കാന്തപുരത്തിന്റെ പിന്തുണ ലഭിച്ചു, തവനൂരിൽ പതിനായിരം വോട്ടിന് ജയിക്കും: കെ.ടി. ജലീൽ

APRIL 10, 2026, 10:14 PM

എടപ്പാൾ: നിയമസഭാ തെരഞ്ഞെടുപ്പിൽ തവനൂർ മണ്ഡലത്തിൽ പതിനായിരം വോട്ടിന്റെ ഭൂരിപക്ഷത്തിൽ താൻ വിജയിക്കുമെന്ന് കെ.ടി. ജലീൽ. വളാഞ്ചേരിയിലെ വീട്ടിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം.

കാന്തപുരം എ.പി. അബൂബക്കർ മുസ്‌ലിയാരുടെയും സംഘടനയുടെയും വോട്ടുകൾ ഇത്തവണ തനിക്ക് ലഭിച്ചിട്ടുണ്ട്. സഹായിച്ചവരെ തിരിച്ചു സഹായിക്കുക എന്ന കാന്തപുരത്തിന്റെ നയം എൽ.ഡി.എഫിന് അനുകൂലമാണെന്നും അദ്ദേഹം കൂട്ടിച്ചേർത്തു.

കേരളത്തിൽ പിണറായി സർക്കാർ മൂന്നാം തവണയും അധികാരത്തിൽ വരുമെന്ന് ജലീൽ പ്രത്യാശ പ്രകടിപ്പിച്ചു. ഇടതുസർക്കാരിന്റെ വികസന പ്രവർത്തനങ്ങളും ക്ഷേമപദ്ധതികളും ജനങ്ങളെ കാര്യമായി സ്വാധീനിച്ചിട്ടുണ്ട്.

സർക്കാരിനെതിരെ ചിന്തിക്കാൻ ജനങ്ങൾക്ക് യാതൊരു കാരണവുമില്ലെന്നും അദ്ദേഹം പറഞ്ഞു. പോളിങ് ശതമാനം കൂടിയത് തങ്ങൾക്ക് ഗുണകരമാണെന്നും, ഇത് യു.ഡി.എഫിന് അനുകൂലമാണെന്ന വിലയിരുത്തൽ പ്രതിപക്ഷത്തിന്റെ തെറ്റായ ധാരണയാണെന്നും അദ്ദേഹം പരിഹസിച്ചു.

മലപ്പുറം ജില്ലയിലെ ഇടതുപക്ഷത്തിന്റെ സാധ്യതകളെക്കുറിച്ചും അദ്ദേഹം ആത്മവിശ്വാസം പ്രകടിപ്പിച്ചു. പൊന്നാനി, തവനൂർ, തിരൂർ മണ്ഡലങ്ങളിൽ വിജയം ഉറപ്പാണെന്ന് വ്യക്തമാക്കിയ ജലീൽ, താനൂർ, പെരിന്തൽമണ്ണ, മങ്കട, നിലമ്പൂർ എന്നിവിടങ്ങളിൽ ശക്തമായ മത്സരമാണ് നടക്കുന്നതെന്നും പറഞ്ഞു. ഭരണത്തുടർച്ചയുണ്ടാകുമെന്ന ഉറച്ച വിശ്വാസത്തിലാണ് അദ്ദേഹം പ്രതികരണം അവസാനിപ്പിച്ചത്.