അഫാന്റെ മാനസികനിലയില്‍ പ്രശ്നമില്ലെന്ന് മെഡിക്കല്‍ റിപ്പോർട്ട്

MARCH 2, 2025, 9:01 PM

തിരുവനന്തപുരം: വെഞ്ഞാറമൂട് അഞ്ചുപേരെ കൂട്ടക്കൊല ചെയ്ത കേസിലെ പ്രതി അഫാന്റെ മാനസികനിലയില്‍ പ്രശ്നമില്ലെന്ന് മെഡിക്കല്‍ റിപ്പോർട്ട്.

മെഡിക്കല്‍ കോളേജിലെ മനോരോഗ വിദഗ്ധൻ നടത്തിയ മാനസികനില പരിശോധനയിലാണ് കൊലപാതകവും തുടർന്നുണ്ടായ പ്രശ്നങ്ങളും അഫാന്റെ മാനസികനിലയെ ബാധിച്ചിട്ടില്ലെന്നു കണ്ടെത്തിയത്.

റിപ്പോർട്ട് അന്വേഷണസംഘത്തിനു കൈമാറിയിട്ടുണ്ട്. മാനസികപ്രശ്നമാണ് കൊലപാതകത്തിലേക്കു നയിച്ചതെന്ന് പോലീസിനു നേരത്തേ സംശയം ഉണ്ടായിരുന്നു. രക്തസാംപിളുകളുടെ പരിശോധനാഫലം പുറത്തുവന്നിട്ടില്ലെങ്കിലും മദ്യം അല്ലാതെയുള്ള മയക്കുമരുന്ന് ഉള്‍പ്പെടെയുള്ള ലഹരിവസ്തുക്കളുടെ ഉപയോഗം കണ്ടെത്തിയിട്ടില്ലെന്നാണ് ഡോക്ടർമാർ അന്വേഷണസംഘത്തെ അറിയിച്ചത്.

മുത്തശ്ശി സല്‍മാബീവി, പിതൃസഹോദരൻ ലത്തീഫ്, ലത്തീഫിന്റെ ഭാര്യ ഷഹീദ, പെണ്‍സുഹൃത്ത് ഫർസാന, ഇളയസഹോദരൻ അഫ്സാൻ, മാതാവ് ഷെമി എന്നിവരെ കൊലപ്പെടുത്തിയതിനു ശേഷം തട്ടത്തുമലയിലെത്തി രണ്ടുപേരെക്കൂടി കൊല്ലാനായിരുന്നു പദ്ധതി.

എന്നാല്‍, അനുജൻ അഫ്സാൻ കണ്‍മുന്നില്‍ മരിച്ചതോടെ എല്ലാ ധൈര്യവും ചോർന്നു. തുടർന്ന് ഓട്ടോറിക്ഷയില്‍ വെഞ്ഞാറമൂട് പോലീസ് സ്റ്റേഷനിലെത്തി കീഴടങ്ങുകയായിരുന്നു.