നെടുമ്പാശേരി അപകടം: ഗോപികയുടെ രക്തസാമ്പിൾ പോസ്റ്റ്‌മോർട്ടത്തിന് ശേഷം ശേഖരിച്ചതിൽ സംശയമെന്ന് പിതാവ്

OCTOBER 13, 2026, 6:06 AM

പാലക്കാട്: നെടുമ്പാശേരി മിനി കൂപ്പർ അപകടത്തിൽ മരിച്ച ഗോപികയുടെ രക്തസാമ്പിളുകൾ പോസ്റ്റ്‌മോർട്ടത്തിന് ശേഷം ശേഖരിച്ചതിൽ സംശയം പ്രകടിപ്പിച്ച് കുടുംബം. പോസ്റ്റ്‌മോർട്ടം പൂർത്തിയാക്കി തുന്നിക്കെട്ടിയ മൃതദേഹത്തിലെ തുന്നൽ അഴിച്ചാണ് രക്തസാമ്പിൾ എടുത്തതെന്ന് ഗോപികയുടെ പിതാവ് എം.ആർ. പ്രദീപ്കുമാർ വാർത്താസമ്മേളനത്തിൽ ആരോപിച്ചു. സാമ്പിൾ ശേഖരിക്കാൻ ആരാണ് നിർദേശം നൽകിയതെന്നും അദ്ദേഹം ചോദിച്ചു.

ഗോപികയുടെ മൃതദേഹം അങ്കമാലി താലൂക്ക് ആശുപത്രിയിലാണ് പോസ്റ്റ്‌മോർട്ടം നടത്തിയത്. അപകടത്തിൽ മരിച്ച മറ്റ് രണ്ടുപേരുടെ മൃതദേഹങ്ങൾ കളമശേരി ആശുപത്രിയിലായിരുന്നു. നിശ്ചയിച്ച സമയത്തേക്കാൾ ഒരു മണിക്കൂർ വൈകിയാണ് ഗോപികയുടെ മൃതദേഹം വിട്ടുകിട്ടിയതെന്നും ആ സമയത്ത് കുടുംബാംഗങ്ങൾ ആശുപത്രിയിലുണ്ടായിരുന്നുവെന്നും പിതാവ് പറഞ്ഞു.

രക്തസാമ്പിൾ എടുക്കുന്നതിന്റെ കാരണം ചോദിച്ചപ്പോൾ കുടുംബത്തിന് ഗുണകരമാകുന്ന കാര്യത്തിനാണെന്നാണ് പൊലീസ് അറിയിച്ചതെന്ന് അദ്ദേഹം വ്യക്തമാക്കി. അപകടത്തിൽപ്പെട്ട കാറിൽനിന്ന് ലഭിച്ച രക്തസാമ്പിളുമായി ഗോപികയുടെ സാമ്പിൾ താരതമ്യം ചെയ്യാനാണെന്നും അതുവഴി അപകടമുണ്ടാക്കിയ വാഹനം തിരിച്ചറിയാൻ സഹായിക്കുമെന്നും സി.ഐ. പറഞ്ഞതായി പിതാവ് വിശദീകരിച്ചു. എന്നാൽ, ഇപ്പോൾ ഈ നടപടിയെക്കുറിച്ച് സംശയമുണ്ടെന്നും ആരാണ് മുകളിൽനിന്ന് നിർദേശം നൽകിയതെന്ന് വ്യക്തമാക്കണമെന്നും അദ്ദേഹം ആവശ്യപ്പെട്ടു.

അതേസമയം, നെടുമ്പാശേരി അപകടവുമായി ബന്ധപ്പെട്ട റിമാൻഡ് റിപ്പോർട്ടും പുറത്തുവന്നു. മനുഷ്യജീവന് അപകടമുണ്ടാകുമെന്ന് അറിഞ്ഞുകൊണ്ടാണ് ഒന്നാം പ്രതിയായ സുഹൈൽ വാഹനം ഓടിച്ചതെന്നാണ് റിപ്പോർട്ടിലെ പരാമർശം.

കേസിൽ ആകെ നാലുപേരാണ് പ്രതിപ്പട്ടികയിലുള്ളത്. സുഹൈൽ മദ്യപിച്ച് വാഹനം ഓടിക്കുന്നത് തടയാൻ രണ്ട് മുതൽ നാല് വരെയുള്ള പ്രതികൾ ശ്രമിച്ചില്ലെന്നും പകരം കൂടുതൽ വേഗത്തിൽ വാഹനം ഓടിക്കാൻ പ്രേരിപ്പിച്ചെന്നുമാണ് റിമാൻഡ് റിപ്പോർട്ടിൽ പറയുന്നത്. അപകടവുമായി ബന്ധപ്പെട്ട അന്വേഷണം തുടരുകയാണ്.