സംസ്ഥാന പോലീസ് സേനയിൽ വനിതാ പ്രാതിനിധ്യം 30 ശതമാനമാക്കാൻ തീരുമാനം; ഘട്ടം ഘട്ടമായി നടപ്പാക്കും

NOVEMBER 5, 2026, 3:39 AM

കേരളാ പോലീസ് സേനയിൽ വനിതാ പ്രാതിനിധ്യം 30 ശതമാനമായി ഉയർത്താൻ തീരുമാനമായി. നിലവിൽ സിവിൽ പോലീസ് ഓഫീസർമാരിൽ 10 ശതമാനം മാത്രമാണ് വനിതകളുള്ളത്. ഇത് ഘട്ടം ഘട്ടമായി വർദ്ധിപ്പിക്കാനാണ് സർക്കാർ നിർദ്ദേശം.

ഡിജിപി റവാദ എ. ചന്ദ്രശേഖറിന്റെ ശുപാർശയെ തുടർന്നാണ് സർക്കാർ ഈ സുപ്രധാന തീരുമാനം കൈക്കൊണ്ടത്. രാജ്യത്തെ പോലീസ് സേനയിൽ 33 ശതമാനം വനിതാ പ്രാതിനിധ്യം ഉറപ്പാക്കാൻ കേന്ദ്ര ആഭ്യന്തര മന്ത്രാലയം സംസ്ഥാനങ്ങൾക്ക് നിരന്തരം നിർദ്ദേശം നൽകിയിരുന്നു.

ഇതനുസരിച്ച് പുരുഷ-വനിതാ പോലീസ് കോൺസ്റ്റബിൾമാരുടെ റിക്രൂട്ട്മെന്റ് അനുപാതം വർദ്ധിപ്പിക്കും. ഓരോ വർഷവും 5 ശതമാനം വീതം വനിതാ പ്രാതിനിധ്യം കൂട്ടാനാണ് തീരുമാനം. നിരവധി വനിതാ ഐപിഎസ് ഉദ്യോഗസ്ഥർ ഉണ്ടെങ്കിലും, സിവിൽ പോലീസ് ഓഫീസർമാരുടെ എണ്ണം കുറവായ സാഹചര്യത്തിലാണ് ഈ നടപടി.

പുതിയ തസ്തികകൾ സൃഷ്ടിക്കാതെയാണ് ഈ അനുപാതം വർദ്ധിപ്പിക്കുന്നത്. നിലവിലുള്ള സീനിയോറിറ്റി മാനദണ്ഡങ്ങളിലും നടപടിക്രമങ്ങളിലും മാറ്റങ്ങളുണ്ടാകില്ലെന്നും അധികൃതർ വ്യക്തമാക്കി. വനിതാ ഉദ്യോഗസ്ഥരുടെ എണ്ണം കൂടുന്നതിലൂടെ സേനയുടെ പ്രവർത്തനക്ഷമതയിലും ദൈനംദിന കാര്യങ്ങളിലും ഉണ്ടാകുന്ന മാറ്റങ്ങളെക്കുറിച്ച് ഒരു പഠനവും നടക്കുന്നുണ്ട്.

നിലവിലുള്ള പരിശീലന സൗകര്യങ്ങളുടെ ലഭ്യതയും ഈ പഠനത്തിൽ വിലയിരുത്തും. രാജ്യത്തെ 10 സംസ്ഥാനങ്ങളിൽ പോലീസ് സേനയിലെ വനിതാ പ്രാതിനിധ്യം ഇതിനോടകം 33 ശതമാനമായി വർദ്ധിപ്പിച്ചിട്ടുണ്ട്.

English Summary: The Kerala Police force will increase women's representation to 30 percent, a decision made after a DGP recommendation. Currently, only 10 percent of civil police officers are women. The goal is to gradually raise this by 5 percent annually without creating new posts, aligning with Union Home Ministry directives for states to ensure 33 percent women in their police forces.

Tags: Malayalam News, News Malayalam, Latest Malayalam News, Vachakam News, Kerala Police, Women in Police, Police Force, Kerala Government, Women Empowerment

ചിത്രം: Kerala Police, CC BY-SA 4.0, via Wikimedia Commons