കണ്ണൂരിൽ തിരഞ്ഞെടുപ്പ് ഗോദ ഉണരുന്നു: പ്രചാരണം ശക്തമാക്കി ടി.ഒ. മോഹനൻ

MARCH 19, 2026, 10:24 PM

കണ്ണൂർ: സ്ഥാനാർത്ഥി പട്ടിക പ്രഖ്യാപിച്ചതിന് പിന്നാലെ കണ്ണൂർ നിയമസഭാ മണ്ഡലത്തിൽ പ്രചാരണ പ്രവർത്തനങ്ങൾ ഊർജിതമാക്കി യുഡിഎഫ് സ്ഥാനാർത്ഥി ടി.ഒ. മോഹനൻ. മുതിർന്ന നേതാവ് കെ. സുധാകരന് സീറ്റ് നൽകാത്തതിനെ ചൊല്ലിയുണ്ടായ തർക്കങ്ങൾക്കും അനിശ്ചിതത്വങ്ങൾക്കും ഒടുവിലാണ് മണ്ഡലത്തിൽ പ്രചാരണം ശക്തമാകുന്നത്.

പരമാവധി വോട്ടർമാരെ നേരിൽ കണ്ട് പിന്തുണ തേടാനാണ് സ്ഥാനാർത്ഥിയുടെ തീരുമാനം. കെ. സുധാകരനെ അനുകൂലിക്കുന്ന വിഭാഗത്തിന്റെ പ്രതിഷേധം തണുപ്പിക്കാനും അതൃപ്തിയുള്ള പ്രാദേശിക നേതാക്കളെ കൂടെ നിർത്താനുമുള്ള തീവ്രശ്രമത്തിലാണ് ഡിസിസി നേതൃത്വം.

ദിവസങ്ങൾ നീണ്ട ഡൽഹി ചർച്ചകൾക്ക് ശേഷം പാർട്ടി തീരുമാനത്തിന് വഴങ്ങിയ കെ. സുധാകരൻ കണ്ണൂരിൽ തിരിച്ചെത്തി. പുലർച്ചെ മട്ടന്നൂർ വിമാനത്താവളത്തിൽ എത്തിയ അദ്ദേഹത്തിന് നൂറുകണക്കിന് പ്രവർത്തകരാണ് ആവേശോജ്ജ്വലമായ സ്വീകരണം നൽകിയത്.

എംപിമാർ നിയമസഭയിലേക്ക് മത്സരിക്കേണ്ടതില്ലെന്ന ഹൈക്കമാൻഡിന്റെ കർശന നിലപാടിന് മുന്നിലാണ് സുധാകരന് പിന്മാറേണ്ടി വന്നത്. വി.ഡി. സതീശൻ അടക്കമുള്ള സംസ്ഥാന നേതാക്കളും ഈ നിലപാടിനെ പിന്തുണച്ചിരുന്നു. വ്യക്തിപരമായ താല്പര്യങ്ങളേക്കാൾ പാർട്ടിയെ അധികാരത്തിൽ എത്തിക്കുക എന്ന ലക്ഷ്യത്തിനാണ് മുൻഗണനയെന്ന് അദ്ദേഹം വ്യക്തമാക്കിയിട്ടുണ്ട്.

മറുഭാഗത്ത് എൽഡിഎഫ് സ്ഥാനാർത്ഥി കടന്നപ്പള്ളി രാമചന്ദ്രൻ മണ്ഡലത്തിൽ സജീവമായ പ്രചാരണവുമായി മുന്നേറുകയാണ്. ആദ്യഘട്ടത്തിൽ തന്നെ സ്ഥാനാർത്ഥിത്വം പ്രഖ്യാപിക്കപ്പെട്ട എൻഡിഎ പ്രതിനിധി സി. രഘുനാഥും മണ്ഡലത്തിൽ സജീവമാണ്. വരും ദിവസങ്ങളിൽ കെപിസിസി അധ്യക്ഷൻ നേരിട്ട് അതൃപ്തിയുള്ള നേതാക്കളുമായി സംസാരിച്ച് പ്രശ്നപരിഹാരത്തിന് ശ്രമിക്കുമെന്നാണ് സൂചന. സ്ഥാനാർത്ഥി പട്ടിക പുറത്തുവന്നതോടെ എല്ലാ മുന്നണികളും പ്രചാരണ രംഗത്ത് സജീവമായതോടെ കണ്ണൂരിൽ രാഷ്ട്രീയ പോരാട്ടം മുറുകുകയാണ്.