്നതിൽ ഇന്ന് തീരുമാനമെടുക്കുമെന്നും ആനി രാജ വ്യക്തമാക്കി.

ഇതിനിടെ, പ്രതിപക്ഷ ഉപനേതൃ പദവിയെ ചൊല്ലിയുള്ള വിവാദങ്ങൾ തുടരുന്നതിനിടെ സിപിഐഎം സംസ്ഥാന സെക്രട്ടറിയറ്റ് ഇന്ന് തിരുവനന്തപുരത്ത് ചേരും. സിപിഐയെ അനുനയിപ്പിക്കാൻ കഴിയുമോ എന്നത് രാഷ്ട്രീയ വൃത്തങ്ങളിൽ ശ്രദ്ധേയമായ വിഷയമായി തുടരുന്നു.